من بريد المتابعين "ليه الستارت أبس الناجحة بتسجل مقرها برة مصر وبتخلى مصر تابعة مش المقر الرئيسى" ، بدل ما أرد برايفت ههبد رأيى هنا .... ثريد.
الترند دة فى رأيى مش جديد ، هو بيتعمل من زمان بس كان الإتجاه أكتر ناحية British Virgin Islands وأمريكا (Instabug) ، ومؤخرا دبى (سويفل) وهولندا (حالا) ظاهرين بقوة.
الحقيقة موضوع الcorporate structure دة ليه ناس حرفيا دى شغلتهم ، إنهم على أساس نشاط الشركة وبلدها وشوية حاجات تانية يحددو إيه أحسن طريقة (المقر فين ، النشاط فين ، الموظفين فين ، الضرايب ... وهكذا) ... مع ذلك فى شوية حاجات تعتبر بديهيات.
نيجى بقى للستارت أبس ، أكبر سبب فى رأيى هو جذب استثمارات أجنبية ... لو خدنا بالنا هنلاقى إن أغلب الشركات دى جذبت استثمارات من برة مصر.
المستثمر اﻷجنبى بيهمه إنه يستثمر فلوسه فى بيئة سمعتها إنها 1) صالحة قانونيا يقدر يضمن فيها إن مفيش تلاعب وحقه مضمون والعملية بتمشى بسرعة. 2) الضرايب قليلة وقواعدها واضحة 3) دخول وخروج الفلوس سهل وواضح.
للأسف مصر لا القواعد واضحة ولا المواضيع بتمشى بسرعة ولا حركة الفلوس سهلة. دة غير إن أى حد أجنبى هيجوجل عن بيئة البيزنس فى مصر هيشوف حوكمة الاقتصاد والشركات ماشية ازاى هيطلع يجرى.
وبالتالى تسجيل المقر برة بيضمن لو حصل مشكلة فالإتفاقات كلها فى بلد يقدر يتعامل ويقاضو بعض فيها وهتكون بيئة مناسبة للأجانب وهيبقى واثق فى السيستم.
كمان لو فى استحواذ من شركة تانية فالأسهم كلها فى هولندا أو أى حتة تخلى محدش يقف فى الdeal وكل واحد معروف ليه كام وعليه ضرايب كام وهياخد فلوسه إمتى وإزاى ومفيش مفاجئات والقصص الجميلة بتاعتنا.
فى نقطة كمان سمعتها من كذا حد ، إن تسجيل شركة برة مصر وتخلى مصر مجرد مكتب محلى بيبقى بيروقراطيا أسهل من إن المقر الرئيسي يبقى فى مصر.
طبعا دة مش معناه إن الشركة منعزلة تماما عن البيئة المصرية ، لو بتعمل أغلب الفلوس فى مصر دة مازال هيخليك متعامل بشدة مع البيروقراطية المصرية ، بس مازال ك corporate structure ممكن يبقى أحسن ضريبيا وحوكميا وجذب استثمارات أجنبية إن الHQ يبقى برة.
طبعا الثريد دة هيجيبلى صداع من حماة الوطن عن عظمة البيروقراطية المصرية وأنا بجد مش قادر ، لو معملتش شركة فى مصر وبرة مصر (أنا عملت شركة فى مصر وشركتين فى ألمانيا) سيبنى فى حالى أرجوك. واللى عنده معلومة مفيدة/تصحيح يضيفها وهعملها ريتويت. شكرا.
جاري تحميل الاقتراحات...