القصة بدأت لما شاب وقع في حب بنت جميلة لكن عندها عيب خلقي، دراعها اليمين غير مكتمل النمو.. تقريبا نص دراع! أهل الشاب حاولوا معاه كتير عشان يسيبها.. جابوله كذا عروسة عشان يغير رأيه.. لكنه كان مصمم على الزواج من البنت اللي حبها!
حكايتهم كانت في الجامعة لما مرة عينه وقعت على بنت جميلة في المدرج بتحاول تشيل الكتب لكن مش قادرة تشيل بسبب مشكلة دراعها.. راح ساعدها واتعرف عليها، شعر بانجذاب ناحيتها من أول مقابلة.. لما صارحها بحبه، رفضت لأنها خافت يكون بيبحها من باب العطف عليها..
بعد سنتين من المحاولات، صارحته هي كمان بحبها.. ودخلوا في دوامة موافقة الأهل على الارتباط.. أهل البنت شايفينه أقل منها في المستوى الاجتماعي، وأهله رافضين ابنهم يرتبط بواحدة عندها إعاقة.. خاضوا معارك كتير كادت أن تفتك بالعلاقة.. لكن حبهم صمد في وجه الظروف الصعبة
اتجوزوا بعض بعد سبع سنين من بداية التعارف.. لكن ربنا ما رزقهمش بالخلفة.. أهل الشاب كانوا واقفينلها بالمرصاد، وتلقيح الكلام زاد.. بعد ٣ سنين زواج، قرروا يروحوا للطبيب عشان يشوفوا حل لمشكلة عدم الخلفة.. النتيجة طلعت أن العيب عنده هو.. عملوا محاولات كتير لكن الموضوع مانفعش
الزوج قرر يقول لكل الناس أن العيب عنده، عشان يرحم زوجته من كلام أهله.. زوجته رفضت واتخانقوا لأول مرة.. هي عايزة تقول أن العيب عندها، وهو عايز يقول الحقيقة! لكن في النهاية، الزوجة صممت وقالت أن العيب عندها.. وطبعا حطت نفسها في وش المدفع، عيلة الزوج ضغطوا عليه بكل الطرق عشان يطلقها
الزوج تمسك بحبيبته اللي قررت تشيل الشيلة لوحدها.. حاول كتير يكسر الوعد ويقول الحقيقة لكنها هددته أنها مش هاتسامحه.. عاشوا مع بعض ٥ سنين، الزوجة كانت مستحملة فيهم هجوم أهله، وهو وقع في حبها من تاني عشان تضحيتها.. كانت بتحاول تردله دين قديم، أنه حبها رغم إعاقتها!
وفي يوم صحيوا على تليفون الساعة ٢ الفجر.. أخو الزوج كان في سهرة هو و مراته وعملوا حادثة واتنقلوا المستشفى.. إصابتهم كانت كبيرة وما عرفوش ينقذوهم.. الأخ وصاه قبل ما يموت أنه ياخد ابنه يربيه! الولد كان عنده سنتين.. اخدوه في بيتهم، ورغم الحزن الكبير ، شعروا أن ربنا عوضهم خير
الولد عاش معاهم ١٥ سنة، ماكانش يعرف غير انهم أبوه و أمه، حتى بعد ما صارحوه بالحقيقة، زاد حبه ليهم.. وفي يوم الزوج حس بتعب، وطلع عنده كورونا.. الزوجة اخدت الولد وسابته عند جده وجدته، ورجعت تقعد مع زوجها عشان تعتني به.. ماكانش فيه مكان في المستشفى، وهو حالته كانت صعبة
قعدت شهر تعتني به وجابتله جهاز تنفس في البيت.. وفي عز تعبه، شعرت الزوجة بأعراض المرض، وفضلت تخدمه رغم تعبها لغاية لما بدأ يتعافى.. المرض اشتد عليها وغادرت هذا العالم بعد أيام قليلة من تعافي زوجها.. أهل الزوج وقفوا جنبه في حزنه وبعد كام شهر اتكلموا معاه أنه لازم يتجوز تاني
كانوا شايفين أن الولد محتاج أم تاخد بالها منه.. لكنه رفض فكرتهم وقرر يكرس حياته لإبنه.. لكن لما الموضوع اتفتح تاني، صارحهم بالحقيقة.. وقالهم أن زوجته شالت ذنبه طول حياتها واستحملت كلامهم عشان خاطره.. القصة دي أنا سمعتها من والد الزوج، اللي كان من أشد المعارضين للجوازة من الأول
كان بيحكيلي وهو متأثر.. ماعرفوش يحبوها في حياتها، لكنهم عرفوا قيمتها بعد ما رحلت.. شالت العيب اللي كان في ابنهم وحطيته فيها، واستحملت ظلمهم لها عشانه.. و أخدت حفيدهم وعوضته عن أمه و أبوه.. و فدت حياة زوجها وشالت عنه المرض للمرة الثانية ورحلت.. لأنها أعطت كل ما تملك من حب!
طاقة الحب لما بتنفجر، بتعمل معجزات.. الشخص اللي ممكن يصعب عليك عشان عنده إعاقة، وتفكر انك ممكن تعطف عليه لكن ما ينفعش تحبه.. الشخص ده ممكن يكون جواه كنز أكبر بكتير من حاجة ناقصة في جسده.. لما سمعت القصة، عرفت أن فيه حاجة إسمها حب وتضحية، لكن فيه ناس كتير ما تعرفش الحب!
جاري تحميل الاقتراحات...