رتبها

لو مد الله عمرها كانت هتحتفل بعيد ميلادها المئة زي اليومين دول .
صافيناز ذو الفقار، فاڨيت، أو صاحبة الجلالة ملكة مصر القرينة من ١٩٣٨ ل ١٩٤٨ فريدة فاروق
احب من جلسن من النساء القرينات على عرش مصر إلى قلوب شعبها في العصر الحديث.

دي كانت أول صورة رسمية يشوفها الشعب للملكة المنتظرة ، بنت بسيطة بفستان مقفول بأكمام بدون مجوهرات بدون تاج بدون مكياچ وبدون يشمك وبتسريحة شعر وبسيطة.
اخد الصورة Alban و ذيلت بخبر خطبة الملك المتظر للأنسة صافيناز ذو الفقار والتي اختار لها الملك اسم فريدة تيمنا بتفاؤل والده بالفاء

اختيار نازلي ماكانش من فراغ ، نازلي زكية وداهية، ماختارتش أميرة علوية ولاواحدة من البيت العثماني علشان ماتزودش سلطة البلاط على فاروق ، بنت مصرية من أسرة عريقة ووالدتها محل ثقتها ، وصيفة أولى في القصر بالتالي بنتها لن تجرؤ على منافسة سلطاتها في يوم ما !!

ده غير فكرة إن رضا المصريين على ملكهم القادم اللي اختار واحدة من شعبه علشان تكون جنبه على العرش هيبقى أعلى بكتير وهيقربه ويحببه ليهم اكتر وده اللي حصل فعلا ده غير صغر سن فريدة ١٦ سنة اللي هايخليها سهلة التشكيل على الحماة المخضرمة

التعارف الحقيقي بين فاروق وصافيناز تم في رحلة أوروبا وقت مجلس الوصاية في السنة اللي سبقت تولي فاروق للعرش،صافيناز كانت متربية في القصر و صديقة مقربة لفوزية وفايزة ومع ذلك فاروق ماشافهاش قبل الرحلة غير مرتين ولاحظت نازلي أنها لفتت نظره فطلبت من والدتها يكونوا معاهم في الرحلة

الحقيقة الرحلة دي كانت مفصلية في حياة كل اللي راحوها وماحدش رجع منها زي مارحها
نازلي رجعت وهي دايبة صبابة في احمد حسنين
فاروق وفريدة رجعوا وهما مخطوبين تقريبا
وفوزية وفايزة رجعوا من غير ضفائر الاطفال اللي سافروا بيها إعلانا لبداية مرحلة جديدة في حياتهم

عرضوا على فاروق اسماء اناث تبدأ بحرف ال ف علشان يختار اسم جديد لصافيناز
فرفض فردوس لأن الناس بتنطقه بفتح الفاء ورفض اسماء اخواته و رفض اسم جدته واختار فريدة لانه سهل و له رنين ملكي وأنه بينطق بالعربي والافرنجي بنفس النطق

من بعد الخطوبة ولحين الزفاف أقامت فريدة وعائلتها في سراي الفريد شماس لأن العائلة كانت سكندرية ومالهمش محل إقامة في القاهرة وماتمش اعداد فريدة زي ناريمان لحياة القصور لأنها تربية قصور من الأساس و جاهزة تماما للحياة كملكة
القصر عقد به القرآن وخرجت منه فريدة كملكة