رتبها

#ثريد عن ذكريات عشتها حصلت من ٤٨ سنة
اليوم السبت
٦ أكتوبر ١٩٧٣
١٠ رمضان وطبعاً كنا صايمين مع اننا مازلنا اطفال لكن صايمين
الساعة ١٢,٣٠ ظهراً كان عندى ١١ سنة ونصف وكنت فى سنة ٦ إبتدائى فى مدرسةالناصرية أمام مسجد النصر بالمنصورة وكنت فترة مسائية بعد الضهر للجيل اللى مايعرفش (١)

يعنى اية فترة مسائية لان مكنش فية مدارس كفاية
المهم حارس بوابة المدرسة قال لنا انهاردة اجازة طبعاً فرحنا فرحة نسيتنا اننا فى رمضان ولا إية السبب وكان بينا وبين محلج القطن رصيف بنلعب فية كورة دايماً قبل المدرسة المهم لعبنا لحد ماجلنا حارس المدرسة وقال يالا روحو بردو ما نعرفش (٢)

لية بس روحنا المهم وصلنا البيت لقيت بابا فى البيت غريبة بابا دايما بيجى على الفطار وفجاءة قال لينا الحرب قامت ايوا أنا حضرت حرب ١٩٦٧ بس لم ادركها بس شفت طيارات وقعت جنب المنصورة المهم بابا كان تاجر قماش جملة فى سوق الخواجات جملة يعنى مخة تجارى وكان عندنا عربية فيات ١٢٥ ايطالى (٣)

وشارعنا كلة الخلفاء الراشدين فى توريل كان فية بس ٣ عربيات وكان مدخل عمارتنا ملعب لوحدة مبانى زمان بيء بابا قالى اوصل الفرن هات من الحاج / احمد ٥٠٠ رغيف عيش وكان تمن الرغيف البلدى المحترم بتعريفة يعنى ال ٥٠٠ رغيف كانو ب ٢,٥ جنية وكان اقصى عيلة بتاخد فى اليوم ٥ أو ١٠ ارغفة قالى (٤)

روح هو عارف وخد معاك اصحابك وانتو راجعين عدى على البقالين لمو الكراتين انا قلت ماشى ولحد دلوقتى مش فاهم بس دى أوامر وتعليمات وكان عندنا بالبيت شغالات وطبعاً اخواتى البنات والصبيان رحت الفرن وفعلاً الحاج احمد ادالى العيش وبقينا نودى البيت على كذا مرة لقيت ماما واخواتى البنات (٥)

والجيران عملو من شقق الدور الارضى مطابخ لحمة وفراخ وعصير برتقال وجوافة واللى يجيب اشولة بلح ناشف وبرتقال لان دة الفاكهة بس وبدءت افهم واعرف الاكل دة من هنا ورايح طول شهر رمضان دة أكل جنودنا على الجبهة وحيطلع للجيش ودة نظامنا كل يوم لحد نهاية الحرب وبدءنا نلم الكراتين ( ٦ )

من محلات البقالة ومن الصيدليتان اللى كانو فى توريل واللى يلم الازايز وتتغسل خلية نحل مجموعة مخصصة للم الكراتين مجموعة للعيش مجموعة للطبيخ مجموعة تعبى السندوتشات مجموعة للعصير والخلاطات تشتغل نجى لمشكلة السكر كل اسرة كان ليها ٥ كيلو سكر من الجمعية التعاونية فى الشهر فاكر ماما (٧)

طلعت طشت من البيت وكل الناس تحط فية السكر واللى عاوز يشرب شاى أو قهوة بعد الفطار يشرب بس من غير سكر ( ولليوم مازلت اشرب الشاى والقهوة سادة بدون سكر للذكرى )
ودهنا ازاز الشبابيك باللون الازرق بصراحة مية مع زهرة الغسيل لسة فاكر لان مكنش عندنا رفاهية ايامنا دى ( ٨ )

وكانت دروسنا بعد الفطار من الراديو لاننا شهادة كانت اختى الكبيرة تلم اللى فى سنة ٦ ابتدائى وتسمع من الراديو وتكتب وبعدين تشرح لنا
المهم بابا جاب شبكة لسقف العربية ونحمل عليها الكراتين وفى شنطة العربية واخواتى الكبار ياخدو الكراتين اللى عملانها ولمناها من عمارتنا والعمارات ( ٩ )

اللى جنبنا ويبدء بيء فى اننا نوديها الى ميدان الشيخ حسانين وكانت عربيات الشئون المعنوية فى انتظار الكراتين من كل انحاء مدينة المنصورة مش مننا وبس واعتقد كل بيت فى مصر عمل كدة وافضل مننا اكيد المهم فضلنا كدة لحد اقتراب العيد ومتسألشى كنا بنفطر اية وبنتسحر مش مهم إحنا المهم (١٠)

إحنا المهم جنود مصر على الجبهة يوصل ليهم اكلهم وشربهم واقترب العيد وطبعاً مكنش فية حاجة اسمها كحك العيد انا فاكر كويس اوى كل صاجات الكحك والبسكويت مخصصة للجبهة ولن انسى ان تم صرف حصة السكر وكان جنبنا مطحنة سكر يحولة سكر بودرة يترش على الكحك واحلى حاجة لما الحاج / احمد صاحب( ١١ )

الفرن قرر تسوية الكحك والبسكويت مجاناً للى طالع الجبهة عشنا احلى واجمل ايام حياتنا ويوم الاحد ١٤ اكتوبر اقوى معركة جوية دارت فوق سماء المنصورة وقعت طيارة اسرائلية وشفناها وهى مولعة فى السما وفضلنا نجرى وراها لحد بين قريتين قولونجيل والخيارية وجرينا علشان نتفرج وبصراحة اخدت (١٢ )

وحتة قماش من كرسى الطيار للذكرى والطيار استخبى بين الزراعات بس اهل القرية مسكوة وخاف يقتلوة والاجمل بيء لما جابو قطار الاسرى الاسرائليين بعد نصر اكتوبر وهزيمة اسرائيل علشان نتفرج عليهم وهما فى القطار مكشوف السقف ومعمول حديد بدل منة وهما زى القرود والخنازير ومش حقول كنا بنعمل ١٣

ومش حقول كنا بنعمل عليهم اية لاننا كنا واقفين على كوبرى الهابى لاند وهما فى القطار تحتنا ( اكيد عرفتو ههههههههه ) وهما عمالين يشتمو واحنا ...... انا عشت الحرب بالكامل وعشت وقتها وعشت النصر واى حد يحاول يقلل من نصر اكتوبر ١٩٧٣ اعملة بلوك لان دول زيهم زى اسيادهم القردة والخنازير .