رتبها

هل كانت المجاعات تحدث في مصر القديمة عندما يأتي فيضان النيل منخفضا فقط ؟؟
الإجابة لأ .. #thread

جمال حمدان قال مصر هبة الفيضان و لولاه لكان النيل نهر هزيل يموت قبل أن يبلغ ساحل البحر المتوسط !
اسم Egypt هو التصحيف اليوناني للكلمة المصرية (إجب) بمعنى الماء الغزير (الفيضان)

منسوب الفيضان بتتحدد على أساسه الضرايب عشان كده كان في مقاييس للنيل تقريبا في كل محلة عمرانية و قبل الفيضان بيتم عمل مسح للأراضي الزراعية لأن علامات التقسيم هاتروح في المية و بعد إنحسار الفيضان يتم مسح الأرض تاني و وضع علامات التقسيم تاني

المقياس الرئيسي كان في منف على مر العصور و مقياس جزيرة إلفنتين هو مقياس البشارة .. اللي بيسبق مقياس منف بأسبوعين .. و على أساسه الناس بتفرح و تطمئن أو بتجزن و تجزع
12 ذراع = مجاعة
13 ذراع تجوع البلاد نسبيا
14 ذراع يجلب السرور
15 ذراع الأمان
16 ذراع الرفاهية

عشان كده تمثال النيل في متحف الفاتيكان محاط ب 16 طفل هم ال 16 ذراع بتوع الرفاهية .. الفيضان ال perfect .. لا مجاعة و لا تدمير بل رفاهية و فائض

في بحث عن المجاعات في العصر البطلمي و الروماني من واقع سجلات الضرايب و الخطابات الشخصية للناس اللي تم العثور عليه .. نتيجته أن أول مجاعة حصلت في العصر البطلمي كانت في عصر بطلميوس الثالث و كانت أشد قسوة في الدلت ..و سببها أنه إنشغل في حرب سوريا و أهمل شبكات الري

إضافة لأن الفيضان مكانش على أد كده وقتها كان لسه في بواقي عقل عند الأسرة البطلمية فالملك أعلن تنازل الدولة عن الضرايب و استورد قمح و سد العجز .. و نتيجة لذلك أصدر كهنة منف مرسوم شكر رسمي للملك يعرف بمرسوم كانوب و موجود في المتحف المصري في التحرير

المجاعة التانية كانت في عهد بطلميوس الخامس و لوحة المجاعة في جزيرة سهيل في أسوان بتحكي الحكاية في إطار أسطوري بيربط الأحداث وقتها بأحداث من عصر الملك زوسر

مع إستمرار سوء الإدارة وفساد الموظفين ظهر مايعرف ب (أناخوريسيس) و هو ترك الفلاحين للأرض لعجزهم عن دفع ضرايبها و ظهرت ممارسة قتل الأطفال لأولادهم لعجزهم عن إطعامهم وترتب على ذلك التململ الشعبي ثم الغضب وأعمال العنف والتخريب و قامت دولة مستقلة عن مصر من طيبة و نازل لمدة 20 سنة

سادت حالة من القحط و الفقر في طول البلاد و عرضها رغم أن فيضان النيل كان يأتي في ميعاده و بمناسيب جيدة و السبب هو الفساد و سو الإدارة و سفه تحديد أولويات الإنفاق و تحميل الناس ما لا تطيق

في فترة الحكم المشترك بين كليوباترا السابعة و أخوها بطلميوس ال 13 وصل سوء الحال و شح الغلال لفرض عقوبة الإعدام على أي حد ما يوردش قمحه للإسكندرية و يبيعه للصعيد أو أي تاجر يشتري قمح و ما يوزعوش قطاعي في إسكندرية .. مدينة الرب تشبع أولا و الباقي يولع 😐

الوضع اتنيل بستين نيلة بقدوم المحروس يوليوس قيصر و إشتعال حرب الإسكندرية و عرف العام ده 40 قبل الميلاد بعام القحط (مايغركش دلع إليزابيث تايلور في الفيلم .. الشعب كان بيكح تراب ) ☺️

و تحت الضغط من الناس و إنفلات الأمور في العاصمة إضطرت كليوباترا بعد ما خلصت على أخوها و شريكها في الحكم إنها تفتح صوامع القمح الملكية و توزع الغلال على أهل الإسكندرية قبل ما ياكلوها هى شخصيا

طيب باقي البلد ؟ سابتها لإدارتها المحلية كل بلدة تدبر أمرها بمعرفتها .. و جت موقعة أكتيوم سنة 31 قبل الميلاد و بتموت كليوباترا و بتتقفل صفحة من تاريخ مصر طولها 300 سنة كان فيها صفحات مجد منيرة لكن أكتر الصفحات كانت تغم

مع بداية العصر الروماني .. أوكتافيوس اللي سمى نفسه بعد كده أغسطس يعني المجيد كان عنده هدف إستراتيجي و هو أن مصر تبقى صومعة الغلال لروما و ده مش هايحصل و يستمر إلا لو الزراعة في مصر غطت إحتياجات الشعب اللي هايزرع و فاض عنه اللي يغطي نص واردات روما من القمح

جزية مصر من القمح لروما كان اسمها Anonna و مقدارها 135 ألف طن إضافة لكمية تانية صغيرة لإطعام جنود الحامية الرومانية في مصر
أوكتافيوس عشان يحقق ده فور شبكة الري و كبرها و نضف الترع و صلح الأرض اللي بارت

صلحها إزاي يا باز أفندي ؟ زي ما عمل الصيانة و التوسعات لشبكة الري .. بالسخرة .. فرض على كل فرد قادر على العمل أنه يشتغل خمسة أيام سخرة بشكل دوري و كل واحد يؤدي الفريضة دي ياخد مخالصة و كان مرفوض دفع غرامة كبديل للعمل و عقوبة التهرب كانت غليظة و كمان التزوير في المخالصات

الناس في الأول توجسوا خيفة و قالوا ما أسخم من ستي إلا سيدي .. لكن لما جه الفيضان منخفض و مقداره 1 ذراع فقط كان أبرك من 16 ذراع أيام النصف التاني من حكم البطالمة و ساعتها شعر الناس بالإطمئنان و بقوا متعاونين رغم فداحة الجزية و وجود محتل

و لما بلغ الفيضان 8 أذرع لم تحدث مجاعة لكن عاني الناس من بعض ضيق العيش في ذلك العام (8 كانت مجاعة محققة بدون شبكة ري كبيرة متصينة)

*12 ذراع مش 1 ذراع (غلطة مطبعية معلش )

وده ذكره (سترابون) اللي كان معاصر للأحداث وقت زيارته لمصر
من ضمن قرارات أكتافيوس كانت عدم زيادة الولاة في الكمية اللي بيتم إرسالها من مصر والإلتزام بالكمية اللي بيحددها الإمبراطور حتى لو المحصول زيادة ..مكانش عاوز لبش وضغائن ☺️مش حرص على شعب مصر لاسمح الله لكنها الحنكة في الإدارة

واحد من الولاة في عهد الإمبراطور تيبريوس حب يجود و زود الجزية فإستدعاه تيبريوس و قاله كلمته الشهيرة (لقد أمرتك بجز صوف الماشية لا بسلخها )
و طبعا دوام الحال من المحال و كل شى مصيره للتدهور و الزوال.. و بتحصل ثورة اليهود في إسكندرية و برقة سنة 115 ميلادية

و بقت الأولوية لتسليح و الحرب و أهملت تاااااني شبكات الري و زادت الضرايب للإنفاق على القمع و السلخ و الحبس و رجعت الناس تهرب و تسيب أرضها لدرجة نزوح قرى بحالها من الفيوم و الدلتا

طبعا حاول الرومان السيطرة على الوضع بالحل الغبي المعتاد و هو التنكيل باللي يسيب أرضه و يتمسك و كمان باللي يؤويه حتى لو كان قريبه .. بدل ما يحلوا سبب المشكلة الحقيقي .. لكن ده مانجحش في إبقا الناس في قراهم و مع تفشي الجوع ظهرت الأوبئة و بقى موت و خراب ديار

هل ده كان بيحصل بس في زمن الإحتلال يعني وقت البطالمة والرومان؟لاسعادتك في كل مرة سقطت الدولة المركزية في مصر القديمة كان السبب هو الجوع الناتج عن سوء الإدارة
صورة لمجاعة حصلت أيام الملك أوناس أخر ملوك الأسرة الخامسة في الممر الموصل من معبد الوادي للمعبد الجنازي في مجموعته الهرمية

طولت عليكم .. ده ملخص بحث محكَّم حبيت أشاركم المعرفة .. و صباح الخير عليكم 🌷❤️

ايه حكاية الغلطات المطبعية 😅
*قتل الأباء لأطفالهم

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد