الحياة ساعات تطلب الهزار والكلام الخفيف، وساعات تلاقي نفسك محتاج تدخل شوية في الأعماق.. هو احتياج تشعر به دون أن تفهم سببه.. وفي مرة من المرات قررت اختار واحد من الناس اللي عيني بتشوف في حياته دروس كتير قاسية.. شخص صغير في السن لكن الكبار بيتعلموا منه حاجات كتير
الولد ده ظروفه صعبة من يوم ما اتولد.. كل حاجة في حياته ماشية غلط.. بياخد كل لطشة والتانية من الحياة.. وتلاقيه بيقف على رجليه، مش بس كده، ده كمان بياخد بإيد اللي حواليه! بتفرج عليه و أنا بضرب كف بكف.. وباسأل نفسي.. هو جايب القوة دي منين؟ شايف الأمل فين و إزاي؟
هو شايف إيه جوا دماغه مخليه يقوم من أقوى المطبات في الحياة.. أبوه مات وهو عنده سنتين.. ووالدته ماتت وهو عنده ٦ سنين.. أخوه اخده في بيته يربيه.. مرات أخوه كانت بتعامله بقسوة وكانت بتسخن أخوه عليه لدرجة انه قاله مع السلامة وهو عنده ١٩ سنة.. بعدها اشتغل ونجح في الشغل
ارتبط بواحدة وحبها وقبل خطوبته بأسبوعين عمل حادثة وفقد رجله وعينه راحت منه.. ساب شغله ودخل في حالة نفسية صعبة، البنت وقفت جنبه شوية وبعد كده بدأت تتهرب منه لغاية لما سمع انها ارتبطت بواحد تاني.. في ظل الظروف دي، الشخص ده كان دايما إيجابي..
لما كانت تحصله مصيبه، تلاقيه قلقان على اللي حواليه وبيحاول يرفع من روحهم المعنوية.. وكانت قوته الحقيقية في تحويل الموقف لشئ غير متوقع.. بعد ما فقد رجله قعد يسأل عن حالات مشابهة وتواصل معهم وكان بيقابلهم ويشجعهم.. ينظم رحلات ويخرجهم من حالة الكآبة اللي كانوا فيها
عمل نفس الحكاية مع اللي عندهم مشاكل في عينيهم، كان بيروح يعيش معاهم بالأسبوع ويخدمهم مع انه محتاج اللي يخدمه.. ياخدهم من الظلام لغاية لما قلوبهم تقدر تفتح وتشوف اللي عينيهم مش شايفاه.. كل ما تقعد معاه، تشعر بطاقة متفجرة من الإيجابية.. طاقة حب مش طبيعية..
سألته.. انت جايب الطاقة دي منين؟؟ إيه اللي انت شايفه و أنا مش شايفه؟ قالي.. ساعات بشوف نفسي مُحارب زي بتوع زمان.. لابس الخوذة وماسك السيف.. وساعات بشوف ان كل حاجة راحت من جسمي، جه مكانها حاجة تانية مختلفة.. عيني اللي راحت جت مكانها عين تانية جوا بشوف بيها حاجات مكنتش اعرفها
رجلي اللي راحت، اعطتني فرصة عشان اتعلم اتسند على اللي حواليا.. كانت عندي مشكلة ثقة في الناس، لكن ساعات الحياة تضطرك انك تقبل حاجة كنت رافضها.. هارجع لسؤالك.. انا شايف إيه؟! شايف حاجات مينفعش تشوفها بالنصايح ولا بالحكايات.. وسيلة المواصلات الوحيدة هي الألم الشديد لدرجة الموت!
لما تختبر موت احد أعضائك، تقدر تعرف قيمة حاجات تانية كتير.. القوة الحقيقية مولودة في أشد لحظات الضعف.. الإيمان.. انك تفهم دروس الألم وتقرر تنتقم من عجزك بأنك تعطي طاقة خارقة لمن حولك.. شايف ان البذرة لازم تندفن في بطن الأرض عشان تطلع منها شجرة كبيرة وتوصل للسما
شايف ان الإنسان لازم يصدق في حاجة.. لازم يصدق انه يقدر.. لازم يعرف ان جواه طاقة تخليه يعمل المستحيل.. اللي يعيش من غير إيمان، يعيش طول عُمره عطشان!
جاري تحميل الاقتراحات...