رتبها

عمري مافكرت اسافر أفريقيا لكن بما إن الدنيا كورونا و السفر للمصريين مقتصر على شوية دول حظنا السعيد ودانا #تنزانيا و عمري مااتخيلت إني هاتبسط و أنبهر كده ب افريقيا
ف تعالوا احكي لكم عن رحلتي ل #تنزانيا و اول وجهتنا العاصمة #دار_السلام

السفر ل تنزانيا مش محتاج تأشيرة
بتحجز تذكرة ل دار السلام مصر الطيران او ترانزيت اثيوبيا ع الاثيوبية ارخص و تاخد صورة من التذكرة و صورة الباسبور و الأصل و احيانا بيطلبوا صورة شخصية و تروح مركز تطعيمات الأسرة-حكومي- و تطلب لقاحات السفر ل تنزانيا و بتستلم دفتر أصفر في انك اتطعمت

وصلت #دار_السلام الفجر و نزلت ع الفندق الساعة ٦ الصبح و دي كانت ألطف حاجة اني قبل ما انام صورت الفيو من البلاكونة و نمت صحيت مالقتش المحيط..اقول ياربي انا متأكدة انه كان المية واصلة للفندق راحت فين و شكيت ف ذاكرتي و شفت الصور اللي صورتها
و هنا عرفت عن ظاهرة مد و جزر المحيط 😀

اول انطباع عن البلد انها بسيطة جدا و الفقر واضح ف كل مكان لكن الشعب جدا لطيف و بسيط و دمه خفيف و ماشي يرقص لوحده و جمال الخضرة و الطبيعة ليس لها مثيل و طعم الفاكهة هناك استثنائي
حقيقي تحس من حلاوتها انها فاكهة غير اللي بناكلها

في دار السلام احلى حاجة تعملها انك تتمشى و تتفرج على شوارعها و توصل عند المحيط في كذا شاطى
الفندق كان قريب من شاطئ #cocobeach
و طبعا كل الشواطئ المية بتكون بعيدة لكن ع العصر المية بتبدأ ترجع ل مكانها تاني و تغطي المنطقة الخضرا دي كلها

من الحاجات التانية اللي ممكن تروحها ب #دار_السلام هو المتحف الوطني و هناك محتفظين ب تاريخ البلد و بعض الممتلكات للرؤساء القدامى
و طبعا تاريخ تجارة العبيد و في تماثيل منحوتة لنفس صور العبيد و هم مجبرين يشيلوا قرن الفيل و هو تقيل جدا و بعض آثار الحيوانات القديمة

و في كمان ف #دار_السلام حديقة للنباتات اللي بيستخدموها ل صنع الأدوية لكن قابلنا واحد و نصحنا نمشي قبل المغرب عشان الناموس هناك قرصته مافيهاش هزار
و كنيسة سانت جوزيف لكن لما رحنا كان وقت الغدا معرفناش ندخلها من جوة و اتمشينا ف الساحة الخارجية بس

الأكل ف #دار_السلام ...ما اكلتش حاجة 😃
كنا بنجيب الأكل و نسيبه زي ماهو. و في Village supermarket جبنا منه اجبان و طلع طعمها سئ
حتى السوشي و الاسماك طعمهم مختلف او يطلعوا مطبوخين ب wine
ف كنا بفطر فاكهة و muesli و باقي اليوم بسكوت و شيبس

#دار_السلام فيها سوبرماركت بيجيب الحاجات المستوردة اسمه Village Supermarket بس حتى الأجبان طعمها مختلف جدا و مش حلو
وا ف يوم ماشيين بالصدفة لقينا كنتاكي و ده كان يوم سعدنا و هنانا و اليوم الوحيد اللي اتغدينا فيه

السواق في #تنزانيا بيقعد ف الناحية اليمين و دي كانت حاجة مربكة كده و اتجاهات الشوارع مشقلبة
و احسن وسيلة انتقال هناك هي ال توكوتوكو 😀
و سواقينها عفاريت ميفرقوش عن تكاتكنا خالص و صورة واجهة مكتبة و صورة الخزان الاسود ده طريقة التعقيم الوحيدة ف #تنزانيا لمواجهة الكورونا

بالعادة مبكتبش عن الفنادق ف السفر لان ده راجع لميزانية كل واحد
بس انا قضيت ايام كتير قوي عشان اقرر انزل فين و خصوصا ان معايا اولادي و مش حمل بهدلة
ف #دار_السلام اول فندق كان #SlipWay و فعلا كان اختيار ممتاز لأن فيه مطاعم و محلات و صيدلية و مكان لعب للاطفال بحيث متطلعوش برة

و اللطيف كمان كان في #SlipWay #دار_السلام كل يوم فرقة مختلفة بتعمل حفلة مختلفة
و طبعا في رقص و هيصة بس مش هاينفع ارفع الفيديوهات لأنه كله رقص بالمؤخرة و حالته حالة 😀

عشان تنتقل من #دار_السلام ل جزيرة #زنزبار لازم بتحجز تيكت ب ٣٠$ تقريبا من مكتب تذاكر #عزام_مارين قبل السفر بيوم او انك تحجز اونلاين بس لازم تروح تدفع قبل الرحلة ب٤ ساعات
المركب ٣ ادوار والرحلة ساعتين و ممتعة لكن بصراحة كرهتها جدا لأني بادوخ من المراكب،طلعت صورت الفيديو ده بصعوبة

#زنزبار منقسمة ل مكانين الاول #StoneTown و ده البلد القديمة و بتنزل ف فنادق هناك على الطراز القديم للبلد بما يسمى التجربة السواحيلي بحيث انك تعيش زي ماعاشوا زمان
نزلت ف فندق #Coffeehouse و فكرني ب بيت جدتي لما نزلت زرت البلد زمان

و ميزة انك تكون ف #StoneTown انك تنزل تمشي ف شوارع زنزبار الاصلية و القديمة
و اخر صورة دي من السيبر

اكتر حاجة مشهورة ب #زنزبار هو انك تروح tour ل #SpiceFarm
و ممكن يتهيألك انها رحلة مش حلوة بس الغريب انك هاتلاقي نفسك اتبسطت و انت بتشوف انواع الاشجار كلها ف مكان واحد و تقطف الثمار و تاكلها طازجة

#SpiceFarm #Zanzibar
بيكون في guide للرحلة ماشي معاكم بيعرفكم انواع النباتات و بييجي واحد تاني يورينا ازاي بيطلعوا يجيبوا جوز الهند من الشجر

و بيقطع الجوز هند و بيديهولنا طازة
انا اصلا مبحبش جوز الهند لكن ده طعمه مش عادي
طعمه مختلف جدا و العصير مسكر و فعلا لذيذ

ف آخر رحلة #SpiceFarm #Zanzibar بيلبسونا تاج الملك و الملكة و اساور و شنط معمولة من ورق الاشجار و حاجة سكر يعني و دمهم خفيف قوي و بيقدموا فواكه مختلفة تدوقها قبل ماتمشي
اخر صورة دي ل شوية ماريجوانا هم زارعينها كده مش مصرح بيها 😀

قبل ماتمشي من #StoneTown لازم بتزور ال #SlavesMarket سوق العبيد القديم
زنزبار كانت تحت الحكم العماني عشان كده ٩٧% من سكانها مسلمين و كانوا عبيد زنزبار بياخدوهم للدول العربية و ليس امريكا
اول صورة للدور العلوي و التانية مدخل القبو مكان مابيحبسوا العبيد و القبو و باب الخروج

القبو ف سوق العبيد كان غرفتين ب سقف منخفض جدا بكل غرفة فتحات بسيطة جدا تدخل هواء ل ٧٤ ست و اولادهم و المحرى تحتهم هو الحمام لحد ما ياختاروا هايبيعوهم ب كام و يعملوا معرض لهم و ييجي اللي يشتريهم

خارج المبنى كان في الشجرة اللي بيتربط فيها العبد و يتضرب بالسوط ك اختبار لمدى قوته اللي يستحمل ضرب اكتر بيكون اعلى سعر
اتشالت الشجرة و بنوا مكانها كنيسة وعمود سلام تمثال ذكرى و معرض صور لتاريخ العبودية و انتهاء الحكم العماني و استقلال #زنزبار وكونها جزء من جمهورية تنزانيا

في #StoneTown حد اقترح علينا نجرب street food experience ف open market للاسماك و اللحوم
و دي كانت اسوأ تجربة عشتها ف حياتي و مقدرتش اكل و من كتر ماتضايقت حلمت بالأكل بالليل😃
بس كان فندق Coffeehouse بيعمل احلى قهوة و وافل ف زنزبار و وصلنا مطعم إيطالي اكلت بيتزا بعد عناء يومين 🤭

بعد #StoneTown ف #زنزبار كنا مقررين نروح فندق و نستقر فيه لآخر الرحلة ولكن انطرحت فكرة السفاري و انا كنت مقلقة منها و هنا جه دور @Hassaneini وشكرا له جدا انه شجعني اننا نروح و طمنني و اداني اسماء الParks
حجزنا طيارة وطلعنا #أروشا
طيارة اقرب للميكروباص لدرجة ابني قعد جنب الطيار😀

اول مانزلنا من الطيارة كان في شركة متفقين معاها جت اخدتنا و جه ال Guide مرخص و معاه عربيته لأن مستحيل ندخل لوحدنا لازم هو المسؤول عن الحجوزات ودخولنا وخروجنا بسلام guide كان اسمه Justin مثقف و محترم و قضينا معاه ٤ ايام اتبسطنا جدا
يومها اخدنا و رحنا اول بارك و هي #Tarangire

#TarangireNationalPark #Arusha #Tanzania
و احلى ميزة فيها انها كانت اكتر بارك بنكون قريبين فيها للحيوانات
لكن كان في منطقة فيهاTse tse flies و دي اللي درسناها و احنا صغيرين الذبابة اللي بتسبب مرض النوم ف كنا بنلف كتير
العربية سقفها بيترفع عشان تساعد ف رحلة البحث عن الحيوانات

#TarangireNationalPark مجموعة من فصبلة
Anteaters
ماشيين و فجأة شافوا لبؤة مستخبية وسط الزرع و اتفزعوا و جروا الناحية التانية
#تارنجيري #سفاري #تنزانيا

Zebras
#TarangireNationalPark #safari #Tanzania

الفيل ده بعد الفيديو ده قرب مننا جدا و اضطر ال guide يطفي صوت المحرك عشان ميسمعهوش و اول مابعد شوية دور و رجع بضهره بسرعة
#TarangireNationalPark #سفاري

ف وسط اليوم بتقف ف مكان للأكل مسموح انك تنزل و تقغد تاخد الغدا اللي بيكون جايبه ال guide معاه من الفندق
و البابون بيكونوا قريبين منك و ممنوع تماما ترمي لهم اي اكل
ال Lunch box غالبا فراخ مقلية و بطاطس و تفاحة و عصير
و طبعا مكنتش باكل غير التفاحة و باقي اليوم برينجلز 🥲

اخر يوم سفاري تارنجيري بارك رحنا فندق اسمه #NgorngoroFarmHouse واسمحوا لي اتكلم كتير عنه لأنه بدون مبالغة أحلى فندق قعدت فيه ف حياتي
Lodge وسط الغابة
أوض مفهاش انترنت ..حيث انت والطبيعة اخر صورة سقف الاوضة

#Ngorngoro Farm House #Arusha #Tanzania #safari
مبتسمعش غير صوت عصافير

كنت حسة إني باشرب قهوة ف الجنة حقيقي
و ماتمناش غير إني أروح هناك تاني اقعد اسبوع بس و أرجع... أو لما آجي اتقاعد ف مكان زي ده يارب
Ngorngoro Farm House
#تنزانيا #أروشا

#Ngorngoro Farm House #Tanzania
و العشا كان جميل و الشيف بيطبخه قدامك ف بتطلب مكونات او بتشيل مكونات ف الأكل بيظبط و بيطلع طعمه حلو
و كانوا متبلغين اننا مسلمين و جابوا فراخ حلال مخصوص لنا

تاني يوم رحنا تاني park اسمه Ngorngoro National Park
و ده ال Ngorngoro Crater من فوق

في #NgorngoroNationalPark مسموح ل قبيلة ال ماساي #Massai إنهم يعيشوا جوة ال park
و يعيشوا رحالة من مكان لمكان و يبنوا بيوتهم من طين و بيعيشوا فيها و لما تدفع لهم بيطلعوا يرقصوا و يرحبوا بالضيوف و يلبسونا الاطواق بتاعتهم و يرقصوا

و بياخدونا ل بيت من بيوتهم ك مثال ل باقي البيوت و ازاي بيناموا جواه و مقسوم ل مكانين للنوم واحد للراجل و مراته و واحد للاطفال
و ان الراجل ممكن يتجوز اكتر من ست واحدة عادي
و بيحكوا عن تاريخهم و طباعهم و أكلهم و طريقة حياتهم
#ماساي #تنزانيا