رتبها

لازم تفتح اضانك وتسمع ..
صوت الشارع لمن يدوي
كل قلاع الخونة بتهوي
وكل جباه الكهنة بتركع ..
وشمس الحق السرقو شعاعها
بكرة بامر الشعب بتطلع ..
ياللي بتسمع
والما بتسمع ..
نحن اسوداً ما بتدجن
ونحن سدوداً ما بتهدن
ونحن جبالاً ما بتصدع ..
#مليونية2يناير
#يسقط_حكم_العسكر
#SudanCoup

لملم ناسك ولحمة راسك
وارفع ايدك عننا .. ارفع ..
يا اللي بتسمع
والما بتسمع ..
لو بي بنادقك ما بترهبنا ..
ولو بى خنادقك ما بترعبنا ..
والتاريخ يا جاهل بيشهد
والايام لسع بيناتنا ..
وكل الحق الضايع بيرجع ..
يا اللي بتسمع
والما بتسمع ..
اسأل كل العسكر قبلك
وكل الحاول فكر متلك ..

الاستأسد والاتنمر
مهما استعلا ومهما استكبر ..
برضو في يوم الغضبة بيهلك
وبيلقى مصيرو نفس المصرع ..
واننا أمة عظيمة .. اصيلة
لينا خصايص ما في مثيلها ..
وفينا طباع بالفطرة نبيلة
والاسلام ما جانا الليلة ..
ولا اخلاقو علينا دخيلة
الايمان من بدري سبيلنا ..
والقرآن في الصدر دليلنا

انقى وارقى واسمى وارفع ..
يا اللي بتسمع
والما بتسمع ..
نحكي ليك لو كان ما بتعرف
حاجة بسيطة بس عن ماضينا ..
انحنا رضعنا الثورة رضاعة
وبالوطنية انحنا ربينا ..
التدجيل ما بنفع فينا
والتضليل ما بيمشي علينا ..
انحنا عبرنا السكة مشينا
وشفنا عدونا وشفنا صفينا ..
#مليونية2يناير

وما بنهاب لا سيخ لا مدفع ..
يا اللي بتسمع
والما بتسمع ..
الانقاذ ما بالدبابة
ولا احلام شايلاها سحابة ..
ولا اوهام عالم كضابة
ولا ارقام خاوية وخلابة ..
والاصلاح ما جربندية
الاصلاح ما بالزندية ..
الاصلاح عدل وحرية
الاصلاح موضوع وقضية ..
الاصلاح عزقة وطورية
نحن بنفكر بتاريخنا ..

يا اللي بتسمع
والما بتسمع
نحن اولاد الوطن الواحد
متسامحين من يوم ما قمنا ..
عشنا حبايب ولسه حبايب
ما اتخاصمنا ولا اتصادقنا
فينا مساجد بـ تهليلها
وفينا كنايس بـ انجيلها ..
وفينا معابد يسرج ليلها
ربنا واحد .. وشعبنا واحد ..
وحبنا واحد .. ودربنا واحد ..
يا اللي بتسمع
والما بتسمع

دايرين نختم نحن كلامنا ..
ودايرين نحسن نحن ختامنا ..
للاحرار نديها تحية
وللثوار تعظيم وسلام ..
نحن الفوق الشمس مقامنا
ونحن جبين القمره مرامنا ..
ونحن وقود الحارة ونارها ..
ونحن منية الباغي سهامها
الا ارادة المولى ارادت
حكمت فينا وفي حكامنا ..
بعد ما ازهري كان هو زعيمنا

بعد المهدي الصلى امامنا
بعده الغرد الضوو جبينا ..
بعد الدرر الزانو زمانا
جات البقرة عشان تحكمنا
وام رخم الله مشت قدامنا ..
جل جلالة الملك الواحد
يأتي .. وينزع ..
ويعطي .. ويمنع ..
ويخفض .. ويوفع ..
يا اللي بتسمع
والما بتسمع ..
#مليونية2يناير
#SudanCoup
#يسقط_حكم_العسكر

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد