من أفضل القرارات اللي اتخذتها مؤخراً وشفت أثرها فوراً على النفس والصحة الجسدية والعقلية هي؛
الكف عن المثالية الزائدة والسعي للكمال.
اكتشفت انها صفة تدمر الواحد داخلياً شيئاً فشيئاً بدون مايحس.
والتخلي عنها تجيبلك الرضى والعافية وراحة البال.
ويبقى الكمال لله تعالى وحده ♥️

شنو يعني لو زدت كم كيلو؟ تنزلهم عقب
شنو يعني لو "خربتها" فالعيد؟ تصلحها عقب
وشنو يعني لو ماحصلت تقييم امتياز هالسنة؟ تحصلها مرة ثانية
وشنو يعني لو قصرتي مع عيالج؟ تعوضينهم
وشنو يعني لو ولو ولو؟
وشنو يعني لو كل ذي ما صار او صار؟
عادي، مب شرط نكون مثاليين في كل شي.

مشكلتنا المعايير اللي حاطينها لنفسنا واللي غالباً تنبثق من ضغوطات وعادات ومعايير المجتمع الظاهرية، حتى هذي المعايير مب شرط تكون صحيحة وواقعية، معايير خاصة للجمال، والنجاح، والسعادة، والصحة.
ليش نلزم نفسنا بمعايير فارغة غالباً ومثاليات زائفة؟
وفي النهاية، وصلت للسعادة والرضى؟

خلوا كل ذي على صوب صارلي ساعة احوس في قوقل ايهما اصح نكتب رضى ولا رضا؟
مصادر تقول كلاهما صحيح ومصادر تقول الأصح هو رضا. تغريدة هامشية للتصحيح والفائدة 😂