هتكلم عن تجربتي لما أخدت ولادي الهرم الأسبوع اللي فات، أول مرة هكتب ثريد طويل كدة بس استحملوني جوايا كلام كتير قوي عايزة أقوله لإني حزينة جداً إن مكان بالعظمة دي يبقى متاخد بوضع اليد من شوية صيع أو عشان أكون دقيقة مالهمش وصف غير إنهم "قطاع طرق". (١)
من قبل ما نيجي مصر والأولاد بيحلموا باللحظة اللي هايشوفوا فيها الأهرامات عالحقيقة مش في التليفزيون. خصوصاً ابني الكبير اللي كل صحابه في المدرسة مستنيين صوره عند الأهرامات بفارغ الصبر. طبعاً أنا وباباهم اللي طول عمرنا عايشين في مصر ماروحناش الهرم غير مرة أو مرتين في حياتنا (٢)
كنت شايلة هم اليوم ده قوي عشان آخر مرة رحته من ١٤ سنة مع ناس من برة مصر كانت تجربة صعبة جداً بس كان عندي أمل إن الوضع يكون إتحسن. اخترنا يوم الوقفة عشان الدنيا تبقى فاضية وفعلاً الطرق كانت فاضية ووصلنا بسرعة. كنا راكبين أوبر ومن أول ما وصلنا عند بوابة الأمن اللي في أول الطريق (٣)
سألونا عن جنسيتنا واتأكدوا إن مفيش أجانب معانا، ابتدوا يشرحولنا نجيب التذاكر منين وحذرونا إننا هنقابل ناس هايحاولوا يبيعولنا تذاكر أغلى ويوهمونا إنهم هايفرجونا على حاجات محدش يعرفها وقالولنا مانسمعهمش ونتجه لشباك التذاكر بالعربية ومانقفش لحد. (٤)
وفعلاً أول ما طلعنا بالعربية في اتجاه شباك التذاكر لقينا ناس بيخبطولنا على العربية بطريقة هستيرية عشان نقف فا طلبت من سواق أوبر إنه مايقفش وكملنا لغاية ما وصلنا لشباك التذاكر. طبعاً ولادي كانوا ابتدوا يقلقوا فا حاولت أطمنهم إن ده عادي عشان مايخافوش. (٥)
بعد ما اشترينا التذاكر كملنا بالعربية في اتجاه الأهرامات عشان الجو كان حر جداً ومش هنقدر نمشي المسافة الطويلة دي وطبعاً كان في ناس بتحاول توقفنا بحجة إن ممنوع طلوع العربيات عشان نضطر نركب حنطور معاهم بس برضو موقفناش وكملنا. وأخيراً وصلنا وطلبنا من سواق أوبر إنه يستنا معانا. (٦)
عشان كنا قلقانين نفضل من غير عربية، ونزلنا عند الهرم الأكبر وكان معايا tripod بدأت أفتحه وأظبطه عشان نتصور لقيت عسكري جاي نحيتنا بيسألني إيه اللي معايا ده شرحتله إن ده مجرد ستاند بيتحط عليه الموبايل أو الكاميرا عشان منطلبش من حد يصورنا فقالي تمام وسابنا ومشي. (٧)
يادوب باظبط الكاميرا وهنتصور لقيت واحد من اللي بيسموهم خرتية بيعرض علينا نركب حنطور، شكرناه وقلناله مش عايزين طبعاً كرر عرضه كذا مرة وفضل واقف مش عايز يمشي وبدأ يطلب إننا نراضيه بمنتهى البجاحة. مشينا وسبناه مشي ورانا شوية وبعدين زهق وسابنا ومشي. (٨)
شوية واحد تاني جه بيبيع حاجة كدة بيلبسوها البدو على راسهم مش عارفة اسمها إيه، شكرته وقلتله مش عايزين حلف برحمة أمه إنه مش عايز فلوس وإنها هدية لابني الصغير وراح ملبسهاله بالعافية وراسه وألف سيف ياخد موبايلي يصوره بيها وفعلاً بدأ يمد إيده عشان ياخد مني الموبايل، (٩)
حاولت امسك أعصابي وقلت له إني مش عايزاه يمسك الموبايل بتاعي عشان كورونا، بدأنا نتصور وهو واقف جنبنا مش عايز يمشي وبيتدخل ويعلق بكل أريحية وبعد ما خلصت تصوير قلت لإبني يرجعلو البتاعة بتاعته لقيته بكل بجاحة بيقولي طيب لو مش هاتاخدوها راضيني. ماردتش عليه وأخدنا بعضنا ومشينا. (١٠)
طبعا الموضوع اتكرر مع ناس تانية بنفس الطريقة كل ما نحاول نقف نتصور نلاقي حد طالعلنا من تحت الأرض بيعرض علينا أي حاجة ويفضل واقف معانا لدرجة إني بقيت بقول لهم من فضلكم احنا عايزين نتصور سيبونا في حالنا وطبعاً كانوا بيردوا بمنتهى البجاحة راضينا واحنا لسه ماستفتحناش وهكذا. (١١)
كنا بنسمعهم بيشتموا وبيقولوا لبعض سيبك منهم دول مصريين مش هتطلع منهم بحاجة. طبعا في ظل الجو اللطيف ده ما قعدناش أكتر من ساعة ومعرفناش نستمتع بجمال المكان وطبعا لغينا فكرة إننا ندخل الهرم من جوة وكان كل هدفنا ناخد كام صورة ونمشي بسرعة، جوزي كان على آخره وماسك نفسه عشان الولاد (١٢)
ولادي كانوا مذهولين من اللي بيحصل وكان تعليق ابني الكبير إزاي احنا مصريين وبيتعاملوا معانا كده كأنهم اشتروا المكان. خلاصة الموضوع بتتلخص في كلمتين: لو أنا كمصرية كنت حاسة بضيق وخنقة ومش عارفة أستمتع بالمكان وعمري ما هفكر أروحه تاني يبقى شعور السائح الأجنبي هيكون إيه؟ (١٣)
ازاي نتوقع إن السياحة في مصر تزدهر والوجهة الأساسية للسياحة في مصر بالمنظر المخجل ده؟ ليه الدولة ساكتة على المهزلة دي؟ هل الناس دول مستوطنين منطقة الهرم والدولة مش قادرة عليهم مثلاً؟ بقالنا سنين بنسمع عن مشاريع لتجديد منطقة الهرم ومفيش حاجة بتحصل! (١٤)
سواق أوبر قالنا بالحرف: إحمدوا ربنا إنكم مصريين وعارفين تتعاملوا معاهم وتصدوهم إنما الأجانب بينزلوهم من العربيات بالعافية ومابيقدروش عليهم! (١٥)
جاري تحميل الاقتراحات...