حكاية السفاح محمود امين سليمان باختصار وحكاية نجيب محفوظ :
الحكاية بدات تنتشر عام 1960 . كان محمود امين سليمان في السجن بسبب جرايم سرقة اكثر من مرة وكان بيعيش في اسكندرية ولما السجن طول مرة ولقي المحامي بتاعه مش بيستعجل الحكم شك ان فيه علاقة بينه وبين مراته
الحكاية بدات تنتشر عام 1960 . كان محمود امين سليمان في السجن بسبب جرايم سرقة اكثر من مرة وكان بيعيش في اسكندرية ولما السجن طول مرة ولقي المحامي بتاعه مش بيستعجل الحكم شك ان فيه علاقة بينه وبين مراته
مراته كان اسمها نوال وكان بيدلعها باسم بطة والمحامي كان اسمه بدر الدين ايوب . هرب محمود من السجن واطلق الرصاص على مراته وكمان علي المحامي . مراته ماماتتش ولا المحامي . الرصاصة طاشت . هرب علي القاهرة وحاول يسرق فيها والجرايد وبالذات الاخبار تابعته وزودت انه هدد فنانين زي ام كلثوم
وتحية كارييكا ومحمد عبد الوهاب وبأه موضوع للجرنال كل يوم . واتقال كمان انه اتصل بعد الناصر وطلب منه يسيبه يروح يقتل حاكم العراق عبد الكريم قاسم . هو كان لص مشهور ويقال انه بعد ماخرج من السجن اول مرة راح بيروت وهناك اتحكم عليه بالسجن بسبب السرقة ورجع علي مصر . المهم زادت الحكايات
وهو الحقيقة اللي خلاه اتشهر مش الكلام بس لكن رصاصاته الطايشة كانت بتصيب ناس تانية. المهم في النهاية اتقتل في القاهرة في صحراء حلوان والاخبار عملت مانشيت"مصرع السفاح" وتحته "عبد الناصر في باكستان" فاتقرا علي بعضه فكأن الكلام كان عن عبدالناصر اللي امم بعدها الاخبار وسجن مصطفي امين
بسبب قصية تخابر مع اميركا . ما علينا من دا كله . اللي يخصني اني كنت في مدرسة طاهر بك الاعدادية وفي يوم طلعونا بدري نروح كلنا . ايه المناسبة؟ قالوا السفاح مر قدام المدرسة في شارع المكس علي حصان فخافوا علينا . مشينا نضحك ونقول طيب خلونا جوة .
مكتب المحامي بدر الدين ايوب دا كان في محطة مصر في شارع ايزيس تحته محل سمك كنت غاوي اتعشي فيه لما ادخل السينما من 6 - 9 قبل ما اروح وابص علة اليافطة بتاعته. فضلت علي كدا سنين افتكر السفاح . طيب ايه اللي يخص نجيب محفوظ ؟
نجيب محفوظ خد من الرواية فكرة الرصاص الطائش وعمل اسباب تانية للسفاح منه تعرفه علي مثقفين منهم كمال الشناوي لاقاهم مش زي ماقالوا ليه . لاقاهم انتهازيين بعد ماعلموه ياخد حقه بايده . نجيب محفوظ ركز علي ان كل الرصاص طايش . ليه . كانت رسالة خفية ان العمل الفردي ما بيجيبش نتيجة
وكان كانه بيقول لعبد الناصر ان اللي بتعمله دا لوحدك مش حينفع ولازم عمل جماعي يعني بديموقراطية وكلام محفوظ طلع صح . اتهزمنا سنة 67 والسادات خلص علي كل اللي عمله عبد الناصر في الاقتصاد . طبعا المعني دا ماتفهمش ساعتها والرواية اتنشرت مسلسلة في الاهرام سنة 1961 وبعدين اتعملت فيلم .
خلاص كدا . الله يرحم الجميع . صباح الفل .
نسيت اقول ان الرواية هي "اللص والكلاب" .
جاري تحميل الاقتراحات...