1- لو كلنا نتعامل مع الحساب بناء على المحتوى مكنش ولد يعمل حساب بإسم بنت
طيب ايه اللي ببخليه يعمل كدا!
هو بيشوف حساب البنت عليه تفاعل حتى لو جايبة صورة ايد من جوجل وتقول باركولي اشتريت خاتم ... وهو اصلا عنده ميول انثويه فبيلاقي نفسه ف الهيافة والانحطاط دا

2- لو كل واحده قفلت الخاص للمتابعين فقط وبالتالي تلغي متابعة اللي يكلمها خاص وارتاحت من المضايقات اللي بتجيلها ع الخاص وريحتنا من المحن اللي بيعمله النحانيح بتوعها كل ماتنزل سسكرينة لواحد داخل عندها خاص ... اكيد هيكون احسن

3- اللي عامل برنامج صراحة ياريت يفهم ان فيه ناس هتدخل تشكر في اخلاقة العالية وفيه ناس هتدخل تلعن سلفسيل اللي جابوه بدون سبب فبلاش نعيش الدور في بطولات ومعارك وهمية مع اشخاص افتراضيين ملهمش وجود في الحقيقة
بالمناسبة انا منزل صراحة ومحدش شتمني لحد دلوقتي ولا نزلت سكرين

4- اخيرا .... خلينا نفتكر مع بعض فيلم (طباخ الريس) طلعت زكريا رغم كل الضغوط محدش عرف هو شغال فين حتى مراته بالتالي محدش هيصدق (صقر) بريالة يدعي انه شغال ف منصب كبير لان الناس المحترمة اللي ف مناصب عليا مبيقولوش هم شغالين فين
وكمان مش ببغلطو ف الإملاء يا دكتوره
دمتم بخير وسعادة 🤲

واخر نصيحة لنفسي أولآ
لما تلاقي خناقة بين ستات متدخلش الا لو كنت داخل تنهي الخناقة فقط يعني متبقاش (صبي عالمة)
ولو ست بتتخانق مع راجل ولقيته بيغلط بلغ عن حسابه بهدوء وبلاش تجاملها بالشتيمة .... الا طبعا لو كنت عاوز تعمل قدامها -وقدام غيرها- عنتر زمانك وحامي الحمى يا نحنوح