لما قلت هتكلم عن الطب فى مصر.. فأنا بتكلم من وجهة نظر المتلقية للخدمة...أنا مش خبيرة و لا عالمة لكن انا انسانة شاء ربنا انه يخلينى اتعامل مع القطاع ده.. عاوزاكم تعذرونى لو كلامى مش مرتب و مش عارفة اذا كنت هعرف اوصل لكم النقطة اللى عاوزة اتكلم فيها بالتحديد..أولا كلامى بعيد
تماما عن اتجاه الروتين و تحهيزات المستشفيات و الحكومة بتصرف قد ايه على النظام الصحى و أسعار الكشف و العمليات و كل ده ...أنا عاوزة اتكلم فى إن مابقاش فى كود أو معيار لتقديم الخدمة الطبية...يعنى مثلا لما مريض يدخل مستشفى بحالة معينة المفروض يكون فيه كود معروف للتعامل مع الحالة دى
يعنى هنعمل ١ - ٢ -٣ للفحص و بناء عليه هنعمل ١ -٢- ٣ للعلاج...أنا ليه دايما بحس ان كل التعامل اجتهادات شخصية..انا فاهمة طبعا ان طرق العلاج مدارس بس انا اقصد الاجراءات الروتينية اللى لازم تتم مع المريض فى حالة دخوله منشأة صحية...خلوا بالكم انا مش بتكلم هنا عن عنصر المادة
خالص...انا بتكلم عن مريض هيدفع المقابل للخدمة الصحية اللى هتتقدم له...هل ينفع ان طبيب الطوارئ يبقى قاعد بيلعب فى الموبايل؟ هل ينفع ان ممرضة الطوارئ يبقى عندها احساس بالمسؤولية و بتتابع الحالة اكتر من الطبيب..هل ينفع ان المريض يبقى فى الطوارئ و مطلوب نتيجة تحاليل معينة علشان تتاخد
قرارات حاسمة و سريعة تنقذ المريض تقوم الممرضة تتمشى للمعمل و تتأخر و تتمشى هى راجعة...هل ينفع ان المريض يبقى مطلوب يدخل العناية المركزة فورا و الطاقم الطبى بيلف حوالين نفسه علشان فى اجراء لازم يتعمل و مش عارفين يسجلوه فين علشان ملف الطوارئ اتقفل و ملف العناية اتفتح..مش عارفة اذا
كنت عارفة اوصل الفكرة ولا لأ....أنا مش بتكلم عن كفاءة المعلومة الطبية ولا عن توافر اجهزة ولا عن علاج ببلاش او بفلوس....انا بتكلم عن ازاى الخدمة الطبية بتتقدم...يا ريت محدش ياخد الموضوع على صدره...بس اعتقد ان كلنا عارفين ان اللى بقوله ده بيحصل
جاري تحميل الاقتراحات...