بكتب تحت هالتغريدة نصائح للطلاب المقبولين في التقنية او بالاحرى ف جميع الكليات او الجامعات:
اول شيء لازم تعرف انك لما تدخل الجامعه انك بتقابل ناس من مختلف الولايات و مختلفين بالافكار و العقلية و مختلفين ببعض العادات و التقاليد ف انت لازم تتقبل كل شيء حتى لو البيئة الي كنت عايش فيها رافضه اشياء انت لازم تتقبل فكر كل شخص يدرس معك ما شرط تاخذ منه بس ع الاقل تسايره.
قبل ماتدخل الجامعة يمكن لغتك الانجليزيه ضعيفه و بتقول انا غبي بس صدقني من تدخل وتبدا تدرس و تركز مع الدكاتره بتتطور لغتك بسرعه و بتكون سهله ان شاء الله مع الايام لانه الدراسه فالجامعه غير عن المدرسه، انا كنت ضعيف بالانجلش وجايب ٥٢ ف الثنويه بس الحين الحمدلله ف الانجلش اموري طيبه
كون علاقات مع الناس بس تكون بحدود ،كون صداقات وتعرف ع ناس واجدين ما شرط تمشي معهم و تجلس معهم ع الاقل يكون بينكم سلام و سوالف عاديه ، لانك بتحتاجهم ف يوم من الايام حتى لو كانوا ما نفس تخصصك في مواد مشتركة بتدرس معهم مستقبلاً بتحتاجهم فيها ،بس اهم شي تسوي حدود مع كل شخص تتعرف عليه
دائما امشي مع الناس الشاطره الي تهتم بدرجاتها و بدراستها و طلع من حياتك الناس المستهتره ، و اذا مشيت مع الدحاحين بتتأثر فيهم و بتجيب معدل عالي ، و خاصة اذا في مشروع يحتاج جروب اسحب معك الشطار ف جروبك لانه بيسوو كل شيء عشان ما يخسرو درجاتهم عكس المستهترين بيعقوا الشغل كله فوقك.
شيء طبيعي تشوف ربعك و الناس الي حوالينك يتذمروا و ما يقدروا يكملوا دراسه و بعضهم يطلعوا بس انت كمل الى اخر شيء و اخر خطوه ف النهايه محد بينفعك الا نفسك.
دائماً حط لك هدف قبل ما تبدأ اي شيء ، حط لك هدف انك بتجيب A ف الماده الفلانيه ، حط لك هدف انك بتجيب ف الاختبار فل مارك ، حط لك هذف انك بترفع راسك و راس اهلك و بتتخرج بمعدل عالي.
شي طبيعي تحصل الناس تحبطك و تقلل من قيمتك و من قيمة المكان الي تدرس فيه ، و عادي لا تستغرب حتى من اقرب من الناس بيقولو لك تخصصك ماله مستقبل و جامعتك شهادتها ضعيفه ، عليك بس انك تتجاهلهم و تكمل طريقك و تسكتهم بمعدلك و شهادتك لانهم ما وصلوا ل الي انت وصلته.
تذكر انك داخل الجامعه عشان نفسك ما عشان صديقك ما عشان اهلك ما عشان اي حد ، انت داخل هالجامعه عشان تطور من نفسك و تدرس و تجيب معدل عالي و تتخرج.
بتمر ب فتره صعبه و بتتضايق من كل شيء و بتصادف مواد صعبه بعض الاحيان و بتفكر حتى تسحب اوراقك من الجامعه و تطلع ، بس حاول تتخطى هالمرحلة و لا تفكر كذا حاول تفكر ف لحظة التخرج لما تستلم شهادتك من مسرح التخرج .
و اهم شيء لازم انت تذاكر و تشد حيلك و تعطي للدراسه ٨٥٪ من وقتك و اهم شيء تذاكر و اذا تحس نفسك ما تعرف تذاكر اسأل الناس الي تخرجوا قبلك كيف كانوا يذاكروا يمكن تستفيد منهم.
بعض الاحيان في اشياء ما يحتاج تفهمهم او فيه صعوبه لما تفهمهم لا تستسلم حاول و ابحث و اذا ما قدرت ع الاقل احفظهم عشان اذا كتبت اي شيء ف ورقه الامتحان يمكن بيعطوك درجات عليهم.
من الاشياء المهمه انك ما تكون حاسد و تحاول تساعد غيرك مهما كان الشخص و اذا فهمت شخص شيء اكيد بتتثبت المعلومة ف عقلك بسرعة ، و كل ما ساعدت اشخاص كل ما الله يفتح عليك و يشرح صدرك و بتفهم المعلومات بسرعه و اكيد الشخص الي ساعدته بيساعدك ف اشياء ثانيه ف يوم من الايام.
استخدموا هالمواقع بتساعدكم واجد في الدراسه:
•تحط سؤالك و يعطوك حل في اي ماده و فيه ملخصات و اشياء كثيره:
chegg.com
• يساعدك في كتابه الفقرات بطريقة ثانيه و اسهل:
quillbot.com
•تحط سؤالك و يعطوك حل في اي ماده و فيه ملخصات و اشياء كثيره:
chegg.com
• يساعدك في كتابه الفقرات بطريقة ثانيه و اسهل:
quillbot.com
لما تبحث عن موضوع معين اكتب اسم الموضوع ف جوجل و بعدين PDF مثال
( social media PDF )
بيطلع لك تقريبا مواضيع شبه جاهزه خذ منها و لا تنسى الريفرنس.
( social media PDF )
بيطلع لك تقريبا مواضيع شبه جاهزه خذ منها و لا تنسى الريفرنس.
ف مرحلة الفاونديشن اهم شي حاول تبحث عن تخصصك او عن التخصصات الي ف جامعتك و حاول تبحث عن ميولك من سنة الفاونديشن لانك اذا دخلت التخصص و ما عجبك و فكرت تغيره بتتأخر ، لانه في واجد ناس درسوا تخصص و ما عجبهم و غيروه و تأخرو شوي ، حاول تدرس تخصص تحس انك مرتاح فيه و تحبه.
اذا صديقك اختار تخصص معين و انت ما مقتنع فيه لا تختاره لانه ف النهايه صديقك هو الي بيرتاح ف التخصص و انت بتتعذب فيه ، حاول تدرس شي انت تحبه و تكون باحث عن تخصصك ف سوق العمل تشوفه هل هو مطلوب او لا ، لانه في ناس دارسين تخصصات معينه و لين الحين ما توظفوا.
لا تغلطوا مثل غلطتي درست تخصص ما ميولي بس شفته انه مطلوب ف سوق العمل و دفرت نفسي فيه و صح اني تخرجت فيه بمعدل عالي لكن لين الحين ما مقتنع فيه ابدا.
من النقاط المهمه انك تفهم طبيعة مواد تخصصك سواء كانت مواد حفظ او ماث او فيزك ..الخ، و حاول انك تكتب و تلخص كل ماده عشان المعلومات بسرعه تدخل ف عقلك، افضل شيء انك تذاكر اول بأول و تسويلك ملخصات لكل ماده ، انت كذا ما بتنساهم و لما يجي وقت الاختبارات بتذاكر من ملخصاتك و بتفهم بسرعه
و حاول انك تشارك ف الانشطة الطلابيه الي تسويها الجامعه عشان تكتسب مهارات التواصل و غيرها من المهارات و عشان تحطهم ف السيڤي بعدين ، لكن لا تخلي هالمشاركات تشغلك عن دراستك يعني شارك بس بحدود خلي دراستك هي الاهم.
تراه الحياه الجامعية حياه حلوه و ممتعه و حاولوا تتعلموا ف هذه المرحلة اشياء و مهارات كثيره لانه العقل بيكون متفتح ف هذه المرحلة واجد ، حاولوا تتعلموا مهارات ثانيه ما تتعلق بتخصصكم عشان يمكن هالمهارات بتنفعكم مستقبلاً.
و تذكروا انكم ما انولدتوا الا عشان تتخطوا الصعاب و ما انولدتوا عبث ، اذا غيركم قدر يجيب درجات عاليه و يتخرج انتوا كلكم تقدروا بعد .
و دائماً لا تقارن نفسك بغيرك يمكن انت ظروفك غير عن ظروف باقي الناس ، دائماً قارن نفسك بنفسك كيف كنت و كيف الحين انت و ويش حققت و كيف تطور نفسك، ولا تقلل من قيمة نفسك ابدا.
احترام المعلم شي مهم ف هذه المرحلة مهما كانت شخصيته حتى لو كان عصبي و اسلوبه مش حلو ف النهايه انت المحتاج للنجاح، ف افضل شيء تسويه انك تسايره و تمدحه و صدقني لو ضبطت معلم الماده و خليته يحبك بتجيب معه درجات عاليه و بيساعدك واجد.
اذا كان مستواك الدراسي ف الثنويه ضعيف و دخلت الجامعه لا تخاف ولا تحاتي ولا تحبط نفسك، تراك بتدرس خطوه بخطوه و ف كل مرحله بتزيد خبرتك و بتتعود ، اعرف ناس كان مستواهم ف المدرسه ضعيف دخلوا الجامعه تخرجوا بمعدلات عاليه و محد كان يتوقع انهم بيتخرجوا بمعدلات عاليه ، اهم شيء توثق بنفسك.
جاري تحميل الاقتراحات...