من المواقف اللي حصلتلي في السعودية اول ما جيت (٢٠١١/١٤٣٢):
١- اول صيدلية دخلتها كانت في حي النسيم فتحت الباب لقيت صوت مجهول المصدر بيقول " اذكر الله" قلت لا اله الا الله (بس من الخوف)، عرفت بعد كده انه تنبيه ان في حد دخل، ده طبعا بعد ماخرجت ولقيت نفس الصوت بيقول "صلِ على محمد"
١- اول صيدلية دخلتها كانت في حي النسيم فتحت الباب لقيت صوت مجهول المصدر بيقول " اذكر الله" قلت لا اله الا الله (بس من الخوف)، عرفت بعد كده انه تنبيه ان في حد دخل، ده طبعا بعد ماخرجت ولقيت نفس الصوت بيقول "صلِ على محمد"
٢- كنت حامل هم الجنسيات الهندية والباكستانية والبنجالية قبل ماجي ومش عارف هكلمهم عربي ولا انجليزي لحد ماعرفت انهم بيتكلموا لغة تانية خالص اتعلموها من السعوديين وبقيت ماهر في اني اقول " انت مافي معلوم" و"سوا سوا" في اي حوار حتى لو هما مش سوا سوا ولا حاجة يا "صديق"
٣- لفت نظري ان معظم البيوت مفيهاش بلكونات وده كانت حاجة غريبة بالنسبالي واحنا كمصريين عندنا البلكونة ده حاجة مقدسة جدا، انا ممكن اقضي نص يومي في البلكونة، انا مرة نمت في البلكونة من بالليل ومصحتش الا لما الشمس ضربت في نفوخي
٤- اصعب لحظة كنت بشيل همها هي لحظة نزولي من التاكسي وانا رايح أي مكان قبل ماجيب عربية، لأني كنت لابس نضارة وقتها وكنا في الصيف، فمجرد مابنزل الرطوبة بتعمل طبقة عازلة على النضارة بتخليني مبعرفش حتى اعدي الشارع
٥- جالي موظف سعودي في اول ايامي وفضل يتكلم معايا عن مصر، بس نص كلامه مكنتش فاهمه، لأن اللهجة كانت جنوبية، بس كنت بهز راسي وخلاص لحد ماسألني سؤال حسيت بيه انه بيختبرني "ليش ماتقهوينا يادكتور؟" رحت قايله "ليش؟" ومستني منه اجابه، فقالي يعني شربنا قهوة، وبدأ يشك ففهمي لكل اللي فات
٦- أول ٣ سنين كانت اجازة نهاية الأسبوع خميس وجمعة مش جمعة وسبت فضلت سنتين و١١ شهر انام الاربع بدري واصحى الخميس بدري لحد ماتأقلمت فغيروا الاجازة لجمعة وسبت
٧- مكنتش حامل هم استخراج رخصة السواقة (بما اني راجل بسوق من ٢٠ سنة وفمصر وده اصعب بلد ممكن تسوق فيها فكنت شوماخر أوي في نفسي) دخلت أول مرة على عربية كامري وسقطت
٨- في هنا حب وتقدير غير طبيعي للأي فون وميرندا حمضيات والبيك والفمتو في رمضان وتويتر لدرجة ان تذكرة جدة القاهرة جدة بالنسبالي بمثابة تويتر فيس بوك تويتر
٩- عندنا في مصر بعد صلاة الجماعة بنسلم على بعض ونقول "حرمًا" كدعوة مننا لبعض اننا نصلي في الحرم، أول صلاة ليا في الحرم سلمت على اللي جنبي وقلتله حرمًا، ضحك وقالي هنروح فين تاني
١٠- كنت مرة بشرح لطلبة على جهاز تعقيم وحبيت اقرب بمثال فقولتلهم ده عامل زي "حلة" الضغط، وفضلت اهري نص ساعة وحسيتهم متنحين قلت جايز مش فاهمين طلعوا مش عارفين اصلا يعني ايه حلة فبقيت اقول من ساعتها قِدر
١١- قابلت مرة طالب خارج من اختبار فبقوله عملت ايه يابني؟ قالي "جبت العيد يا دكتور" وده كان مصطلح أول مرة اسمعه فمبقتش عارف يعني كويس ولا وحش خصوصا انه كان بيضحك فاستنتجت انها حاجة حلوة، المحاضرة اللي بعديها بيسألوني كيف الاختبار حيكون؟ قلتلهم متقلقوش هتجيبوا العيد يا شباب
جاري تحميل الاقتراحات...