رتبها

دي قايمة عشوائية بأكتر أفلام بحبها - أو اللي فاكراه منهم دلوقتي - بدون ترتيب معين، وحاولت أنها تكون متنوعة على قد ما أقدر:
بين أفلام يورجوس لانثيموس Dogtooth (2009) هيفضل بالنسبة لي أفضل حاجة عملها في حياته، الفيلم هياخدك في مراحل من الاستغراب للضحك للصدمة اللي هتفضل معاك كتير

أفلام نهاية العالم كلها في كفة و Take Shelter (2011) في كفة تانية لوحده خالص! الفيلم بيتناول نهاية العالم من منظور فردي نفسي عبقري

مع أني بحب Eternal Sunshine of the Spotless Mind بس أكتر أفلام تشارلي كوفمان المفضلة عندي هما بالترتيب Adaptation (2002) وSynecdoche, New York (2008) وبتسحل معاهم كل مرة كأنها أول مرة بشوفهم

Full Metal Jacket (1987)
علشان ببساطة من أعظم أفلام الحرب اللي اتعملت في تاريخ أفلام الحرب

Oldboy (2003)
The Handmaiden (2016)
فخر صناعة السينما الكورية وبارك تشان ووك!

Jagten "The Hunt" (2012)
70% من حبي للفيلم بسبب حبي لماس ميجلسين طبعًا والباقي علشان القصة والسيناريو

Elsker dig for evigt "Open Hearts" (2002)
تاني ماس ميجلسين + نيكولاي لي كوش + من أفضل ما أنتجت الدوجما 95

There Will Be Blood (2007)
بول توماس أندرسون ودانيل داي لويس ثنائي مرعب، ومابيجتمعوش في حاجة إلا ما بتبقى عظيمة.. ده أعظمهم.

Wit (2001)
من أقرب الأفلام لقلبي من جماله وعذوبته. الفيلم بيوثق رحلة أستاذة أدب إنجليزي (بتلعب دورها إيما طومسون بشطارة منقطعة النظير) مع السرطان ورؤيتها الجديدة للعالم من خلال مرضها

Persona (1966)
هاين عليا أحط أفلام إنجمار بيرجمان كلها في القايمة بس هكتفي بالتحفة النفسية\الفنية العابرة للأزمنة دي

$Persona (1966) هاين عليا أحط أفلام إنجمار بيرجمان كلها في القايمة بس هكتفي بالتحفة النفسية\الفنية ا...$

في رأيي ديني فيلنوف من أشطر المخرجين الموجودين دلوقتي.. القصص اللي بيختارها لأفلامه تقيلة وهو عنده رؤية مختلفة عن أي مخرج تاني بتخلي تأثير الفيلم يتسلل تحت جلدك من غير ما تحس. دول أكتر فيلمين بحبهم له:
Enemy (2013)
Arrival (2016)

Enter the Void (2009)
إعجابي بجاسبر نوي إعجاب مريض 😀 بخاف منه كشخص وبخاف من أفلامه بس مابقدرش أبطل أنبهر بيها. ده أكتر واحد بحبه ليه، الفيلم بيورينا نظرة البطل لحياته بعد ما بيموت!

Nymphomaniac Vol. I & II
بالحديث عن العلاقات المريضة ماينفعش طبعًا ننسى لارس فون تريير! فون تريير من المخرجين المفضلين عندي لأسباب يطول شرحها هنا، بس الفيلمين دول بيلخصوا كل حاجة بحبها في أسلوبه

Big Fish (2003)
الفيلم لطيف جدًا ودايمًا بيفكرني بأن القصص والحواديت والخيال هي سبيلي الوحيد لتقبل الحياة

Wind River (2017)
قصة وسيناريو وشخصيات تايلور شيريدان يستاهل عليهم بوسة الصراحة.. على الهادي جدًا الفيلم بيحكي قصة ظابط محلي وعميلة FBI بيحققوا في مقتل فتاة من سكان أمريكا الأصليين

Der Himmel über Berlin "Wings of Desire" (1987)
الفيلم ده يا هتقعوا في غرامه يا هتكرهوا اليوم اللي شوفتوه فيه (لو جالكم صبر تكملوه).. بس في رأيي هو أكبر دليل أن اللغة السينمائية ممكن جدًا تتحول لقصيدة شعرية.

Perfume (2006)
طبعًا الفيلم مبني على رواية باتريك زوسكيند الشهيرة، بس 90% من حبي للفيلم يرجع للدور العبقري اللي عمله بين ويشاو، ولو مكانش عمل غيره في حياته كان يكفيه.. تجسيده لبطل الرواية خلاني أفكر أن زوسكيند كان بيكتبه وويشاو في باله.

In Bruges (2008)
Three Billboards Outside Ebbing, Missouri (2017)
علشان ببساطة بحب كتابة مارتن ماكدونا الذكية لأنه بيفكرني بمسرح هارولد بينتر بس بخفة دم.

Spirited Away (2001)
Howl's Moving Castle (2004)
علشان ببساطة أحلى أفلام ميازاكي

Iris (2001)
الفيلم بيصور حياة الكاتبة البريطانية آيريس مردوك وخصوصًا أيامها الأخيرة وصراعها مع مرض الزهايمر. جودي دينش وجيم برودبينت وكيت وينسلت عملوا فيه أدوار لن تُنسى

Apocalypse Now (1979)
ثلاثية The Godfather من أكتر الأفلام اللي بحبها طبعًا بس لو هرشح فيلم واحد لفرانسس فورد كوبولا هيبقى بالتأكيد ده!

The Road (2009)
جون هيلكوت تفوق على نفسه بمعالجته السينمائية لرواية كورماك مكارثي اللي بتحمل نفس الاسم

Portrait of a Lady on Fire (2019)
The Lighthouse (2019)
من أجمل الأفلام اللي شوفتها مؤخرًا اللي مبنية على الأساطير أو بتستمد مواضيعها منها

Amadeus (1984)
ماعتقدش فيه حد ممكن يشوف الفيلم ده ومايعجبهوش (طبعًا هيطلع لي حد دلوقتي يقول آه أنا شوفته وماعجبنيش 😀)

The English Patient (1996)
قصة الروائي مايكل أونداتجي وإخراج أنتوني مينجيلا وتمثيل رايف فاينز، وحقيقي الفيلم مافيهوش غلطة. الأفلام اللي مأخوذة من روايات - وخصوصًا لو رواية صعبة زي بتاعت أونداتجي - بتبقى مشكلة سينمائيًا بس مينجيلا فرد عضلاته علينا وطلع لنا لسانه وعمل الفيلم ده!