زي النهاردة من سنة اتكلمنا عن ازاي الـ Cookies بتشتغل عشان يقدر المعلنين انهم يبعتولك الاعلان المناسب. النهاردة هنتكلم عن تطور مهم في الموضوع ده أسمه IoB - Internet of Behaviors - أو الانترنت السلوكي!
الهرم المعرفي بيدأ من البيانات المجردة اللي بتعبر عن حقائق. بيتطور الأمر في تحليل البيانات للمعلومات اللي ممكن تفيدك أو تفيد الطرف اللي بيحلل.مع تضخم المعلومات المجمعة بشكل ضخم بيبتدي نصل للمعرفة ومن المعرفة نقدر نستخلص الحكمة. الانترنت السلوكي هدفه "الحكمة". يعني أيه الكلام ده؟
اتفقنا أنه كل كليك، لايك، شير، موقع، رسالة، صورة، حاجة بتبحث عنها، فيديو بتتفرج عليه بتسمّع في نظام بيؤدي لأن المعلن يقدر يوصلك عشان يدفعك أنك تاخد قرار معين زي أنك تشتري منتج أو خدمة مثلا. مع الـ IoT الأشياء نفسها بقت قادرة على جمع تفاعلاتك المختلفة بشكل ذاتي
قبل الـ IoT كان جمع البيانات بيحصل من خلال أن الـ User نفسه يتفاعل .. انت بتقرر تتفرج أو تعمل لايك وهكذا.. بعد الـ IoT الشيء نفسه بيجمع بيانات بدون تدخلك. لو عندك Alexa مثلا انت بتديها الحق أنك تبقا كتاب مفتوح قدامها وأي شيء متوصل بالانترنت بتعدي جنبه قادر بدرجة ما على نفس الشيء.
هنا مثلا تطبيق لطيف للموضوع وهو الـ Billboards الرقمية اللي بتغير الاعلان بتاعها حسب نوعية الناس اللي ماشية بالعربيات في الشارع. منطقي بالـ GPS ومع العربيات الذكية نقدر نطلع اعلان للي على كوبري اكتوبر الصبح رايحين يخلصوا ورق في المجمع غير اللي راجعين من الزمالك بليل 😁
الانترنت السلوكي IoB هو تطور في عملية تحليل المعلومات ودفعك لاتخاذ قرار معين بشراء خدمة أو منتج من خلال اعلان لأننا نصل لتعديل سلوك المستخدم نفسه بشكل عام تجاه تفاعله مع الأشياء والمنتجات باستخدام الذكاء الاصطناعي والتحليل وهكذا
في الـ IoB اللي بيحلل المعلومات مش بس خبراء التسويق عشان يقدروا يطلعوا اعلانات ومحتوى يعمل Conversion أو يؤدي لأن المستخدم ياخد Action معين..لأ.. اللي بيحلل علماء علم نفس هدفهم تعديل سلوك المستخدم بحيث يعدل من نمط يومه أو معتقده لخدمة مقدم الخدمة أو المنتج من خلال مجموعة اساليب
مثال للتبسيط: كل رمضان عندنا انواع جديدة للكنافة. لو الـ AI عرف أنك بتنزل تشتري الكنافة سادة بتاعة زمان كتير هيبتدي يديك اعلانات كنافة أقرب للي انت بتاكلها عشان تشتري..ده عارفينه.الـ IoB هو اكتشاف أنك شخص عندك نوستالجيا تمانيناتي لأنك رجعت شغلت فوازير فطوطة ويحاول يعالجك منها😅
يعني حاولت أديكم فكرة مبسطة عن الـ IoB للي مهتم ممكن يبحث عنها اكتر طبعا وكل سنة وانتم طيبين :)
جاري تحميل الاقتراحات...