رتبها

قهوتك فيها فتريتة؟
بعد قراءة الثريد دا حتفكر كتير وانت بتشرب القهوة بتاعتك !
حأوريكم كيف يتم غش القهوة وليه في قهوة رخيصة وقهوة غالية ؟ وكيف نشتري قهوة كويسة
لو أنت من عشاق القهوة تاني مافي شي حيقيف قدام كيفك أو يخربه ليك
جيبوا كباية قهوتكم المغشوشة او السمحة ويلا أرح #ثريد

القهوة أنواع حسب نوعية حُبيبات البُن والتحميصة بتاعتها وكل بلد عندها طريقة معينة لتحضير القهوة وعندها نكهات خاصة تميّز كل بلد من التانية , بس أحيانا بيتغير علينا طعم القهوة او نحس انو في قهوة ما زبطت راسك أو طعمها ماحلو ولما تمشي تشتري قهوة بتلقى كم سعر مع انها حبيبات بُن

أكتر نوعين من البُن منتشرة حول العالم :
- بُن أرابيكا - Coffea arabica
- بُن روبستا - Coffea robusta
بن الاربيكا هو الاغلي و طعمه يميل للحموضة وفيهو ريحة القهوة البلسمية أكتر وروبيستا بتكون نكهة القهوة أقوى ونسبة الكافيين اعلى من الارابيكا وكل واحدة وعندها ناسها ومحبينها

قبل ما اقول طرق الغش
في محلات محترمة بتبيع بن ممتاز لكن كل تحميصة عندها سعر للكيلو ليه؟؟
البن لما يتحمص بيفقد كمية من الرطوبة والزيوت الطيارة و دا بخلي وزن الحبة يقل وبالتالي لو انت عايز قهوة عربية حتلقى الكيلو ارخص من التحميصة الاغمق منها وهكذا

كل ما زادت درجة التحميص يحتاج الكيلو لعدد حبيبات اكتر, في الحالة دي في تجار عشان يتجنبوا النقصان في وزن الكيلو يحمصوا البن بالجلسرين الغذائي او يضيفوا السكر عشان الحبة ما تفقد الرطوبة والزيوت الفيها و دا انا ماعرفة هل اعتبروا غش او لا لكن هو بيفرق في طعم القهوة للناس البتتذوق

القهوة وبتعرف النكهة الحقيقية للبُن و للتحميصة الهم اختاروها , في توليفات للقهوة بين الارابيكا والروبستا بنسب معينة بتدي طعم جميل ودا ما غش لأنها معروفة لكن بيكون غش في حالة التاجر باع ليك القهوة انها اربيكا لكن هي مخلوطة بروبستا بنفس سعر الارابيكا

ممكن يتبادر لذهنك سؤال ليه التجار يغشوا القهوة؟
بسبب ضعف الانتاج في الدول المنتجة لحبوب البن ارتفعت الاسعار وبقو الناس يغشوا في البُن عشان يواكبوا طلبات الناس والاسواق عشان كدة حتلقو قهوة رديئة وقهوة كويسة وكل بلد عندها طريقتها في غش البن حسب موارد البلد نفسها

وفي غش من ناحية درجات نقاء البن من الحبيبات التالفة والمسوسة مثلا يتباع نوع بُن على اساس انو اربيكا درجة اولى لكن يكون في الحقيقة درجة رابعة ودا بتم ملاحظته بوجود كمية الحبيبات التالفة مع البن في نفس الكيس وفي فرق في السعر كبير بين الاتنين وكل ما زادت عدد الحبيبات الصغيرة

والتالفة والمسوسة تقل درجة نقاء البن وبالتالي سعره.
يلا نجي للغش العلى أصوله وممكن ناس كتار حيتصدموا بالحأقوله : في كل بلد عندهم غش بطريقة معينة وحسب مواردهم يعني في بلاد بتضيف دقيق الحمص (الكبكبي ) عشان تزيد من وزن القهوة وفي ناس بيضيفوا نشارة الخشب والخشب البودرة

وفي ناس بيضيفوا القمح لزيادة كثافة القهوة واعطاء الرغوة الغشاشة , وفي كل الحالات بيتم قلي الحاجة المضافة وبيكون لون الشي المضاف نفس لون القهوة وبعدين يتم طحنه وفي اضافات زي النشا والرز وحبوب الفول السوداني بعد درشها تتقلي زي البن وتتسحن وتضاف للبن لا كمان القشر زاتو يتقلي كويس

ويطحن, برضو وفي اضافات زي الشيكوريا (جذور الهندباء) وكتار ما بيعتبروها غش لأن الشكوريا عندها خواص مقوية للقهوة بتلقوها مضافة في القهوة سريعة التحضير زي النسكافيه , وبيضيفوا فول الصويا والسكر البُني والبقوليات كلها بعد التحميص

نجي للبُن بيتم غشه في السودان كييييف؟؟؟؟؟؟
يتم غشه باستخدام الفتريتة والمابيعرفوها ياها حبوب الذرة الرفيعة ما البيضاء لأنها بتكون أرخص في السعر والفتريتة بتتقلي عديل وتتطحن وتخلط مع البن والخلط دا بيكون بنسب انت وضميرك 😂 بس المعروف انها شوال بن لشوالين فتريتة اتصدمتو؟؟

طيب كمان بيتم قلي نوى البلح وطحنه واضافته للبُن بنفس الطريقة وكمان الفول السوداني بعد درشه وقليه.
ونجي للقهوة البتكون عند ستات الشاي ما بعمم طبعا وما بشمل لكن بعضهم عنده طريقة غش انهم بيلموا باقي الخبز ويقلوه ويزيدوه للبن وممكن تكون الوحدة اصلا مشترية قهوة مغشوشة وتغشها زيادة

وكدة تكون القهوة اتغشت مرتين وبتظهر طوالي في طعم القهوة وتجي تغطي عليها بإضافة دواء القهوة ويغطي على الطعم وبكدة بتكون قللت تكلفتها وزادت ارباحها
الغش دا صعب جدا انك تميزه بالعين وخاصة لما يكون البن فيهو اضافة زي الهبهان والزنجبيل ودواء البن وكمان لو قهوة جاهزة فيها

كراميل او شكولاتة او اي اضافات نكهة تانية بيكون التمييز أصعب ما بالنظر بس حتى الطعم بيروح وبتكون ما مميز الا تكون خبير , ورغم دا بنلاحظ انو في قهوة طعمها سئ عديل دي بتكون اتغشت شديد!

كيف انا اعرف البن المغشوش؟
في طرق ممكن نحاول انو نعرف بيها البن المغشوش مثلا زي طريقة الكباية نجيب موية في كباية شفافة ونضيف ملعقة او اتنين من البُن الجاهز ونلاحظ من 5- 10 دقائق

حسب ترسب وتلون الموية اذا تلونت بقوة وبسرعة فهذه قهوة ممكن يكون مضاف ليها ألوان او مواد اخرى وبعد كدة نلاحظ لترسب تِفِل البُن اذا كان الراسب كبير بالمقارنة مع الملعقة الانت اضفتها معناها قهوة مغشوشة

وبالتالي كمان نلاحظ في وسط الكوب للشوائب العالقة زي الالياف ونحاول نفرزها من الالياف بتاعة الزنجبيل والهبهان والغرنجال لكن دي ما سهلة في حالة القهوة المضاف ليها النكهات دي .
الطريقة دي ما علمية لكن ممكن تديك مؤشر أولي وكمان ممكن تلاحظ لترسب المكونات أثناء ما بتشرب فنجان القهوة

وملاحظة الشوائب لكن الطريقة المثبتة علميا لكشف المكونات عن طريق فحص العينات معمليا .
طيب انا اعمل شنو ؟
اشتري قهوة حبوب مع تحميصها في البيت دا كخيار اول او لو كنت من محبي التحميصات المتخصصة تشتري البُن من محمصة محترمة وموثوقة سواء كان حبوب او مطحون

- لما تشتري اشتري قهوة جيدة تكون الحبوب فيها لون واحد واحجام متقاربة يعني محصول واحد سواء كان اربيكا او روبوستا ويكون مافيها حبيبات تالفة او مسوسة
- ما تشتري قهوة مضاف ليها نكهات لأن صعب كشف الغش فيها ممكن تضيف النكهات براك
- اقرأ المكونات بتاعة القهوة

طيب ليه انا كتبت الثريد دا؟
لأن اول شي انا من عشاق تذوق القهوة , وفي ناس زيي كدة , ثانيا وهو الاهم انو الاضافات دي ممكن تؤثر على صحة المرضى بأمراض مزمنة زي السكري , وعلى العندهم حساسية الغلوتين وبيتعب جدا منها مع انها ما السبب , كمان متبعي الحميات زي كيتو دايت

دا معناهو انو كل تجار البُن بيغشوا بالعكس في محلات محترمة وبتقدم تحميصات رهيبة زي (بُن درويش ) بإدارة اخونا محمد فهمي وكمان في قهوة مستوردة من السعودية (بن الخير) واقتراحات تانية في السودان زي بن الكنداكة وابو مينا
اقترحوا واكتبوا اسماء قهوة محترمة وممتازة في التعليقات
💚💚

لو قريت الثريد دا للنهاية انا بقول ليك شكرا والله

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد