أنا لو ملحد ومقتنع أنه الدين ده اختراع بشري ما حأمانع أسخر منه أو أهاجمه عادي (ما أظن أعملها لأني حأكون مقتنع ده فعل ما عنده معنى، زي الوجود والأخلاق كله طبعا)، فحنك ليي تكونوا ملحدين وما تحترموا مشاعرنا الدينية ده كلام وضيع وهوان، شخصيا ما عندي تسامح مع زول ملحد بيعمل كده

أنا مسلم ومتيقن من نبوة محمد صلى الله عليه وسلم زي ما متيقن من وجودي ده، الناس البيسخروا ديل ربنا قال عنهم:
(زُیِّنَ لِلَّذِینَ كَفَرُوا۟ ٱلۡحَیَوٰةُ ٱلدُّنۡیَا وَیَسۡخَرُونَ مِنَ ٱلَّذِینَ ءَامَنُوا۟ۘ وَٱلَّذِینَ ٱتَّقَوۡا۟ فَوۡقَهُمۡ یَوۡمَ ٱلۡقِیَـٰمَةِۗ..)

فمحاولة الناس المستميتة أنها تكسب ودهم وتلتمس ليهم الأعذار وتحاول تكسب تسامحهم وحنك "عليكم الله ما تنبزوا ديننا" والبيستبطن موقف ضعف وخجل من الدين ده شي مقرف يفضّل المسلم ينأى عنه، زول مستعد يسخر من الدين وينبزه ببجاحة قدامي انا ما مستعد أتسامح مع القصة دي.

الخلاف هنا جوهري، يا أنت تنزل لي شروطه ولي اعتقاداته وعزته بكفره وتستقبل سخريته وهجومه على الدين، أو هو ينزل على شروطك ويحترم نفسه وفي لغته في الكلام عن الدين، بعد داك ممكن الناس تتعامل في حدود المشترك البشري، غير الانتباه للحقيقة دي حتظل تكون ذليل وبتحنسهم ما يتسقوا مع نفسهم.