صديقي بيشاورلي على ناس ماشيين جوا المول وبيقولي.. الناس اللي زي دول بيصعبوا عليا.. يا ترى حياتهم ماشية إزاي؟! بصيت ناحيتهم وجالي حالة من الذهول! صديقي أخد باله وسألني.. هو أنت تعرفهم ولا إيه؟ أنا: أيوا.. معرفة قديمة أوي! روحنا أكلنا وقعدنا على القهوة..
قلت لصديقي.. أنا عارف انك عايز تعرف أنا ليه تنحت لما شوفت الناس اللي شاورتلي عليهم.. هاحكيلك القصة.. الحكاية بدأت لما كنا في تانية ثانوي.. مجموعة أصحاب في النادي رايحين يلعبوا ماتش كورة... واحد من أصدقائنا طلع يعرف فلان من الفرقة اللي بتلعب قدامنا..
وبعد كام شهر فلان ده دخل معانا في الشلة وأصبح من الناس المقربين ليا.. وفي يوم لقيته جايلي وطاير من الفرح.. قابل واحدة وحبها وقرر يرتبط بيها.. كنا لسه صغيرين على الكلام ده.. فضلوا حوالي خمس سنين مرتبطين، وسنتين خطوبة وبعدها اتجوزوا.. بعد الجواز اختفى تماما وماسمعتش عنه فترة طويلة
لغاية لما كلمني في يوم بعد نص الليل وطلب يقابلني عشان فيه موضوع ما يستحملش يستنى.. نزلنا ولقيت عينيه حمرا وصوته رايح.. حكالي عن خلافات كبيرة بسبب عدم الخلفة.. اتفقوا على الطلاق لكن قبل ما يتطلقوا بكام يوم مراته تعبت ودخلت المستشفى، وبعد الكشف عليها اتضح انها حامل..
ورجعت المياه لمجاريها وكان الخبر بمثابة قبلة الحياة لعلاقتهم.. عاشوا أوقات جميلة لغاية لما فلانة خلفت البنت الأمورة وسموها سارة.. كانت حياتهم كلها في سارة، وضحكة سارة.. اتفرج عليهم و هم بيلعبوا معاها وبيصوروا كل حركة بتعملها.. كبرت سارة وبقى عندها سنتين..
وفي يوم جالهم تليفون من الحضانة، الحقوا بنتكم تعبانة وبترجع بشكل مستمر.. اخدوها على المستشفى والحالة تدهورت بسرعة وطلع فيه نزيف في المخ! ماتت سارة واخدت معها روح أبوها وفرحة أمها.. فلان وفلانة رجعوا لنقطة الصفر.. مابقاش فيه حاجة بينهم تخليهم يقعدوا مع بعض غير فتافيت ذكريات سارة!
قضوا مع بعض شهور من الحزن والبكاء والعتاب واللوم.. مين كان لازم ياخد باله من البنت، ومين السبب في موتها.. وفي يوم لقيت التليفون بيرن، ونزلت مع فلان في نص الليل وكأن الزمن بيعيد نفسه.. حكالي عن كل حاجة حصلت بعد موت سارة.. التفاصيل كانت مؤلمة جدا.. كان شايل جواه جبال هموم..
لكن يوميها أنا سمعته ورفضت أوافقه على فكرة الطلاق اللي كانت مسيطرة عليه... قلتله يا أخي افتكر أول مرة ربنا بعتلكم سارة عشان تقعدوا مع بعض... وما ينفعش تزعل كده لأن اللي بعتها هو اللي استردها تاني.. فكر بهدوء ومن غير انفعال.. مراتك ست كويسة ومحترمة..
بعد القعدة دي، علاقتهم بدأت تتصلح، وحاولوا يخلفوا تاني لكن ربنا ما رزقهمش.. فلان كان غضبان من اللي خلقه وبيتهم فلانة ان المشكلة فيها! وقبل ما يوصلوا لنقطة اللا عودة.. فلانة عرفت انها حامل تاني.. الدنيا بقت أحسن، وشالها على راسه طول فترة الحمل.. واتصالح مع اللي خلقه بعد فترة خصام
حسيت ان الحياة بدأت تبتسملهم من تاني.. جاتلهم بنت وسموها فرحة! وكل ما كانت فرحة بتقرب من سن أختها كل ما كان فلان وفلانة بيقلقوا والخوف بيسيطر عليهم.. لدرجة ان فلانة سابت شغلها عشان ما تدخلش بنتها الحضانة.. كانوا خايفين عليها تواجه نفس مصير سارة..
فلان كان حاسبها باليوم والساعة.. وفي يوم كلمني وقالي ان فاضلها ساعة وتبقى في سن أختها سارة.. كان صوته بيترعش.. و فات اليوم والبنت عاشت.. وقرر فلان يعمل حفلة كبيرة عشان فرحة عاشت.. الناس كلهم كانوا موجودين.. عزموا العيلة والأصحاب والجيران والأغراب.. فرحة كانت لابسة فستان أبيض جميل
اخدت فلان على جنب وقلتله.. ياريت بعد النهاردة تبطل قلق وتوتر عشان بنتك تعيش في جو هادي.. ابتسم وشوفت في عينيه نفس الدموع التايهة اللي لسه بتبحث عن سارة.. الجرح كان لسه مفتوح رغم فرحتهم بفرحة! كان عندي معاه ميعاد بعد أسبوع عشان نجدد رخصة العربية سوا..
قعدت مستنيه وأكلم فيه وما يردش.. قلت أكيد راحت عليه نومة.. بعد ساعتين فلانة كلمتني وقالتلي انه وقع في البيت وراح المستشفى.. بعد الفحوصات اتضح ان عنده ورم في المخ..وكانت المناحة من فلانة اللي كانت بتتمرمغ في الأرض.. وللأسف كانت نتيجة التحاليل ان الورم خبيث وفي مرحلة متأخرة..
كل الأطباء رفضوا يعملوله جراحة لأن فرصة النجاح أقل من ١٠% ... نصحيه ياخد كيماوي عشان يعطل تطور المرض.. لكن التدهور كان سريع و أخر دكتور راحله قال ان فاضلله شهور.. روحتله زيارة في البيت وكان قاعد على الكنبة وشايل فرحة على حجره.. قعدنا نتكلم كتير ومراته استأذنت ودخلت تنام..
لما الفجر شقشق سألته سؤال قبل ما أمشي.. تعمل إيه لو ربنا أعطاك عُمر وشفاك من المرض؟! طلعت منه ضحكة مكتومة واختفت بسرعة وظهر مكانها وش مهموم وحزين..اتنهد وقال..انا عرفت قيمة الحياة لما قربت من الموت، وعرفت قيمة الناس لما حسيت اني مش قاعد معاهم كتير!تركته على الكنبة وسمعت صوت بكاءه
قفلت الباب ونزلت ألف في الشوارع، باحاول الاقي نفسي وسط زحمة الأحزان.. حالته كانت بتتأخر كل يوم عن التاني.. الورم كان ضاغط على أماكن في المخ وبيسبب تلف في بعض الوظائف.. كنا باعتين الأشعة لكذا دكتور في بلاد كتير، وكان الرفض هو عنوان ردهم عليه.. كله خايف يعمله العملية
واحد بس رد وقاله خد فيزا وتعالى بسرعة.. نسبة نجاح العملية كانت ٥%.. لحظة الوداع في المطار كانت صعبة.. كنت شبه متأكد اني مش هاشوفه تاني.. المرة دي جالي تليفون من والده اللي كان بيطمنني بعد العملية، ماكنتش مصدق.. طلبته مرة تانية وتالتة عشان اسمع نفس الخبر.. ربنا كتبله عُمر جديد..
لما رجع من السفر وبعد الإستقبال وفرحة كل اللي بيحبوه برجوعه بالسلامة.. سألته نفس السؤال.. هاتعمل إيه في حياتك بعد ما ربنا شفاك؟! المرة دي جاوب عليا بدموع كتير وضحك وحضنني من غير ما يتكلم.. اكتر واحدة وقفت جنبه في أزمته كانت فلانة مراته.. ست ب ١٠٠ راجل
فرحة كبرت وراحت المدرسة، وفلان نجح في شغله واترقى ومرتبه زاد الضعفين.. وجالي في يوم وعينيه بتبرق.. وقالي.. أنا باحب! حكالي انه واقع في غرام واحدة معاه في الشغل.. بنت أصغر منه ب ١٧ سنة.. كانت اكتر مرة انفعل عليه وسمعته كلام مش ظريف وسبته ومشيت..
قطع معايا فترة طويلة.. وسمعت انه اتجوز البنت وطلق فلانة وبيتخانق معاها على فرحة في المحاكم.. لكن بعد فترة البنت اللي متجوزها ضحكت عليه وبيعته اللي وراه واللي قدامه بالتوكيلات اللي عملهالها.. ماسمعتش عنه تاني.. حاولت أوصل له لكن مافيش.. النهاردة أول مرة أشوفه فيها
الموضوع عدى عليه سنين.. اللي ماشية معاه دي فلانة.. اللي بتزق الكرسي المتحرك اللي هو قاعد عليه دي فرحة بنته! الست دي طلعت أصيلة وهو ما يستاهلهاش.. عرفته من الحتة الفاضية اللي في راسه مكان العملية.. عرفت بعدين ان مراته رجعتله بعد ما سمعت ان جاتله جلطة بعد ما خسر كل فلوسه
فيه ستات ولاد أصول.. يمكن البعض يقول عليهم منبطحين.. لكن معدنهم الأصيل يبان في وقت الشدة حتى لو كان زوجهم ناكر للجميل.. مش عارف هي بتعمل كده ليه.. لكني احترمتها وحبيت احكيلكم حكايتها!
جاري تحميل الاقتراحات...