أنا اختبرت أشخاص toxic كتير وقليل..
بس كل مرة بقف قدام قدرتهم العجيبة على إقناعك أنك غلطان وطريقتهم ومنهجهم في أنهم يخلوك تشك في نفسك وتقول أسئلة من نوعية .. هو أنا قصرت فعلا ؟؟

هو أنا ممكن أتنازل شوية طيب ؟؟
هو ده مش من حقي ؟؟
هو أنا وحش؟؟
ويوم ما تقرر تاخد خطوة لورا وتخرج بره دايرة الأذى دي تبقى أنت أناني وندل وبتخلى بيهم في أصعب أوقاتهم.
ويبتدوا بقى يلعبوا على مشاعرك واستعطافك ولو تماسكت شوية هاتكتشف قد ايه هما بيصدروا لك صور مشوهة عن نفسك

وإنك مع الوقت بتصدقها حتى مع انتهاء علاقتك بيهم.
بس لما تلاقي نفسك جوه دايرة الأذى دي اكسرها واهرب، تخطى احساسك بالذنب وشعورك بأنك كان ممكن تحاول مرة كمان.
لأنك بالفعل حاولت وتقبلت وتصالحت مع أوضاع كانت مؤلمة ومؤذية من اللحظة الأولى.

الأشخاص ال toxic بيبقوا عاملين زي اللي بيمص دمك وطاقتك وأنت بتنازع كل يوم عشان ماتخسرهمش وأنت فاكر يا عيني أنك كده أصيل وباقي ع العشرة.
بس الحقيقة أن خسارتهم مكسب واعتذار لنفسك عن كل السوء اللي كانوا طرف فيه.