لو حضرتك مش شايف ان فيه غلاء غير طبيعي في المعيشة، و إن قفزة الدولار هاتتعب كل الناس اللي عايشين على رواتبهم أو معاش أو باليومية.. وعندك إصرار تتكلم عن الإنجازات في البلد وشايف أنها كفيلة تخلي كل واحد تعبان في حياته ينام يحلم بالعاصمة ويتغطى بالكباري ويتعشى بالكلام المعسول

ولو شايف ان أي شخص طبيعي بيشتكي أو قلقان على حاله وحال أسرته يبقى شخص خاين وعميل وعايز يقلب الدنيا.. لو شايف ان شكوى المواطن نوع من نكران الجميل.. وشايف أنه لازم يحط جزمة في بوقه ويسكت.. يبقى أكيد حضرتك من طبقة الميليادرات أو مش عايز هنا أو شخص وهمي تابع للجان

لأنك لو كنت عايش على أرض الواقع، مش هاتتعامل مع الأزمة الحالية بهذا القدر من الاستخفاف والتهكم والهجوم على الناس اللي يادوبك قادرين يصمدوا عشان يعرفوا يعيشوا! السلبية مش مطلوبة.. لكن الواقعية مهمة جدا في الأزمات.. وفي النهاية، لازم نعرف أن الدايرة مقفولة..

يعني.. المواطن اللي بيدفع الضرائب والرسوم ومصاريف المدارس وغيره.. هو المستهلك.. لو المواطن ضرب تفليسة، هايبقى فيه ركود وكله هايخسر.. لو الحكومة ما اخدتش إجراء فوري في موضوع غلاء الأسعار، التوابع هاتكون وخيمة علينا جميعا! كلنا عايزين مصلحة البلد..

بنشتغل وبنسف التراب عشان نقدر نعيش.. لكن حدودنا هي حدود دخلنا ووقتنا ومجهودنا.. الأسعار ماشية بسرعة الصاروخ، والدخل ماشي بسرعة السلحفاة! أكيد فيه طريقة للتعامل مع جشع التجار اللي بيزودوا أسعار السلع بال ٥٠ و ال ١٠٠%!