أنا بقول إن الشعب الأمريكي لازم يبدأ يثور ضد النظام الأمريكي اللي عمومًا بيعيش أحرج لحظات حياته يعني .. أقصد جايز تكون مصالح الإدارة الأمريكية في إشعال الحرب .. لكن أنتم كشعب أمريكي تقبلوا إن بلدكم تبقى معدومة المصداقية وصاحبة تاريخ ملوث بالإنحيازات الظالمة؟
ماهي بسبب الإشعال ده العالم كله بيضطر حاليًا لمواجهة أعباء حرب هو برئ منها .. محدش حرض أوكرانيا إنها تنضم لحلف الناتو غير اللي أشعل الحرب . محدش خلى أوكرانيا ساحة قتال بين معسكرين غير اللي بدأ اللعب على الحدود الروسية .. وكل مرة بنكتشف حاجة جديدة يعني بتأكد إن عيب اللي بيحصل ده
والسياسة تدخل في الرياضة فجأة علشان بس مصالح كأداة إعلامية . بالضرورة أنا مش ميال لطرف على حساب الثاني .الأطراف ليهم عندي علاقات فيها الكويس وفيها المتحفظ عليه يعني . على الأقل لازم تعرفوا إن فيه رب هيحاسبكم كلكم على اللي بتعملوه . هيحاسبنا كلنا بطبيعة الحال أكيد .
الخلاصة .. إحنا عمومًا بسبب صراعكم المستفز ده هنواجه زيادات في أسعار السلع ، والمستغلين بقى هيطلعوا ويارب إحنا كشعب نقدر نتعامل بحكمة مع الحالة دي وربنا يوفقنا ونخرج من الأزمة بسلام زي ماخرج إقتصادنا بسلام نوعي من أزمة كوفيد ومتحوراته .. (لسه كوفيد موجود - خدوا حذركم)
عمومًا إحنا الحمد لله نعتبر في نعمة برغم كل شئ .. ده يكفي إن في مواقف زي دي بنلاقي الأخبار التافهة هي اللي بتبقى ترند ، ودي برغم من إنها حاجة فيها سلبيات لكن إيجابياتها إنها بتعبر لك عن إطمئنان داخلي . الموضوع مش محتاج إشغال "وبص للعصفورة" ، إحنا في عالم مفتوح أخباره بتوصلنا كلها
لذلك .. قضايانا لسه على الساحة .. سد أثيوبيا إحنا برضه مترقبين ودي قضيتنا الأولى .. ياريت نضيف على قائمة أعداءنا (المستغلين الجشعين) علشان دول داخليًا خطورتهم شبه خطورة البؤر الإرهابية .. ودول عمليًا الإعلام المعادي بيستغل جرائمهم علشان إثارة نوع من السخط العام .. ودي حركة متوقعة
ربنا يقوينا ويكرمنا من عنده ونعدي الفترة دي على خير .. إحنا على الطريق الصحيح وهنحتاج بس نشيل العوائق الخفيفة اللي بتحاول تسد علينا الطريق .. إحنا مرينا بالأسوأ وربنا أنقذنا ..
جاري تحميل الاقتراحات...