@RaniaKeiy بقيت ثريد امبارح عن كوريا الشمالية
الدولة مسئولة عن تشغيل كافة الشعب الكوري. الحد الأدنى للمرتبات في ٢٠٠٩ كان ١٠ يورو منهم ٣ يورو ضرايب و الباقي كوبونات. متقسمة على الاحتياجات الرئيسية اكل و شرب
كل مدينة في كوريا فيها مشروع صناعي او زراعي، المشروع ده بيكون مسئول عن صرف مرتبات لكل المسجلين في المدينة. المصنع اللي كنت مسئول عن دراسته كان على payroll وحدات الجيش و الشرطة و العمدة و فرقة المسرح و اساتذة المدارس بمجموع ٥٨٠٠ موظف و العاملين الفعليين كانوا ١٥٠ بس
السفر بين المدن ممنوع الا بتصريح اما السفر للخارج فمقصور على رجال الحزب من درجة معينة و في اضيق الحدود. و بعد بلوغ سن معين و درجة خنوع معينة تخليه فاهم و مقتنع ان مايساواش بصلة غير في بلده
التليفزيون قناتين بيعرضوا نفس البرامج بفاصل زمني نص ساعة و البرنامج ثابت. موسيقى عسكرية خطب الزعيم الجد و بعدين الزعيم الاب و بعدين اغاني وطنية و بعدين مسلسل عن عمال المناجم او اي طبقة مطحونة اكتر من المطحونين العاديين
نشرة الأخبار كلها اخبار محلية، الا في حالة حدوث مصيبة كبيرة في بلد تانية، فيتم تغطيتها باستفاضة عشان يوروا الشعب العز اللي همه عايشين فيه. فاكرين صخرة المقطم اللي وقعت على البيوت؟ اخدت عشر دقايق من وقت نشرة الاخبار. ده غير بئى نظرات الشفقة اللي كنت بشوفها في عيون المترجمين
عشان صعبان عليهم الاستهتار اللي فيه حكامنا
احلى حتة في البلد كلها مدينة في الشمال حقيقي مش فاكر اسمها. المدينة ديه فيها معبد كيم ايل سونج و هوة المعبد اللي بيتم تنصيب في الحكومات. بتقع على مشارف غابة و جبل و بتشتهر ببيع الاعشاب اللي ليها مفعول السحر و العسل الجبلي
من ضمن الاعشاب ديه عشبة بتتغلي و تتشرب ترجع الشعر الابيض اسود من تاني و تفرده. غير الجينسنج و ده ليه مفعول مرعب غير المضروب اللي هنا خالص. انا عسل النحل فمعلقة صغيرة ممكن تقعدك صاحي يومين و بطاقة كاملة
درجة الحرارة في الصيف في حدود ٣٠ ل ٣٥ و لكن الرطوبة مرعبة. في الشتا بتوصل ل ٤٠ بالسالب
الهندسة العكسية تعد اكتر حاجة متميزين فيها. و خاصة في الصناعات العسكرية. كفاية يتحصلوا على نموذج لاي حاجة عشان يفكوها حتة حتة بدقة كاملة و يعيدوا بنائها من تاني و بعد كدة يقلدوها
الأغاني الوطنية هناك تخليك تفتكر اغاني جونجر و غرانديزر و السماعات منتشرة في كل الشوارع و شغالة من تمانية ل تمانية. انا كنت بحس اني ماشي في دريم بارك. و رغم اني مش فاهم ولا كلمة بس المازيكة كانت بتعمل نوع الخدر و الاحساس بالراحة و الامان.
طبعاً الاغاني الوطنية ديه شغالة في كل مكان في المصنع و الباص و الفندق و في مكاتب قادة الحزب.
الترفيه الوحيد كان في المنطقة الدبلوماسية و ديه منطقة محظورة على الكوريين. فكنا بنخلص من الجواسيس على الباب و جواها بنلاقي سوبر ماركت نعرف نشتري منه و العياذ بالله بيبسي و عيش فينو و كمان فيه مطعم ممكن ناكل فيه اسباجتي
يوم الاحد، لو كنا شاطرين كانوا بيسمحولهم نروح السفارة الروسية الصبح عشان نلعب كورة و نحضر حفلة الشوي و بالليل ندخل الديسكو بتاع السفارة. انما لما كنا بنزعلهم كانوا بيختفوا من السبت بالليل و يسيبونا نخبط راسنا في الحيط.
مطار كوريا الدولي بيطلع منه خمس رحلات في الاسبوع ٢ للطيران الكوري و ديه اتوبيس شرق الدلتا انضف منها بقرون غير انه مش معترف بيها في اي حتة فالركود على مسئوليتك و الوجهة دايماً بكين
و رحلتين ل air china و الجهة برضه بكين و طيارة للخطوط اليابانية و وجهتها طوكيو
الجنسيات اللي بتدخل كوريا بصفة دورية و منتظمة الصينيين و الروس العائلات اليابانية اللي من اصل كوري و لا يزال ليهم اقارب في كوريا ضمن برنامج للم الشمل
العائلات اللي ليها فروع في كوريا الجنوبية ممكن يتقابلوا عند المنفذ الحدودي و ده لو كانت غزالة الزعيم رايقة
انتهى و اسف على الإطالة، لو حد ايه سؤال اكون سعيد لو قدرت اجاوبه
جاري تحميل الاقتراحات...