استنيت كتير اوى لحد اخر الشهر اللى فات ماخدش الڤاكسين علشان عايزه آخد فايزر، ولما اتأكدت انه خلاص وصل قدمت وجالى المعاد وانا جوا خلاص هاخده حصل مشكله والسيستم وقع ومرضيوش يديهولى اتخانقت معاهم ومشيت وسجلت تانى وروحت بعدها بأسبوع..

قبل ما ادخل سألتهم ده فايزر اللى هاخده؟ قالولى اه، خدته وخدت الورقه ومشيت ببص فيها لقيته سينوفاك دخلت اتخانق معاهم وخرجت برا اعيط علشان استنيت كتير اوى فعلا وبهدله طوابير مع ان كان قدامى اخد سينوفاك ف ثوانى.. وقعدت اقول ليه الكون كله متآمر ضدى وكل حاجه مش بتكمل و كنت سو دراماتيك

المهم كان جوايا إحساس بإن ده الخيار الأحسن طالما ربنا اختاره لى حتى لو مش على هوايا حتى وانا متعصبه وبعيط وبتخانق مع الأمن 😂.
مش عارفه بجد اذا كان الخبر صح ولا لا واصلا الموضوع ده تافه وكلهم زى بعض مش هتفرق، بس انا عندى يقين دايما ان الخير فيما اختاره الله حتى لو مش اللى عايزاه

واصلا مبقتش ارفع آمالى تجاه اى حاجه ولا بقيت عايزه حاجه محدده اصلا، دايما بدعى اللهم اختر لى ولا تخيرنى فأنا لا أحسن التدبير وببقى متأكده ان الخطه اللى ربنا راسمها لى احسن مليون مره ليا من خطتى انا وبيبقى هو ده اللى محتاجاه فعلا بس لسبب ما نظرتى بتبقى قاصره على الشعور اللحظى.