عايز اكلمكم شوية عن فضل الرياضة ف الاربعينات، ده مش كلام متخصص وانما نابع عن تجربة شخصية لحد شغلانته رابطاه ف مكتب وحياته مشغولة جدا زي معظم الناس اللي فوق الاربعين، طبعا مع الهجوم الوشيك لامراض زي الضغط والسكر و الحاجات بتاعة العواجيز دي
اولا حابب اقولكم اني مريض بالضغط من سن ٣٠ سنة تقريبا بالتالي باخد دوا و الحركة والدايت مهمين لكن كالمعتاد و زينا كلنا وزني زايد عادي جدا و كتير ماباحاولش حتى اكل بشكل صحي، غير اني اصلا بحب الحلويات بشكل مبالغ فيه ومابحطش حدود للي بيعجبني ف باكل زي الحمار
مع دخول الاربعينات و قلة الحركة الواحد بقى بشكل عام كسول جدا، بيكره الحركة (طبعا مع السن كمان انت اصلا مابتبقاش شايف ذاعي للحركة) نومي الكواليتي بتاعته سيئة جدا، مع القهوة و التوتر طبعا بتبقى عايش ف مفرمة ضيف عليهم ادمان التليفون المحمول وارتباطه الدائم بالشغل ٢٤ ساعة
هو بشكل عام انا لازالت صحتي الحمد لله افضل من معظم اللي ف سني و ده بس عشان ف عشريناتي كنت مواظب بشكل جيد عالجيم و بنيت كمية ماس عضلي محترم خلاني مش باتعب بسهولة، غير اني سواء باخس او لا مواظب عالصيام المتقطع بقالي يمكن ٥ سنين بشكل مستمر وفارق معايا كتير ف التحكم ف الوزن
لدرجة اني لما بطلته بس (في الحالتين كنت باكل اكل مليان دهون و سكر) زدت ١٠ كيلو ف ظرف شهرين تلاتة، بالتالي اتعلمت ان دور الصيام كدةًكدة الحفاظ على مكاسب الدايت مش لازم تعمله عشان تخس، هو مفيد بشكل عام ف محاربة مرض السكر بالذات لو انت مابتتحركش كتير
ابتديت من شهر بالظبط المواظبة عالجيم، مش اقل من ٥ ايام اسبوعيا و ماكنتش باضغط على نفسي اوي يعني، شوية كارديو يمكن ٢٠ دقيقة و اوزان حوالي ٣٠ ل٤٠ دقيقة و مركز عالعضلات الكبيرة بتمرين او اتنين مش اكتر و بابدل عليهم، الاوزان مش كبيرة لكن بتزيد مع الوقت
لما ابتديت كان
- نومي سيء جدا
- كسول جدا و باقعد بالساعة اقنع نفسي اتحرك عشان اعمل حاجة بسيطة زي اني اروح المطبخ مثلا
- اي حركة بالنسبة لي مرهقة جدا و متعبة بشكل لا يحتمل
- لو حصل واتحركت يعني باتعب شوية بعديها
- طبعا رغبتي ف الحلويات والاكل زادت مع القعدة دي بشكل رهيب
- نومي سيء جدا
- كسول جدا و باقعد بالساعة اقنع نفسي اتحرك عشان اعمل حاجة بسيطة زي اني اروح المطبخ مثلا
- اي حركة بالنسبة لي مرهقة جدا و متعبة بشكل لا يحتمل
- لو حصل واتحركت يعني باتعب شوية بعديها
- طبعا رغبتي ف الحلويات والاكل زادت مع القعدة دي بشكل رهيب
النهاردة، معدل طاقتي بقى جيد جدا، نومي الكواليتي بتاعته اتحسنت جدا، بقيت باتحرك اسهل كتير وباخلص حاجات كانت عطلانة بقالها كتير، تفكيري بقى اصفى و اسرع حتى ف الشغل والحاجات اللي بتتطلب فكر، بقيت اجري اشتغل عالافكار اللي كانت عطلانة التأثير النفسي حقيقي لا يمكن تجاهله
بالمناسبة برضه انا مريض اكتئاب من نفس الفترة بتاعة الضغط تقريبا بس مبطل الادوية بقالي كتير، حالتي النفسية كانت اسوأ كتير قبل الشهر ده، دلوقتي الامور عاملة زي ماكنت باخد الدوا او احسن شوية، بس من غير دوا
مع العلم نوعية اكلي ماتغيرتش اوي يعني ووزني ماتغيرش كتير (بس ده طبعا لاسباب ليها علاقة بوزن العضات مقابل الدهون و كدة كدة انا م باخد بالميزان اوي) شكلي احسن و بقيت انشط
اخيرا، اربعيناتك اللي بتحدد ستيناتك خيبقى شكلها ايه، اخويا عمره ما راح جيم و بدأ تدخين بدري، حالته الصحية اوحش كتير لدرجة انه عمل قسطرة و عنده مية بيضا على عينه من السكر وهو لسه ناوصلش ٥٠ سنة، وكل ده عشان ف عشريناته ماشافش جيم من جوة (او اي رياضة يعني)
الخلاصة كالتالي: لو سيادتك مهتم تبقى شايل نفسك ف سن كبير ماتفوتش الرياضة، اعتبرها جزء طبيعي من يومك زيها زي الموبايل والشغل، فوايدها الصحية والنفسية اكتر بكتير من شوية خسسان ولا شكل حلو ولا اي حاجة، فوايدها انك هتعيش الحياة وانت قادر تعيشها، مش مستني حد يساعدك
ومايغركش خالص صحتك دلوقتي، الامور بتتدهور بشكل سريع و غير متوقع جدا والتأثير زي ما الكويس بيتراكم الوحش بيتراكم اسرع كتير، ييجي بقى واحد محنك يقولك مانت لو لعبت رياضة برضه هتموت و لو مالعبتش رياضة هتموت
تروح مسقف على افاه عالتحنيكة الغير اصلية دي و تقوله يابن المحنكة فيه فرق بين انك تموت بعد ماتقضي ١٠ سنين عاجز ف السرير و صرفت مدخراتك كلها عالعلاج و بين انك تموت بصحتك وانت بين ولادك اللي ماكلفتهومش من وقتهم و عمرهم ععب وقلق و وقت عليك عشان سيادتك قاعد تفيص ف المستشفى
الخلاصة يعني: ايا كان سنك وايا كان الرياضة اللي بتحبها، العبوا رياضة يوميا انشالله تمشو، ده استثمار ف نفسك اكبر من انك تخس، واكبر من انك تنزل كام كيلو و بعدين ترجع تزيدهم، ده استثمار ف عقلك و قدرتك و حريتك هيعيش طول مانت عايش، اوعى تهمله حتى لو على رقبتك
جاري تحميل الاقتراحات...