النهاردة هنواجه نفسنا بالحقيقة في الثريد التالي.. للأسف.. الثورة الصناعية الرابعة ليست بالسرعة التي كان يتصورها البعض. وتجربة أزمة كورونا هي خير مثال.. شوية خواطر..
نبدأ بسؤال: أيه اللي شفناه الأول؟ الزراعة كتطور في حياة الإنسان وبداية استقراره مثلا زي اللي حصل في الحضارة المصرية القديمة ولا المجتمع اللي بدأ ينظم نفسه في شكل دولة استطاعت تُعمق الاستقرار المتحقق من النتائج المترتبة على الزراعة؟ التاريخ بيقول الزراعة ظهرت ثم ظهرت الحضارة.
بل أن الزراعة كأدوات وتكنولوجيا أحدثت ثورة في تاريخ البشرية خلت الإنسان يتحول من راعي لمستقر حول مصادر المياة زي نهر النيل، ثورة زراعية خلت الانسان يعرف ياكل ويصطاد ويخبز عيش ويلاقي وقت يشرب الجعة ويحكي ويتخيل ويألف ويبدع ويغني ويتطور.
لكن يظل السؤال هل الزراعة اكتشفت في مصر والبابل والصين والعالم القديم فقط؟ أكيد كانت موجودة، ولكن مكانش فيه مجتمع قادر ينظم نفسه في شكل دولة قادرة على حماية التكنولوجيا دي وتطورها وعائدها على استدامة شكل المجتمع ده وحمايته من المخاطر.
التطور التكنولوجي في الصناعة أو الزارعة أو أي مجال وحده مش بالضرورة أبدا يكون ملائم لمجتمع لذاته إلا لو فيه مصلحة مشتركة هتؤدي لاستفادة البشر منها. يا فرحتي لو عندي أسرع وأحسن وأطول وأحدث بس الإنسان مش قادر يستفيد بل بالعكس مهدد بسببها وهي دي الظاهرة الواضحة المرادي
المصلحة اللي بنتكلم عليها بتكون دورة رأس مالية وانتاجية قادرة على استدامة استهلاك التكنولوجيا وانتاجها. القصة ببساطة عبارة عن سلاسل من العرض والطلب على أدوات التكنولوجيا حتى الوصول لنقطة بتصل لحدودها. وعندها بيدأ الاستعاضة عنها بتكنولوجيات أحدث.
طيب أيه المشكلة في الثورة الصناعية الرابعة بقى؟ المشكلة أن الحديث دائما عن انها لا محدودة، ودايما يقولك عندنا آفاق لا محدودة من الفرص..الذكاء الاصطناعي هيسيطر على البشرية وكل الكلام الحلو اللي بقوله شخصيا في الاجتماعات عشان نبهر الزبون. لكن هل هي فعلا لا محدودة؟
الاجابة أنها محدودة بالفعل من أوجه مختلفة أبسطتها توافر البنية التحتية من أول الكهرباء لحد الاتصالات، لحد الطاقة اللي بتستهلكها بنية الانترنت. أمال ليه على طول بنقول أنها لا محدودة؟ لأن التطبيقات بتاعتها في عالم افتراضي! ممكن تشكله زي ما أنت عايز. وده في رأيي جوهر المشكلة.
الشباب اللي بدأوا الثورة المعلوماتية دي عاملين زي مجموعة من الفلاحين اللي لما اكتشفوا الزراعة بدأوا يزرعوا كل أنواع الفاكهة.. كل شوية فاكهة جديدة.. الله شفت دي.. طب دوق دي .. حلوة مش كده؟ والناس بدأت تشتري فاكهة وخضار لحد ما فلست، التركيز كله على خلق الاحتياج عشان نزود العرض.
لما جت الكورونا (اللي بالمناسبة انتشارها فيها عامل متعلق برضة بتطور تكنولوجي خارج عن الحوكمة والسيطرة) أصبحنا أمام وباء عالمي بيختبر قدرة البشرية على الانتقال للعصر الجديد "أبو فرص لانهائية ده" عشان نكتشف أن الموضوع مش سهل اطلاقا.. بل بالعكس التحديات أصعب بكتير..
صحيح من غير التحول الرقمي الوضع كان هيكون أسوأ بكتير واننا نجحنا في استخدام التكنولوجيا لتقليل آثار الوباء، إلا أن الاقتصاد والنمو اتخبط جامد وتأثيره بنشوف رد فعله في التضخم وارتفاع الأسعار وحادثة زي تعطل قناة السويس لساعات قليلة ترجعنا للواقع أن العالم الافتراضي لوحده مش كافي.
من ناحية تانية التأثيرات الاخلاقية للذكاء الاصطناعي ومشاكل زي صناعة وادارة المحتوى في السوشيال ميديا كلها مشاكل مش افتراضية وانما اجتماعية واقتصادية ونفسية على البشرية، بعض من المهوسيين هيقولك الحل اننا نتخلص من البشرية والاعتماد على الآلة في كل شيء. تفكير بيدمر نفسه!
ما علينا، حبيت يعني اقولكم أننا محتاجين اقتصاديين واجتماعيين وسياسيين اقوياء أكثر ما احنا محتاجين تكنولوجيين حاليا لأن التطور التكنولوجي الرهيب ده من غير حوكمة صحيحة لتأثيره وحمايته وتسخيره لرخاء البشرية ممكن يؤدي إلى تفكك وفوضى هترجعنا لما قبل الحضارة أصلا.
جاري تحميل الاقتراحات...