هنشرح النهاردة Kubler Ross Change Curve وهو أحد الأساليب لفهم عملية التغيير المؤسسي وهنتكلم عن علاقة ده بالتحول الرقمي. كل ده من خلال الفويس نوت المنتشرة مؤخرا بتاعة "عم أشرف وأحمد حسن من خط حلوان". نبدأ الثريد 😁
بيقوم Kubler-Ross بقياس العلاقة ما بين الحالة العاطفية والقدرة على مواجهة موقف فيه تغيير. لو اعتبرنا أن الرقمنة جزء من عملية تغيير بتسبب صدمة، فالعامل البشري بيكون جزء أساسي في مقاومة التغيير عن طريق العمل على الطرق القديمة، وبالتالي تصبح رقمنة منقوصة، تعالوا نشوف ازاي
القصة بتبتدي من أن "أحمد من خط حلوان" تم تدريبه على اسلوب رقمي بيستخدام فيه واتساب لارسال اللوكاشن بتاعة "لأشرف" المسؤول عن ادخال اللوكاشن على نظام رقمي أيضا لغرض متابعة الOperations. أحمد مابعتش اللوكاشن، كده حصل عطل في الProcess أدى لدخولنا طبقا لـ Kubler في Shock.
مع أصرار أحمد على عدم الالتزام لضمان استمرارية الـ Process ونظام العمل الرقمي اللي اشرف هيحط عليه اللوكاشن، طبقا لـ Kubler أشرف بيبتدي يخش في مرحلة Denial وFrustration. في المرحلة دي مع عدم استجابة أحمد بتزيد العصبية عند أشرف خصوصا أن أحمد اتحرك ضاربا بعرض الحائط اللوائح والنظم.
عند نقطة العصبية القصوى عند أشرف بيبتدي يحصل أن طاقته في مواجهة الموقف بتقل ويصل لقناعة بحتمية تغيير اسلوب التواصل عشان يفهّم أحمد ويبرر حالة الصدمة بتنتهي بيه إلى الـ Depression عند Kubler واللي المفروض بعدها تبتدي حالة من التصحيح.. ويظل أحمد على خط حلوان ثابتا على موقفه! 😄
هتلاحظوا أن الفويس نوت وقفت عند الـ Depression لأن أشرف خلاص فقد السيطرة وأحمد غير قادر على فهم المطلوب منه. لكن هل المفروض يكون فيه تكملة للقصة؟ طبعا وده الجزء الباقي من نموذج Kubler اللي هنحاول نكمله :)
أولا لو اعادنا التفكير في الموضوع هنلاقي أن عملية الرقمنة حصلت وفيه نقص في مهارة الرقمنة Digital Competence، يا إما تصميم الرقمنة كان غلط من الأساس. فاذا كان الهدف هو تقليل التفاعل مع العامل البشري فالرقمنة هنا أحدثت احتكاك أكبر مع العامل البشري بيضيع وقت وفلوس ومجهود.
ثانيا مقاومة التغيير ليها أشكال مختلفة، أحمد في مقاومته للأسلوب الرقمي غالبا مكانش بدافع عاطفي ولكنه ممكن يكون بدافع ادراكي ومعرفي Cognitive Resistance وهنا في الصورة ممكن نشوف نموذج من خلاله نتعامل مع اشكال مختلفة من المقاومة في التحول الرقمي واسلوب معالجتها
ثالثا تحليل المخاطر Risk Management. أحنا بنبص دايما على Risk ان النظام يقع أو يبوظ أو الData security وبننسى نحلل المخاطر الناجمة من العوامل البشرية والطبيعية. وبننسى نضع خطة بديلة اعتقادا منا بالحل السهل وهو أن الرقمنة حل سحري للبشرية في حين أن البشر عامل أساسي في نجاحها.
كما أن في التحول الرقمي لو في أي فرصة أن نظامين الكترونيين يتكلموا مع بعض بمفاهيم زي الIntegration والـ Interfaces ده يكون أفضل اختيار! يعني ببساطة لو فيه Tracker بيبعت اللوكاشن بشكل اوتوماتيكي لعم أشرف كان الموضوع هيبقى أسهل من كل الوقت اللي ضاع في الواتساب.
هناك أيضا مفهوم في النظم أسمه Garbage In Garbage Out بمعنى أنك لو صممت نظام رقمي على أعلى مستوى ومدخلاته كانت غير معبرة أو منقوصة بالتالي مخرجاته هتكون أيضا منقوصة لأنها غير معبرة عن حقيقة البيانات المأخوذة من الواقع. كل اللي فات ده مشاكل واضحة من مجرد الاستماع للفويس نوت 😄
أخيرا بننصح عم أشرف مع ادارة شركته انها تقوم باتخاذ اجراءات تعبر عن مرونة تعلمها من الاخطاء اللي بتحصل عن طريق الـ Business Agility وتحاول تعيد صياغة العلاقة ما بين الرقمنة وعمليات الشركة والاهتمام أكتر بالعامل البشري عشان أحمد من خط حلوان وعم اشرف يبقوا على طول مبسوطين وشكرا :)
جاري تحميل الاقتراحات...