اكتر شئ يقلقني.. لما أشوف إنسان قابع في حُفرة الأمان.. فاكر انه مستخبي من الرياح.. مش مدرك أن المكان الوحيد اللي تقدر تختبئ فيه من الحياة.. هو الموت! باعولكم الأمان، وانتم اشتريتوا القلق.. باعولكم الراحة وانتم جنيتم الوجع.. باعولكم النميمة، وانتم دفعتوا فيها نص عمركم!
فلوسك الحقيقية هي وقتك.. كلنا هانمشي من هنا لما نفلس.. ناس كتير رحلت وهي معاها ملايين في البنوك.. لكن مافيش حد بيمشي ومعاه رصيد وقت! لو فهمت أن الوقت هو ثروتك الحقيقية.. حياتك هاتتغير! بيسرقوا حياتكم عشان تتكلموا فيها عن حياة غيركم.. بيخطفوا مشاعركم، ويحتلوا افكاركم!
يا ترى هاتفضلوا عايشين زي الخشبة اللي عايمة على وش المياة، تطلع وتنزل مع الأمواج، وياخدها التيار يمين وشمال؟! هاتضحك لو قلتلك، أن كتير من الناس عايشين حياة بالريموت كنترول.. مش متحكمين فيها ولا قادرين يفهموا معانيها.. خايفين من الجن يسكنهم، بس مش مدركين ان الإنس أخطر!
لو راجعت أفكارك اليومية.. هاتلاقيها مش بتاعتك.. مشاعرك معروضة للبيع، يشتريها أول فعل استفزاز معدي من قدامك.. نحن نعاني من مرض إسمه "الإفراط في التعرُض للشاشة".. ناس كتير ماكانتش مصدقة موضوع التنويم المغناطيسي.. طب جرب كده تبص على العالم من حولك من زاوية مختلفة
هاتشوف ناس قاعدين مش بيكلموا بعض وماسكين حتة حديدة في إيديهم.. فيه ناس بتعمل حوادث موت عشان مش قادرين يشيلوا عينيهم من على شاشة الموبايل لمدة خمس دقايق! ناس تلاقيهم تعبانين نفسيا عشان فلان عمل لايك لفلان على بوست.. بيوت بتتهدم بسبب صورة نزلت على صفحة!
الإفراط في التعرُض للشاشة، ده المصطلح الجديد اللي ممكن يحل مكان التنويم المغناطيسي..هي حالة من الغياب عن الحياة.. لكن اللي يقدر يستخدم الشئ بحكمة، هايستفاد منه.. بس المشكلة أن "الشئ" بيستخدم ناس كتير، وبيستهلك حياتهم! يمكن تشوفوا في كلامي مبالغة..بس مش هاتخسروا حاجة لو فكرتوا فيه
حياتك فيها كتيييير... ابعد بمراحل من الحياة الافتراضية.. وأعمق من الشاشة.. فيها علاقات إنسانية حقيقية.. وشغل، وهوايات وقراءة واستمتاع بالفن.. وسفر وفسحة.. من المفيد أننا نراجع أهمية الأشياء من حين لأخر.. وكيفية إستخدامنا لها!
جاري تحميل الاقتراحات...