رتبها

بحكم اني فاضي وانا رجال راعي ذوق بالبناء وراعي خبرة ان شاء الله شرايكم اعطيكم نصايح بالبناء والتشطيب ؟
اذا وصل اللايك للتغريدة هذي 50 بديت بالثريد واذا اقل فيعني ماله داعي اتعب بعصر الفكر والقروشة وافهمها عاد ،،
الثريد تحت هالتغريدة
#تصميم_داخلي #ديكور #الرياض #العيد

اشتراطي لعدد اللايكات علشان اشوف هل العدد يستحق ان الواحد يتعب أولا وماهو بحث عن رتويت ولا لايك لان الموضوع متعب وبيطول وممكن ياخذ وقت وبيني وبينكم قلت خله مرجع لهم يستفيدون ونقدم شي مفيد لوجه الله ولذلك اللي حطوا لايك يستاهلون من يتعب لأجلهم فبسم الله نبدأ :

اول شي هل تملك أرض ؟
اذا ما ملكت أرض فأول خطوة ان تكون مشروع وهدف لك تطبق على مدار سنوات لأن مشكلتنا تطري عليك الظهر تشتري ارض العصر احصلك بالمكاتب العقارية وعليك قروض وتتسلف وتنشب !
اول شي انهي جميع قروضك بعدها ابحث عن الأرض وتكون بعيده مايوصلها البنيان الا بعد خمس سنوات

ليش اقولك بعد خمس سنوات علشان يكون سعر المتر قليل ولي هدف بتعرفه بعد شوي.
خلينا نقول هدفك300 /400 م الارض حاول تكون واجهتها جنوبية ولا شرقية علشان الشمس وعرضها على الشارع أقل شي 16 متر
عرض الشارع اقل شي 15م وحاول تشوف مخطط الاراضي صغيرة علشان مايصير جارك وحدات لان جيرتهم متعبة

حصلت الارض بسم الله طلع قرض شخصي واشتري وتراك كذا قطعت 40٪ مشوار بناء البيت
واذا قرضك يسمح لك تشتري الارض اللي بجنبها لاتشاور اشتري وانت مغمض بعدها ياحبيبي امسك ام العيال وفهمها اننا لازم نفتصد ومني أنا بتساعدك بنت الرجال وخذ من راتبك 2000 للادخار والهدف العظم بعد خمس سنوات

بعد خمس سنوات بيخلص قرضك ومعك ارضك ومال مدخر من 2000 ريال في 60 شهر
هذي 120 الف خير وبركة طبعا اذا تقدر تزيد المدخر افضل وافضل انت اوزنها على ظروفك،،
الحين ماعليك قروض ابدأ بهدف 100 الف وكمل لين تجمع مبلغك وبالوقت هذا بتلاقي ارضك وصلها البنيان
بعدها نبدأ بالبنيان

راتبك طبعا خلال هالسنوات في زيادة فالقرض الجديد الشخصي بيكون اعلى وليه اقول شخصي لأن فايدته بسيطة
بعدها تبدأ بالبناء وحط في بالك هالاشياء :
الخزان الارضي لايزيد عرضه عن 3 متر وهذي حركات يسوونها المقاولين يزيد عن 3 م فخليك تدبل حديد السقف ويستفيد امتار يحسبها عليك

طبعا اذا بيكلف 8 الاف اذا زاد عن 3 م عرض بيكلفك دبل القيمة غير التمتير اللي بياخذه المقاول فانتبه للشي هذا ،،
الصبات لازم درجة حرارة الخلطة تكون 20ْ فأقل علشان التشقق ولذلك بداية البناء الافضل بالشتاء وصبات القواعد تكون معزولة يعني مقاومة للماء اما اللي فوق الارض عادية

اذا درجة حرارة الخلطة فوق 25ْ لايصب وبيدري انك فاهم وبيدبر نفسه وبيحط قولب ثلج ينزل حرارتها ولازم الخشب يكون جديد ولا نظيف
نجي للبنيان والبلك
الافضل الابيض بعده البلك البركاني داخله فلين وانا افضل الواجهة الغربية او الشمالية ابيض والباقي بركاني ولو حطيت بركاني رخيص وطيب حيل

البلوك الاحمر زين بس مشكلته التكسير على طول يتكسر بتمديد الكهرب والمواصير يعني البركاني خيارممتاز
وبالنسبة للجدران اذا بدأ يبني
اشترط عليه يكون مستقيم يعني مثلا غرفة 4*4 ماتكون من جهة 4 والجهة المقابلة 4م و 5 سم
هال5 سم بتحوسك بالبلاط لانه بيكسر بلاط علشان ها ل5 سم يرقع ع حسابك

الاصنصير عندي مهم جدا ماتدري عن الظروف
عندك حرمة بتحمل
غرفة لامك بالدور الثاني
بتحط حديقة بالسطح لاتسترخصه وأصلا تأسيسه مايكلف ويوفر عليك دربزين واذا تيسرت امورك تقدر تركب الاصنصير ولا قفله

نجي لفتحات الشباك :
فتحات الشباك فن وذوق واخلاق 😅
تحط دريشة عرضية وتكبرها والحجة ابي نور بلوكك العازل صور معه لانها بتدخل عليك حرارة ! خسارة عوازل !
وكل من ركب شباك كبير رجع وحط ستاره 🤤 غير ان الالمنيوم بيزيد عليك التكلفة كثير !
يعني خسران وحر
فكيف الشباك : ⬇️

داريشك الله لايهينك الأفضل بطول 160 سم وعرض 80 سم
مو لازم هالقياس عاد هذا انت تحدده مع المهندس بالمخطط وتفتح على قدام وخلي الرف داخلي علشان الغبار اذا فتحت الدريشة مايدخل عليك ولايعشش الحمام يعني نظام ستركشن
زي كذا الدريشة بس اقل ارتفاع ووزعها على حسب المساحة

في غرف النوم خلي الدرايش بنفس النظام بس تكون في الزاوية لانك اذا حطيتها بالنص ضيعت المساحة لاتقدر تحط سرير ولا دولاب بالزاوية تضمن الاستفادة من 90٪ من الجدار اللي عليه الدريشة
الغرف الكبيرة شباكين والصغيرة شباك واحد زي كذا ⬇️

نجي لارتفاع الجداران
الدور الارضي 16 بلكة واشترط ع المقاول بالعقد اذا رفض لا تتنازل دور غيره والدور العلوي 15 بلكة
ليش اقولك هالارتفاع
لأن عندك جبس بورد بياخذ من السقف اقل شي بدون دكت للمكيفات الصحراوية والمركزي 60 سم مع الدكت 80 سم!
يعني 14 بلكة بيصفي لك جدار ارتفاع 260سم ⬇️

وبيصير سقفك نازل وبيتك مكتوم وبتحط انوار ليد علشان التوفير واضائتها تتعب العين اذا جلست لدرجة إن النور بيكون وسط البؤؤ!
15 بلكة بيصفي لك جدار 3 م مرتفع 16 بلكة بيصفي لك ارتفاع 3،20 م
إضافة إلى انك تقدر تحط السخانات بدورات المياه فوق الجبس سخان عرضي اجمل
سقف الحمام والممرات نازل

يعني سقف 14 بلكة اقبله فقط في غرف السطح
اذا ملخص الجدران :
ارضي 16 بلكة
العلوي 15 بلكة
غرف السطح 14 بلكة
عاد الحين ابقوم ارقد واكمل ان شاء الله وقت ثاني
الباقي مهم أيضا
تحياتي :
المقاول : محمد ابراهيم 🤤😄

نكمل
قلنا نضع اصنصير نأسس له لو مااستخدمناه نسكره لين نحتاجه وهو مايكلف طبعا وبيكون صغير حق ثلاث اشخاص انتبه للأمر هذا :
فتحة الباب لازم اقل شي 130 سم اقل من كذا بتركب باب واحد اقل من متر صور مع اصنصيرك ولا خله مستودع مافي باب يركب له وكبينه فانتبه للقياسات لازم 130 وفوق

الدرج :
نقطتين مافي تنازل عنهم :
افضل قياس لعرض الدرج 130 وفوق الى 140 تتنازل لين 125 بحكم السعة والاصنصير
وبين الدرجه والدرجة ارتفاع علشان ظهرك وتكون مريحة 15/16/17 سم يلعب في القياس هذا وينوع فيهم لين الاخيرة لان بعض المقاولين يحط مقاس واحد والدرجة الاخيرة تجي ارتفاع 8 سم !!

نجي للدور العلوي وغرف النوم :
لاتحط صالة فالدور العلوي حط مكانها غرفة يعني هذا غرف نوم استفد من كل مساحة
الملاحظ كثير يهجر الدور الارضي ولايستفيدرن منه ودايم مغطى بأوامر ست الحسن علشان مايخرب الاثاث للضيوف!
عاد هالضيوف اللي كل يوم !
فلذلك تحط لهم صالة فوق !

افضل مكان لغرفة الغسيل تكون بالدور الثاني لان تبديل الملابس بالغرف لاتحطها بالدور الاول ولا الثالث انتبه
دورات المياه : مهم ⬇️
كل غرفة فيها حمامها نصيحة
خصوصية تامة وكل واحد مسؤل عن حمامه
والبنات كبر دورات المياه لهم علشان غسالة خاصة لهم اذا كبروا لملابسهم الداخلية وخصوصيهم

البعض للأسف يجمل بيته بحجر ولا رخام خارجيا ويهمل الداخل ويقصر فيه ! وكأنه بيسكن برا !
اكرر دورات في كل غرفة نوم مهمة جدا بالذات للبنات وماتكلف شي!
الشكل الخارجي للناس والداخلي لك ولعيالك فدلع نفسك ولاتدلع الناس !
الواجهة الوحدة للحجر تكلف 80 الف وزيادة خلي قيمتها للداخل فخامة 👌🏼

نجي للكهرب والاسلاك وبنطول فيها لأهميتها :
لازم الكهربائي يكون شاطر في توزيع الأحمال ولازم الاسلاك وعلب الكهرباء أفضل نوع
وارشح اسلاك الفنار وافياش بانوسونيك وتجي الافياش نوعين درجة اولى وثانية خذ درجة اولى .
سعرها معقول وممتازة وانتبه تبخل في الكهرباء والسباكة

عندنا دفايات بالشتاء والأغلب يجيب توصيلة وهذا أكبر خطر والحل ياحبيبي في كل جدار ثلاث أفياش كهرب اذا الجدار من 5 متر وفوق بالصالات والمجالس واذا اقل فيشين
انا عن نفسي اضع في الاماكن اللي فيها تشغيل دفايات 6 ملم مثل الصالة بثلاث افياش علشان افتك من التوصيلات

4 ملم كافي لكن الفرق بالسعر مو كثير فأضع 6 ملم بالصالة والمطبخ والمطبخ هذا حكاية ثانية فلا تستغربون اذا قلت اضع على امتداد رف الرخام بالجدار الواحد 6 افياش كل فيشين بجنب بعض وطبعا هذا يحددها انت وراعية البيت تتخيلون اماكن الاجهزة وتضعون لها افياش
(ولاتنسى تحت المجلى فيش للفلتر)

المطبخ كله اجهزة الان واذا بتركب فرن كهربائي لازم سلك 8 ملم فلذلك انتبه لكهرباء المطبخ
نجي لغرفتك :
نفس الشي ثلاث افياش في كل جدار والحدار اللي عليه السرير فيشين واحد يمين السرير والثاني يساره باسلاك 4 ملم كافي
وبالنسبة للسقف السلك الرئيس 4 ملم يتفرع منه 2،5 ملم لانارة الليد

نجي لاماكن التلفزيونات لازم خلف التلفزيون ثلاث افياش كهرب غير مدخل الرسيفر والتلفون
غسالة الصحون غالبا البرادة توضع فوقها مع فيش احتياط فحط ثلاثة افياش
تحت المجلى فيش للفلتر
البايكة حط عندها فيش لباب الكهرب
والملحق او المشب لاتبخل بالافياش لانه مكان جلستك 4 ملم سلك كهرب

طبعا لازم تحدد مكان التلفزيون والاجهزة بالمطبخ وحتى الحمامات لازم فيشين عند المراية استشوار ومكاين حلاقة وبالحمام الرئيس فيش للجاكوزي وفيه نقطة مهمة جدا
صور التكسير واماكن الاسلاك والمواصير قبل اللياسة علشان وقت التركيبات بيشتغلون بالدريل وتعرف وين يشتغل هذه مهمة لايخرق المواصير

نجي للسباكة :
طبعا ضع في بالك انك بتضع دينمو لدفع الماء فلازم مواصيرك حرارية تتلحم مع بعض بلاستيك وخليها شركة وحدة
الدارج بين الناس الالماني بالنسبة لي احب الايطالي ارخص واقوى وكلها قوية وابعد عن النبرو ترى عمره 15 سنه
ولايتحمل الدينمو
ضمانه 50 سنة الايطالي
يتحمل 20 بار ضغط

مجلى المطبخ خلي السباك يحط خلاط فوق المجلى وتحت المجلى ليه؟!
اذا ركبت المجلى يصير عندك خيار تحط الخلاط فوق المجلى او على المجلى ويكون عندك الماء تحت المجلى للفلتر يغذيه علشان ماتضطر تمدد له ويكون الشكل قبيح

وبحكم إننا رافعين السقف نخلي الجبس بورد في الحمام نازل جدا :
افضل شكل ، السخان فوق الجبس نركب النوع العرضي ، دافي بالشتاء ، بارد بالصيف ،
نضع المحابس فوق الجبس ونضع فتحة صيانه بالسقف
السهان العرضي لازم 80 سم من السقف يعني نزل الجبس عن السقف 80 سم وانتبه للشباك لايصير مرتفع

نجي لتصريف السيول من السطح انتبه تشبكها مع الصرف الصحي ليه ؟
غير انها تشيل الاتربة والاوساخ والقطع للصرف الصحي وتسكرها لو خرب الاتماتيك حق الغطاس وعبيت يدوي ونسيت الموية تعبي في الخزان العلوي وامتلا التانكي مادريت عنه !
لكن اذا جاك في الحوش عرفت !

نرجع للخزان الارضي لازم تحدد مكان الفتحة وتكون بالمكان الميت يعني مثلا بجنب الملحق ولازم للفتحة رقبة اذا تم غسيل الحوش ماتدخل الاوساخ تصب مع السقف يعني لايضع لك بلك !
وخله يضع لك محبس لموية البلدية تسكره من داخل البيت هذي مهمة لان تسكيرها من العداد عليها غرامة !

دخلت بيوت وحصلت فتحة الخزان الارضي باماكن عجيبة !
اللي عند الباب واللي عند البايكة شي عجيب !
ضعها في المكان الميت زاوية الملحق مع السور بعيدة عن الباب والبايكة
خلصنا العظم الان والكهرب والسباكة هل نقف بناء ؟
الاغلب يقول لك وقف والصحيح : ⬇️

طبعا انا ابدأ البناء في شهر 10 ميلادي واكمل الى البلاط ..
شهر 10 يبدا الوقت يكون بارد وعندك صبات ورش موية وكثر رش موية وبناء فالرش مجدي وتختمها باللياسة يعني شغلك بيكون كله في الشتاء وهو افضل للبناء
ليه اقولك كمل الى البلاط ؟!
⬇️

لانك بالشكل هذا حطيت كل الاوزان بالبيت
1000 كيس اسمنت مع الرمل والماء حدود 50 طن والبلاط مع الرمل بقي خطوة اخيرة ركب خزان علوي وعبيه موية وقفل الابواب وخليها تتشطب وتهضم براحتها اربعة اشعر الى ستة اشهر صيف وبالوقت هذا فضي الموية من الخزان العلوي وعبيه مرة ثانية بالاسبوع مرتين

كذا تجهّز البيت للبوية وعلى بال مايجهز خليني اعلمك عن البلاط
بالنسبة للسطح البلاط ابيض يعكس الشمس
فيه نقطة مهمة ماتحدثت عنها :
طبعا عندك اصنصير وتبي تستفيد من السطح جلسه ولا حديقة لازم تحط المكيفات الاسبيلت على الجدار علشان المساحة مو تحط مكيف بوسط السطح !
كيف الطريقة ؟
⬇️

خلي جميع المكيفات بالغرف على الجدار الخارجي للبناية علشان تجي الماصورة على جدار السطح ،،
عندك مشكلة الصالة لازم تحط المكيف على الحدار الخارجي للبيت مو بالوسط لانك عذا حطيت المكيف بالوسط بيكون مكانه وسط السطح وكأنك يابو زيد ماغزيت وراحت عليك فايدة السطح !
انتبه لهالشي ⬆️ مهم

الماصورة اقصد ماصورة تمديد الاسبيلت من المكيف بالغرف للمكينة بالسطح

خلينا الفلة بعد البلاط واللياسة والحجر او كسر الرخام فترة الصيف 6 اشهر وتشطبت وهضمت وتمددت وتقلصت من البرد والحر وانت بالوقت هذا توفر وتلبس ثياب العام من التوفير وصاير جلدة عزتي لك لكن مابعد العسر الا يسر
تبدأ بالدهان واهم شي المعجون يكون نوع ممتاز مطاطي
اصبغ على نهاية الحر

بعد الدهان تجي فايدة الشباك الطويل،، راجع شكله في التغريدات السابقة ماراح يكلفك كثير باذن الله لانه ماعندك زيادة امتار المنيوم وخلي الرف داخلي مو خارجي زي الصورة وخلي الدريشة باللياسة بدون ميول لانها بتركب خارجيا
لاحظ الرف داخل الغرفة ⬇️

نجي للسراميك والبورسلان
عاد هذي على مزاجك :
الصالات كل ما صارت البلاطة كبيرة صارت اجمل اشوف قياس 160* 80 جميل جدا ولو حصلت أكبر افضل وبالنسبة للدور الارضي احرص على صبة النظافة ولاتحط رمل تحت البلاط لان النمل يبني فيه بيوت والحل ضع بحص زيرو لان النمل مايقدر يبني عليه

الابواب :
باب الفلة الخارجي انا اوديه لورش السيارات واضبغ فرن بأساس فرن ومعجون سيارات
صحيح اغلى لكن تضمن انه مايبهت ولا يصدي لانه عرضة للغسيل وعلى طاري غسيل الحوش حط التصريف عند مدخل البايكة وانتبه للميول علشان مايصير تجمع مياه
وفيه نقطة مهمة نسيتها ⬇️

دورات المياه اذا سألك السباك بتحط افرنجي قول ايه وحط كوع ريحة كو عادي بيقولك الافرنجي فيه قول حط كوع ريحة ولاتحط عربي لان فيه انواع افرنجي الان بنفس الوقت عربي تستخدم بالطريقتين بس لازم كوع الريحة لانه يحطه قبل صب الدور الاول فوق الخشب
والتصريف للماء خله ⬇️

خل غرفة التفتيش او التصريف بزاوية الحمام بالجهة المقابلة للباب لاتحطها بالنص واضبط الميول عليها لايصير تجمع ماء بالحمام لان البعض ينزل بلاط الحمام 5 سم علشان مايطلع لكن انت اذا ضبطت الميول بالزاوية المقابلة للباب ماراح يطلع الماء خارج الحمام وانت بالخيار تبي تنزل البلاط بكيفك

نرجع للابواب
انت بالخيار لكن دورات المياة لازم باب فيبر يعطي شكل الخشب او المنيوم وغالية شوي فالبعض يركب بي في سي وكان عليها مشكلة تبخير المواد الكيميائية مع حرارة 40ْ واعلى والان اظن عدلوا هالمشكلة ضد الماء بس انتبه ترى مقاساتها محدودة بالطول والعرض يعني ⬇️

يعني اذا بتركبها للحمام اعمل حسابك تاخذ المقاس المطلوب من الشركة اثناء البناء علشان الصبة اللي فوق الباب علشان المقاول يضع لك نفس المقاس لان عندك ارتفاع بالسقف يجب تاخذه بعين الاعتبار وبيلخبط المقاول ،،

ابواب الغرف افضل خشب سويدي عليه قشرة سنديان طبعا السنديان كباب غالي واعمل هالحركة علشان اوفر لانك بالمرحلة هذي تحّرج على فانايلك وسراويلك من الدجة 🤤
عيب الخشب انه يتمدد بالشتاء فلازم يجي يوزن الباب في الشتاء مرة ثانية وفيه نقطة مهمة ⬇️

اذا بتصبغ الباب فاتح او غامق ابيض او بني مثلا عليك بقشرة السنديان لانه يجي الخشب فاتح عكس خشب المقنو او قشرة المقنو تجي غامقة فلو صبغتها ابيض مع الوقت تصير غامقة
فانتبه لهالشي
المقنو خشب غامق
السنديان فاتح

حدد مكان الفرن علشان تحط الفتحة 30*30 والاغلب يحط 20*20 علشان الشفاط ارخص له بعدين
والفرق كله 200 ريال لكن 30*30 افضل شفط
وحط فيش للانارة وفيش كهرب وفيش ديمر (اللي يقصر ويزود المروحة) يسار او يمين الفرن ،

بلاط الحوش :
اذا صبيت الحوش خير وبركة ماصبيته صب مدخل السيارة علشان مايتكسر بلاطك (ضروري)
وضع بلاط سميك 12 سم واكثر
على بحص زيرو علشان النمل مايبني بيت بشرط مايكون عليه ثقل سيارة
اماكن الثقل لازم صبة انتبه

نسيت الجبس على الجدران
لاتحط جبس ،، الان يقدرون يرسمون لك بالاسمنت شكل ديكورات الجبس اقوى بكثير وكل ماعليك تصبغه لون اف وايت لون الجبس وكأنك مركب جبس وارخص لك بواجد من الجبس

بالنسبة اثناء التلييس خلي الزوايا (الحروف) الخارجية مشطوفة لايخليها زاوية 90 علشان لو انضربت ماتنثلم الزاوية وتنكسر لانها ضغيفة .. والبعض حتى الحرف الداخلي لزاوية الغرفة يخليها دائرية واشوفها حركة زينة بس البعض مايبغاها علشان دولاب الخشب

فيه اشياء كثيرة وتحتاج لتذكر وبصراحة اتعبني التفكير وتجميع المعلومات فراح اكمل في وقت لاحق ان شاء الله
كل ماتذكرت شي مهم ابغدي هالثريد
كل عام وانتم بخير
خلي واحد ياخذ نصايحي ولايعزمني ببيته 😡

فيه فكرة يحط خزان ارضي صغير لتصريف موية المكيفات
مع الوقت يتعبى ويستفيد منه غسيل حوش ولا سيارة ممكن تحطها اذا رغبت

الملحق الخارجي لايكون بابه على الحوش مباشرة
يعني اول ماتدخل للملحق من الباب الخارجي تقابل سيب يوديك لدورة المياه والمغاسل ويمين او يسار مدخل الملحق
ليه ؟
علشان الغبار ولازم ترفع الملحق اقل شي درجة
يعني اذا قفلت الباب ماعاد يدخل الغبار للملحق ولا للحمام

تنبيه :
اي تغريدة بالثريد تمر عليك فيها ردود ثانية ادخل عليها لأن فيها شرح واضافة

جاني سؤال مهم عن المشرف على البناء
اذا هو راعي خبرة ويخاف الله ويوقف على البناء يمر يوميا تراه بيوفر عليك ويستحق كل ريال ياخذه
أما اذا هو يخلص عمارتك بالتلفون ولايوقف تراه خسارة لأن العمال لازم توقف عليهم بنفسك والا بيشتغلون أي كلام فنصيحتي للمشرف اتق الله وحلل ماتأخذه

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد