لي ٦ اشهر احسب اجمالي مدخراتي من عائداتي الشهرية .. الحمد لله وصلت لنسبه ٤٢٪ من دخلي الشهري يتحول للحساب الإدخاري.. مثال لو دخلي ٢٠ الف ريال فاجمالي الادخار منه ٨٤٠٠ ريال (الرقم مثال عزيزي) .. كيف وصلت لهذي النسبة بعد ما كانت ٢٠٪ فقط؟ 👇
قررت أوفر من الكماليات.. مثلا كنت اشتري قهوة شهريا بحوالي ١٢٠٠ ريال فركزت على الشاي العدني 😂😂 (امزح امزح) خففت من استهلاك القهوة .. مثال آخر: انا من الناس اللي اكل في مطاعم بشكل كبييير جدا وما اهتم للفاتورة اهم شي اكل جديد ولذيذ وانا من عشاق الاكل. قررت اركز وأهدى 👇
الأكل اساسي للمعيشة لكن الذهاب للمطاعم باستمرار يعتبر كماليات.. طبعا من الكماليات اشتراكات شهرية في برامج ما استخدمها ابدا ابدا .. اوقفتها جميعا.. طبعا زمان كنت اصلا ناسي انه انا عندي اشتراكات بس لمن قررت اركز في الادخار بدأ عقلي الاقتصادي يشتغل
الحمد لله ما عندي أي أقساط (لا سيارة ولا بيت) سيارتي اشتريتها كاش أما البيت فأنا مستأجر وما امتلكت لامرين (الاول ما قررت وين استقر والثاني استثماراتي في شركاتي أفضل من استثماري في العقار.. عائدات أعلى) لذلك ما عندي بيت ولا عقار
عدم وجود أقساط عليا ساعدني كثيرا في الادخار.. الامر الآخر هو التركيز على ما اراه مناسب لحياتي.. فما اشتري مثلا ملابس من براندات كبيرة.. ما يهمني لو لبست من من اي مكان اهم شي يكون شكله حلو، بيتي اللي اسكن فيه على قدي ما عندي بيت فيه غرف زايدة وفي منطقة جيدة
أخيرا بسبب كورونا مافي سفرات واجازات فيرضه ساعدني هذا الأمر في رفع معدل الادخار
ممكن تسألني طيب يا سهل ايش استفدنا نصير أغنياء وبرضه نوفر؟؟ انت فاهم غلط: عشان تصير غنير لازم تتعلم تدخر وبعدها تتعلم كيف تستثمر ادخارك بعدها تصير غني.. ( وأما بنعمة ربك فحدث) انت ليش مضيقها على نفسك؟ الدنيا قصيرة ياهو روح انبسط وفلها
عادي فلها واصرف واشتر شنطة جوتشي بس انتبه تتحول لعادة ويتحول الى هوس فترجع لنقطة الصفر وتصرف كل فلوسك.. الكل يعرف يصرف ما يحتاج تتعلم كيف تصرف لكن الإدخار مهارة لا يتقنها الا القليل. فانا لمن اتعلم كيف اتدخر لاحقا حعرف كيف أصرف بكل بساطة..
من الأشياء اللي تساعد في الإدخار هو ثقتك بنفسك.. ها؟ كيف؟ ايش دخل؟ ياهو الثقة بالنفس دي حطوها في كل مكان 😂😂.. لا من جد أكلمك .. أغلب الناس تشتري سيارات أكبر من طاقتها وتسكن في بيوت أعلى من قدرتها بسبب أمر واحد فقط: نظرة الناس لك..
لمن تكون واثق من نفسك ما يهمك رأي فلان عن سيارتك ولا رأي فلانة عن شنطتك.. عندك هدف مالي قاعدة تشتغلي ركزي فيه وانطلقي وحيجي اليوم اللي تشتري فيه شنطة أحلامك وأيضا سيارتك المفضلة يا عزيزي بالذات لو كانت لامبورجيني
على سيرة اللامبورجيني سويت حلقة مهمة عن الادارة المالية الشخصية ومتى تشتري سيارة أحلامك او حتى (شنطة، ملابس، او اي شي غالي نفسك فيه) youtu.be
اتمنى عجبك الثرد .. سؤالي.. هل تعرف أصلا نسبة ادخارك الشهري؟
أخيرا حبيت أقول أنه الرقم كان مثال المرة الجاية حكتب ٢٠٠ ريال .. ركز على النسبة الله يسعدك عشان توصل الفكرة.. عادي لو دخل الشخص مثلا ٣ الاف ريال وادخر ١٠٪ هذا انجاز كويس كبداية وأيضا يفكر كيف يزيد من دخله عشان ال ١٠٪ ترتفع قيمتها .. وسلامتكم
جاري تحميل الاقتراحات...