فيه واحد كان جاي في الاتجاه العكسي، هو كان في أول الشارع، وانا كنت في نص الشارع.. رعشتله بالنور.. لقيته زاد السرعة ووقف قدامي وبيضرب كف بكف وبيشوح.. رجعتله المسافة كلها وماقالش شكرا.. ينفع أبلغ عنه ويحققوا معاه؟! فيه فرق بين الصح والغلط في الأخلاق.. وبين الصح والغلط في القانون!
فيه فرق بين انك تقول لواحد انه قليل الذوق، وبين انه يعمل جريمة يعاقب عليها القانون.. فيه ناس تربيتهم بتقول ان البنت ما ترقصش قدام ناس اغراب او زملاء عمل.. دي بيسموها الأصول او التربية.. لكن اللي بيعمل عكس الكلام ده، القانون مالوش حاجة عنده..
الخمرة حرام في الدين الإسلامي، والسُكر مكروه في الدين المسيحي.. لكن القانون بيسمح ببيع الخمور .. والسجاير تؤدي الي الوفاة، مكتوب عليها كده.. والاديان كلها ضد تدمير الصحة.. ومع ذلك السجاير بتتباع عادي بحكم القانون.. فيه فرق بين الممنوعات الأخلاقية والدينية والتربية.. وبين القانون
اللي بيحصل عندنا هو نوع من الخلط بين كل شئ.. سلطة طحينة بالأخلاق والمهلبية والدين وعليها طشة قانون بالملوخية.. حاجة كده زي مخالفة المرور بسبب الرائحة الكريهة.. بينما يُظهر القانون جانب شديد التسامح مع التكاتك والسيارات اللي بدون لوحات.. إيه الحلاوة والجمال اللي إحنا فيه ده!
جاري تحميل الاقتراحات...