رتبها

طيب...
الفترة الفاتت، طولت غيابي من المجتمع التويتري، وعشان كده، وعقاباً للجميع ح اطول عليكم شوية...
لمدة زادت شوية عن سنة ونص، كنت شغال على مشروع افتكر انه محترم ويسع الكثير من الناس...
بنتكلم ببساطة عن نوع من حاضنات الاعمال (Business Incubator)، وفي الثريد دا "فاكي آخري"
👇🏿

سمح، حاضنة الاعمال دي (واللي اسمها حيعرف لاحقاً) مبنية على فكرة معقدة وكبيرة، لكن شرحها بسيط، حياخد منكم فقط الصبر لنهاية البتاعة دي...
المهمة بتاعتها مساعدة الجميع على التشارك المربح و الربط المريح بين اربعة انواع من الناس:
👇🏿

العندهم اصول (سايلة او جامدة)..
العندهم افكار بزنس..
العندهم طاقة او زمن او فائض قدرة انتاج غير مستغل..
واخيرا العندهم بزنس عايز ينمو..
والنية بسيطة جداً وواضحة:
بقروش النوع الاول، وابداع النوع التاني، ويد النوع التالت، وحماس النوع الاخير، وتخطيط سليم، وشوية توفيق، الكل حيربح
👇🏿

حاضنة الاعمال حيكون فيها الآتي:
جسم استشاري مهمته كالآتي:
تقييم البزنس كفكرة ورؤية وقيمة سوقية وجدوى..
مساعدته في التخطيط للنمو الرأسي والافقي..
مساعدته في اعادة انتاج نفسه وتقديمها بشكل مفهوم للغير..
مراقبة نمو البزنس من الناحية المالية والربحية والتشغيلية..
👇🏿

جسم تشغيلي، مهمته الاساسية رفع اعباء تشغيلية عايزة خبرة قد لا توجد في كل بزنس وهي:
التسويق واستراتيجياته
المبيعات وتكتيكاتها
الامداد ولوجستياته
المالية وتعقيداتها
ال (الإتش آر) وبشره
والفكرة في الجسم دا انه يكون رخيص على الجميع، ومتكلف في نفس الوقت لانه مشترك
👇🏿

جسم تقني، مهمته واضحة، وهي حل كل العقد اللي التكنولوجيا ب تحلها، وبنفس الطريقة، حيكون رخيص على الجميع لانه مشترك بيناتهم، والهدف من وجوده تقليل "دفاق القروش"، وزيادة الفاعلية
👇🏿

جسم تشبيك، شغلانته الاساسية هي سؤال "منو محتاج شنو من منو ويربحوا الاتنين؟"، يعني باختصار، خلق وسط تشاركي بين اعمال مختلفة في مجالات مختلفة من جوة وبره الحاضنة
👇🏿

كل الاجسام دي شركات دي شغلتها، جوة الحاضنة، منها شركتنا، الحاضنة بالنسبة ليها فرصة ربح لا تعوض، وفي نفس الوقت عدد زباين كبير من قناة واحدة ما محتاجة مجهود تسويقي كبير. وزباينها هم الاعمال "الحاضنينها" زاتها، ودي بتوزع مسؤولية نجاح وفشل البزنس "المحضون" على الاجسام دي نفسها
👇🏿

واللحظة دي، الحاصل على الارض الآتي:
خطة عمل الحاضنة موجودة..
بدأ التسجيل والامور القانونية..
تم التفاهم مع اكبر عشرة مؤسسات عندها فوائض طاقة انتاجية في (تقريباً) كل الجالات الموجودة في البلد..
بدأ الترتيب لفتح الوظائف في الاجسام الاربعة الفوق (حوالي ١٥٠ وظيفة مبدئياً)..
👇🏿

اذا وصلت لحد هنا في القراية، وفيك حماس، دا بيعني انك من الاربعة انواع بشر في اعلى الثريد المتعب دا (متعب جدا كتابة حاجة طويلة ومحايدة جندرياً)، وعليه ما عندك مشكلة نواصل شوية عشان نعرف كيف ممكن نستفيد من العندنا (صغر او كبر)...
👇🏿

الباب مفتوح للجميع في الآتي:
عندك فكرة بزنس؟ تجي بفكرتك ب نبقيها ليك بزنس، ونلقى ليك شركاء ممولين، وشركاء يشغلوك، ويمكن شركاء يشتروا منك او يبيعوا ليك..
عندك اي اصل قاعد ساي (قروش، ارض، مزرعة، عربية، الخ)؟ تجي بالعندك نبقيه جزء من بزنس ناجح يربحك ويربح خلق الله..
👇🏿

عندك فائض اي شي (طاقة، خبرة، انتاج، او طاقة انتاج، او حتى زمن)؟ تجي بالعندك ويبقى الفائض دا سلعة تتباع في مكان واحد مرات كتيرة بقروش محترمة...
عندك بزنس شغال وناجح (او ما ناجح)؟ تجي ببزنسك "نحضنه ليك" ونسهل عليك حياتك خلال فترة النمو ال في العادة صعبة...
👇🏿

اخيراً، ح اكوت تويت البتاعة دي بالمستجدات في وصلنا وين. بعد ما اذكر ليكم حاجتين بسيطات:
الاولى اننا حنبدا في سيشنز اونلاين (وما اونلاين)، مجانية ومدفوعة، للناس العايزة تخش..
والتانية، باب الشراكة دايماً مفتوح، سواء على مستوى المساهمة وللا التعاقد..
الله، اتذكرت حاجة مهمة
👇🏿

ريادة الاعمال في العالم كله، عمود انتاجي ابداعي اقتصادي يصنع المعجزات، يغير في المجتمع والسياسة وعلاقات الدول، يخلق الجديد والمفيد، ويجدع بعيد..
واهم من دا كله هو نظام محيد لآثار الرأسمالية المزعجة من داخل الرأسمالية، لانه ببساطة منافسة مخيفة، من ناس عاديين..
وصباح الخير

المعنيين بالضرورة، كان بيناتنا حوارات كثيرة في القصة دي، يحتم علي الادب ذكرهم وشكرهم
دكتورنا الغالي @aswagalmal
استاذتنا @VrLw2
ابن ابن تيمية (حفيد عمك تيمية) @Elsarim_sd
الدعم السريع @Mutwali_M
الدعم البطيء @aaelsafi
واعذرنا يا من كنت معانا في القروب وطوت اسمك ذاكرتي الخربة

انا نسيت @Khalidsaad_1 آسف، لكن ما شديد

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد