منقول عن السيدة منى صبح
المشهد ده لسه حاصل قدامي حالاً
طالعة من ستاربكس شارع سليمان اباظة و فيه ولد زي الفل عارفين الشاب اللي تحسوه بيلمع من كتر ما استحمى حاجة كدة تشرح القلب ضارب نضارة الشمس و رايح يركب عربيته المهم لقى راجل عجوز ساند عليها و فارش قدامه شوية لمون و خس
⁦⬇️⁩

.. الولد قرَّب منه و نزل على رُكَبُه و قعد نص قعدة كدة ، انا قلت هيقوله 'اوعى عربيتي' بطريقة بايخة ،او لو مؤدب هيقوله 'بعد اذنك العربية'..لقيته بيقوله : "بكام الخس يا حاج؟" انا جالي ذهول! انا واثقة ان اللي زي دة كل علاقته بالخس انه بياكله ف السيزر سالاد!
⁦⬇️⁩

قاله "بجنية و نص يابني" الراجل من الذهول رد و هو مكسوف يا عيني قام الواد قاله "واللمون بكام؟" ف اللحظة دي اتأكدت ان الولد شارب حاجة ع الصبح.. انا دايما كنت بقول قهوة ستاربكس بتعمل دماغ و محدش صدقني! قام الراجل قاله:
=الشبكة ب ٣ جنيه
-طيب ممكن تديني ١٠ خس و ١٠ شبكات لمون؟
⁦⬇️⁩

=لا الخس اللي معايا ميكملش ١٠ يا بيه.. دول ٨ و اتفضل آدي١٠ شبكات لمون.
-ماشي
=ثانية واحدة احطهملك ف شنطة.... اتفضل
-معاك فكة ١٠٠؟
=لا بس افك لحضرتك من الكشك. ثانية واحدة
الولد حط الحاجة على كنبة العربية و الراجل خد ال١٠٠ جنيه و بدأ يتعكز ع العربيات رايح يفك
⁦⬇️⁩

واول ما الراجل بِعِد شوية قام الولد مرجع الحاجة كلها وحطها للراجل ع الفرشة و دوَّر العربية و مشي في صمت. يا ربي!
الله يفتح عليك يا ابني و يجعَلَّك ف كل خطوة سلامة..
#الطيبين❤