- ثريد نصائح للبرالمة الجُدد
"في محاولة لإنه الإنسان يكون سنير مفيد شويّة"
"في محاولة لإنه الإنسان يكون سنير مفيد شويّة"
•مبدئياً كدا خليّك عارف إنه إنت وصلت المكان دا بعد جهد وتعب سنين ، انت هسي بديت في إنك تبني المستقبل الكنت دائماً بتحلم بيه، وما تنسى مجهود أهلك ووقفتهم معاك وقدر شنو انت ممتن ليهم ومديون ليهم، وعشان ترد الجميل دا لازم تجتهد في سنينك دي،عشان ترفع رأسهم ويفخروا بيك.
• المرحلة الجامعية ممكن تكون من أغرب وأصعب المراحل في حياتك، لأنك فجأة حتلقى نفسك داخل مجتمع فيه ناس كتيرة مختلفة عنك ،سواء فكريّاً أو ثقافيّاً او دينيّاً ، وحتتفاجئ كتير يعني لانه حتلقى حاجات كتيرة جديدة وغريبة عليك، لكن خليك متأكد إنه حيكون عندك فيها ذكريات جميلة جداً.
• حيكون عندك أوقات فراغ كتيرة ،بالذات في أول سنة ،حاول ما تضيعها في اللمات والطلعات واللعب وما إلى ذلك ، استفيد من الزمن دا إنك تكتشف فيه الجامعة والأنشطة الفيها وحاول على قدر ما تقدر تشارك في الأنشطة دي.
• والله يرضى عليك خليك عارف إنه الجامعة أبداً ما كانت مكان بنبحث فيه عن شريك حياتنا، إنما مكان للقراية والاجتهاد واكتشاف الذات والانغماس في المجتمع وتكوين معارف يفِيدوك ، فحاول ما تلعب بسمعتك وبالحاجة الحتمثل ماضيك بعدين.
• عليك الله ما تصاحب ليك ناس سلبية ،أبعد من الناس السلبيين، والناس الم طموحة ،والناس الم مشجعة ، والناس الكل حياتها طلعات وفُسح ، والناس الم عندهم هدف في الحياة ، والناس النمامة، والناس الم مجتهدة، والناس النظرتها سوداوية دائماً، ومن أي زول بتحسوا بقلل من شأنك او شايف الانت...
بتعملوا دا شيء تافه ،والناس اللوامة ويقعدوا يقيفوا ليك على الوحدة، ما تختوا نفسكم تحت أي ضغط من قِبل الناس ، اي زول بتحسوا مضايقكم نفسياً او مستفزكم او ما متقبلكم أفصلوا طوالي ، مالكم جايبين الهم للنفسكم عليك الله؟!
• صاحبوا الناس الحلوة ،الفرفوشة ، البتنشر البهجة والسرور ،ودائماً مبتسمة ، الناس البتشجعكم وبتقيف معاكم في اي خطوة بتعملوها، الناس البتنصحكم وبتوريكم الصح من الغلط، الناس البتخليكم تلتفتوا لمستقبلكم وحياتكم ما مستقبل الناس وحياتهم ، الناس البتحتويكم.
(صاحبوا أصحابي🙈💕)
(صاحبوا أصحابي🙈💕)
• دي نصيحة من زولة ما بتتعلم من أخطائها، ما تأجلوا قرايتكم ،على قدر ما تقدروا حاولوا مروا على محاضرات اليوم ،قراية كتب سااي ما مذاكرة وحفظ كأقل شيء. وما تضيعوا درجات الاسايمنتات واللابات والتيتوريلات ؛ لأنها درجات مجانية.
• الجانب الأكاديمي دا ما تلعبوا بيه ،ما تلعبوا بيه ١٠ مرات، اهم شيء خليكم عارفين إنه الدكاترة ما حيدرسوكم كل شيء ،في حاجات انت حتجتهد وتعرفها براك، بس الأهم إنك تحضر المحاضرات وما تدكها ،وتحضرها بتركيز عشان الدكتور بشرح النقاط المهمة واللي حيركز عليها في امتحانه،لكن برضو يا..
شباب لو الدكتور ما بعرف يشرح خالص ، انت ما مجبور تحضر ليه وتضيع زمنك (إلا في حال بشيل اتندس إجباري 😭)، امشي شوف ليك دكتور لنفس المادة بشرحها بطريقة كويسة في الكليات او الجامعات المجاورة ، أو احسن خيار افتح يوتيوب ، يوتيوب ما خلى شيء ماشرحوا، الله يديهم العافية دكاترة يوتيوب..
وقفوا معانا وقفة رجال🤣💕
الحاجة التانية يخوانا اي شيء ما تفهموا أسألوا ، ما تخجلوا إنكم تسألوا ،"ميمان لا يتعلمان: مُستحٍ ومُتكبر" ، اسألوا الدكاترة أو ناس دفعتكم او سنايركم حتى لو ما بتعرفوهم، قولوا نحن الحاجة دي ما فهمناها، وصدقوني حتلقوا الحيساعدكم.
الحاجة التانية يخوانا اي شيء ما تفهموا أسألوا ، ما تخجلوا إنكم تسألوا ،"ميمان لا يتعلمان: مُستحٍ ومُتكبر" ، اسألوا الدكاترة أو ناس دفعتكم او سنايركم حتى لو ما بتعرفوهم، قولوا نحن الحاجة دي ما فهمناها، وصدقوني حتلقوا الحيساعدكم.
• السناير يخوانا، أعظم كنز في الجامعة، بس اعرفوا اختاروا كويس وما تقعوا في سناير فارغين وهاملين عشان يا هو الوقعتوا وما سميتوا، السناير ديل عبارة عن النور لدربك، حيسهلوا عليك زمن طويل في اكتشاف : اقرا من وين ، واقرا شنو وكيف ، والامتحان بجي كيف ، والمرجع الأحسن والزيوت...الخ
• الأنشطة الجامعية والعمل النقابي الاتنين ديل حاجة مهمة شدييد، بتكتشف فيها نفسك وبتكوّن شخصيتك، وبتعرفك على ناس حلوة شدييد ،دا غير إنه بتعرف الحياة حولك ماشة كيف ، وبترفع من الاسكور بتاعك ، وبتقدر عن طريقها تخت بصمتك في الجامعة، ولكن أبداً ما تكون على حساب الجانب الأكاديمي.
-وأخيراً وليس اخِراً، اتعلموا تنظموا وقتكم وتسيطروا عليه ،وما تخلوا يضيع في أمور تافهة ، وركزوا في حياتكم وفي نفسكم ومستقبلكم، ويعني والله ما تشوفوا جرستنا دي لكن الجامعة دي مرحلة حلوة ولطيفة، فخليكم مبتهجين وحِبوا الحياة وانبسطوا، واتعرفوا على ناس حلوة واعملوا ذكريات لطيفة💕
وربنا يوفقكم ويوفقنا جميعاً💕.
جاري تحميل الاقتراحات...