لما تجي للمستشفى مع طفلك ، أنت هنا حطيت المسؤولية كاملة بعنقي فأبسط حق لي عليك هو أن اسألك وتجاوب بكل تفصيل صغيرة كانت أو كبيرة .
١. أرجوك لما أسألك ايش عنده طفلك ، لاتقول فايروس بالجو .. لاتقول نزلة معوية ، لاتقول لوز ، هذي كلها " تشخيص " أنا أقولها لك مو العكس ، قولي الأعراض : حراراة ، استفراغ ، قلة رضاعة ، كحة ، عطاس .
٢. لما أسألك ايش السبب اللي جابك المستشفى لاتعطيني نظرة " 🤨 " تعبان وش يعني .. أدري يالغالي ان ولدك تعبان ماانت جاي تخطب له لكن هل جابتك الحرارة ؟ هل جابتك التشنجات ؟ لأن يفرق عندي اذا طفلك لك اسبوع يكح ، لكن ماجيت الا لما جت عنده الحرارة .. وضح ؟
٣. أرجوك لما اسألك أي سؤال " انت تشوفه غبي بنظرك " انزل لمستوى غبائي ورد عليّ لأن لما أسألك كم عندكم أطفال غيره لاتعطيني نظرة " 😒 وش دخلك " ، لاتعطيني جملة " عندنا ماشاء الله " ، ترا والله ماراح أحسدك على عدد أطفالك اللي عددهم ١١ فريق كورة لكن يهمني بأشياء كثيرة .
٤. الأم لما اسألك كم عمرك ، ارجوك قولي الصدق ، ترا مارح أعلم " منيره و نشميه " ، لأن بعض الأمراض لها علاقة بعمر الأم .
٥. لما تجيب طفلك وهو عنده أمراض مزمنة من مدة طويلة " أنا أتفهم انكم تعبتم و عليكم ثقل كبير " بس أرجوكم اعتبروها أول زيارة له وعطني تفصيل ممل للتاريخ المرضي عشان أكون مُلمّ ، ولما أسألك عن الادوية اللي تأخذ " تكفى لاتقول اللي فيه خط أزرق " ترا اللي خطوطهم زرق واجد .
٦.الأب ، ترا اعرف انك " الرجل القيور " ، لكن لمّا أبدأ أوجّه الأسئلة للأم أرجوك اتركني ، ترا مايعني اني مهمّشك لكن لأني عرفت من الاسئلة اللي قبل انك داج ولاتدري عنه ،امه اتصلت عليك وانت بالاستراحه قالت ودنا المستشفى والان اللي عارفة بالحالة الام ف خلني افهم منها ماراح اسرقها منك
٧. أيتها الأم الغالية ، ترا عيال حسناء اللي تعبوا وعطاهم الدكتور مضاد معين مايعني انك تجيني تقولين عطني زيهم ، لكل عمر ولكل حالة وشدتها حاجة مختلفة .
٨. أرجوكم ترا لما نقولكم " حتى الان مافيه تشخيص واضح " ، ترا نعنيها فعلاً نحتاج أشياء كثيرة تضيّق نظرتنا و تودينا لتشخيص معين " تحاليل ، أشعات ، فحوصات ثانية كثيرة " لاتعطيني نظرة 😠 " هذا وانتم دكاترة ماتعرفون "
٩. وأهم نُقطة لاتجيب ولدك وتنزله وتقوله " شف وش فيه الورع " ، وكل ماسألتك تقول الظاهر يمكن ماادري .. لأن وقتها مااعرف مين الورع .
١٠. لما نحتاج فحوصات و تكون الفحوصات هذي لازم ورقة توقعها انك موافق ، مثل ابرة الظهر ، لاتقول لاماني موقع تبون تشلونه ، لاتقول لا مايحتاج ، انا ماقلتها الا انه يحتاج ماقلتها لان ودي اشق ولدك.
١١. لما نقولك تنويم ويحتاج تنويم تراه يحتاج تنويم وش يحتاج؟؟ تنويم ترا ماكنا فاضين وناكل بيتزا ونقول ياشباب دوروا احد نبي ننومه ، ونقزّرها عليه .
12. الأم اذا كتبنا تنويم وجيتك بعد ساعة لاتقولين متى الخروج طولتوا .ترا ابرَد ما على قلبنا لما نكتب لكم خروج لان الحالات تخف علينا
12. الأم اذا كتبنا تنويم وجيتك بعد ساعة لاتقولين متى الخروج طولتوا .ترا ابرَد ما على قلبنا لما نكتب لكم خروج لان الحالات تخف علينا
13.اذا كتبنا لكم تنويم ودخلت .. ارجوك لاتجي بعد ثلاث ساعات تقول بطلع ع مسؤوليتي " لانك هنا تكون بعثرت جهدي كله و تخليني اسبك بداخلي بكلام اطلع من الملّه "
هذي الاشياء اللي اذكرها وفيه اشياء واجد كثيرة كل ماتذكرت بجي اكتب
وتمنياتي لاطفالكم بالقوة والعافية
وتمنياتي لاطفالكم بالقوة والعافية
يااخوان الجوال يتراعد شوي شوي على اللايكات .. 🔄🔂
عموماً البعض أساء الفهم ويعتقد إني أتحلطم أو أغلط على الأهل و أوصفهم بالجهل .. غير صحيح ، الموضوع باختصار كان توعوي لكن بأسلوب غير تقليدي وبعيد عن التشخيصات حتى يصل ويكون مقبول للجميع .
وعلى قلبي الآباء و الأمهات كلهم 🙋♂️.
عموماً البعض أساء الفهم ويعتقد إني أتحلطم أو أغلط على الأهل و أوصفهم بالجهل .. غير صحيح ، الموضوع باختصار كان توعوي لكن بأسلوب غير تقليدي وبعيد عن التشخيصات حتى يصل ويكون مقبول للجميع .
وعلى قلبي الآباء و الأمهات كلهم 🙋♂️.
جاري تحميل الاقتراحات...