الفترة اللي فاتت كنت عامل جولة انترفيوهات صغيرة عشان كنت بنقل من شغلي وكنت حابب أكتب شوية ملاحظات كدا عن حال سوق التيك دلوقتي لعل وعسى حد يستفاد منها.
مبدئيًا كلامي هيكون عن سوق شمال غرب أوروبا، وتحديدًا هولندا وألمانيا عشان دا السوق اللي شغال وكنت بانترفيو فيه.
مبدئيًا كلامي هيكون عن سوق شمال غرب أوروبا، وتحديدًا هولندا وألمانيا عشان دا السوق اللي شغال وكنت بانترفيو فيه.
أحب أأكد ان كل دي ملاحظات شخصية بحتة من غير أي دراسات احصائية أو أي مصادر تدعمها. هي مجرد ملاحظات نتجت من اللي أنا ودايرتي الصغيرة شوفناه في السوق. فياريت تأخدوا الكلام دا with a grain of salt ومحدش يأخد أي قرارت مصيرية بناءً عليه غير لما يكون عمل بحثه واتأكد من كل حاجة.
في البداية حابب أقول ان السوق عطشان دلوقتي وفيه فرق شاسع بين بعض المرتبات اللي هتلاقوها على مواقع زي Glassdoor وPayscale وبين اللي موجود على أرض الواقع دلوقتي في كتير من الشركات. والنسبة مش قليلة يعني احنا بنتكلم في فرق شوفته بيوصل لـ 30-40% لنفس البوزيشنز في شركات مختلفة.
خلينا في البداية نحاول نقسم الشركات في السوق لـ٣ أنواع عشان نعرف نقارن بينهم ونحاول نفهم الفجوة بتاعت المرتبات الكبيرة دي جت منين. هنبدأ بأول نوع من الشركات واللي هي الشركات المحلية اللي بتتنافس في اسواقها المحلية بس.
الشركات المحلية دي ممكن نضم معاها السوبرماركتس الصغيرة والسوفت وير هاوسس اللي لسه بيدأوا ومواقع التجارة الالكترونية الصغيرة والشركات الناشئة اللي لسه بتبدأ ومفيش معاها سيولة كافية وغيرهم الكتير. في الغالب دول مابيبقوش مهتميين انهم يشغلوا أكتر الناس كفاءة وبيرضوا بقليلهم من الآخر.
المؤسسات دي بيكون الـBase Salaries بتاعتهم قليلة جدًا، هتلاقيهم بيدفعولك أقل مرتب يخليهم يقدروا يجيبوك بيه البلد ويعرفوا يعملوا Sponsorship للـVisa بتاعتك.
دي الشركات اللي هتلاقيها بتدفع بين 40 لـ50 ودايمًا بيركزوا على الناس اللي عمرهم أقل من 30 (في هولندا) عشان يدفعوا أقل، ولو انت عمرك أكتر من 30 -في الغالب سينيور- فالرينج هيزيد شوية وهيكون بين 55 - 65 مثلًا.
النوع التاني من الشركات هي الشركات المحلية ولكن بتتنافس في السوق العالمي أو شركات أجنبية (أمريكية أوUK) ولكن ليها فروع في أوروبا. والنوع دا بيشمل برضه الشركات الناشئة الكبيرة اللي معاها فاند كبير وليها وزنها في السوق زي MessageBird أو Miro مثلًا.
وبرضه بيشمل الشركات القديمة في السوق وليها وزنها زي TomTom مثلًا والبنوك الكبيرة برضه. الشركات دي المرتبات فيها بتكون أعلى بنسبة كويسة لو قارناها بالنوع الأول.
أنا معظم اللي أعرفهم شغالين في الفئة دي من الشركات وبيتنقلوا بينهم تقريبًا -ساعات بحس انهم بيبدلوا مع بعض والله :D- مرتبات السينيورز والميد هنا معقولة شوية وبتلعب بين 75 لـ100 وانت وشطارتك بقى.
خلال الشهرين اللي فاتوا بس فيه ٣ ديفيلوبز من دايرتي الصغيرة غيروا شركاتهم وكلهم بمرتبات تتمحور حوالين الـ 90 بزيادة حوالي 30% من مرتباتهم القديمة ودي أعتقد بمعايير اوروبا زيادة عظيمة يعني!
نيجي بقى للنوع التالت والآخير في قصتنا النهارده وهم الـBig Tech. ودي الشركات الكبيرة اللي بتتنافس عالميًا ومحليًا وليهم مقرات في نص الكوكب اولريدي ودي بتضم شركات زي الـ FAANG و شركات تانية زي Booking و Stripe وGitHub و Uber والخ.
الصراحة انا ماعملتش انترفيوهات في الشركات دي وماعنديش تجربة بشكل شخصي عشان اقدر احدد الرينج بتاعم بس الرينج اللي سمعته أكتر من مرة من اشخاص مختلفة للسينيورز كان بيلعب حوالين الـ120+ وانت طالع بالإضافة للـ bonus و equity وكدا. ياريت لو حد عنده تصحيح للمعلومة يقولنا يعني.
أنا كاتب دا ليه؟ عشان أنا لسه بشوف لغاية دلوقتي ناس بتسافر على مرتبات وحشة جدًا مقارنة باللي في السوق وبيبقوا سايبين فلوس كتير على الترابيزة هم أولى بيها يعني في ظل غلاء الأسعار اللي احنا عايشين فيه دا. لو حد من اصحابنا الأكثر خبرة عنده أي تعليق أو تعديل اتمنى انه يفيدنا بيه.
وأخيرًا كل الارقام المذكورة هي بالألف وطبعًا قبل خصم الضرائب اللي بتوصل لـ٥٠٪ عشان الناس اللي هيصدعوا دماغ ابونا بس. ودمتم.
جاري تحميل الاقتراحات...