افتكرت حاجة كنت عايز اكتبها هنا من زمان . كتير كنت اقرا ليكم تويتات عن الحياة الزوجية وازاي تبقي حلوة من اول الخطوبة . كلام كتير كنت اقراه وما دخلتش فيه . لكن حبيت اقول لكم ان نجاح الحياة الزوجية بيعتمد علي الراجل اكتر من الست . اول حاجة لازم الزوج مايكونش بخيل علي زوجته .
لازم اي فلوس تيجي له يدخل البيت يضحك ويحط الفلوس في حجر زوجته لو قاعدة او في ايديها لو واقفة . ولو مبلغ كبير يشتري ليها قبل مايروح اي حاجة دهب ويديلها بقية الفلوس . ومادام بيديلها كل اللي بيكسبه يسيب لها ادارة البيت .هي اللي تشتري كل حاجة حتي لو راح معاها وهي اللي تتابع الولاد
واهم حاجة انه يقول لها دايما حاضر لما تساله او تطلب منه . يسمعها ودايما يقول لها حاضر مايتعبهاش في المناقشة والشرح . كلمة حاضر بتبقي زي الحضن بالنسبة للزوجة. تالت حاجة ان لو زعلوا مع بعض لاي سبب وساعات بيكون من غير سبب . ناس حاسداهم مثلا.. اه وربنا . او السنة السابعة في الزواج
ماحدش يعرف ابدا لا من اهله ولا اهلها . دا مهم جدا لان الاهل مهما كانوا عايزين خير بيفتحوا سكة الشكوي . ولو زاد الخلاف اوي وبيحصل والله من غير سبب واضح يسيب هو البيت مش يقول لها تروح لاهلها . هو اللي يسيب البيت ويقول لها كدا وهي لو سابته يمشي بعد شوية حتتصل بيه او تروح تجيبه .
ماتطردش زوجتك ابدا وخليها دايما حاسة انها عمود البيت . كل دا حيرجع عليك محبة منها وتضحية . دا انا عشته وجربته ودا اللي خرجت بيه من تجربة الزواج . زوجتي الاولي الله يرحمها كنت باعمل معاها كدا . واستحملت معايا ايام صعبة جدا لانها بتحبني اه لكن كمان عمري ما قلت لها غير حاضر
عشنا مع بعض اتنين وعشرين سنة زعلنا فيهم تلات مرات ماحدش فينا ساب البيت غير مرة انا اللي سبت البيت فجات لي في نص الليل عند الله يرحمه محمد كشيك
. هي خمنت اني حاكون هناك وحصل . رجعت معاها وباقول لها ليه تعبتي نفسك في الشتا والبرد دا ما انا حارجع بعد يوم والا اتنين تكوني استريحتي
. هي خمنت اني حاكون هناك وحصل . رجعت معاها وباقول لها ليه تعبتي نفسك في الشتا والبرد دا ما انا حارجع بعد يوم والا اتنين تكوني استريحتي
قالت لي ماتباتش برة زعلان ابدا . وبعدين لو كنت سبتك حتاخد علي كدا . ارجع البيت احسن وحقك علي . دي اهم حاجات لقيام حياة زوجية جميلة ودايما انا عند رابي ان الزوج عليه المسؤلية الاكبر مش الزوجة . كلمة حاضر لزوجتك مش حتتعبك . فلوسك كلها تحطها بين ايديها وهي اللي تدير الحياة . .
مشاكلكم ماتطللعش برة البيت . ودا اللي باعمله مع زوجتي التانية ربنا يخليها اللي عوضتني عن زوجتي الاولي بعد خمس سنين كنت فيهم ارمل وتعبت جدا . اصحابي بيحسدوني اني في المرتين ماحدش عرف عننا غير كل خير . كتبت اثناء الزواج الاول اتنين وعشرين كتاب في اتنين وعشرين سنة وفي الزواج التاني
كتبت ١٨ كتاب في ١٦ سنة غير مئات المقالات . وزي ما كنت باحط اي فلوس تيجي لي.ومازلت في ايدين زوجتي كنت لما امر بظروف صعبة ماليا وخصوصا في الزواج الاول الاقيها خارجة تقول لي حاشتري حاجة. وترجع معها خمسميت جنيه او اكتر واكتشف انها خرجت علشان. تبيع غويشة ومافيش حاجة تعطلني عن الكتابة
طبعا في الزواج التاني الظروف احسن . لكن دا كان بيخليني اول ما ربنا يفتح علي بفلوس اشتري لها وانا راحع بدال الغويشة اتنين . هكذا كانت ولا زالت حياتي . حاضر اجابتي علي كل طلب . الفلوس كلها بين ايديها . لو زعلنا ماحدش يعرف ابدا اننا زعلانين .
ولو الامور زادت في زعلة ما. انا اللي باعلن اني حاسيب البيت . وعمري ولا عمر اي واحدة الاولي او التانية ماسابتني امشي من البيت .
جاري تحميل الاقتراحات...