الإنسان دائم البحث عن الدهشة... تراه يسافر آلاف الأميال ويدفع عشرات الآلاف، لمجرد أن يتسلق جبل ويشاهد شروق الشمس.. أو يذهب لزيارة ناطحة سحاب، أو يركب قطار سريع... أو يفعل أي شئ جديد، باحث عن دهشته القديمة.. عملية تنقيب عن الطفل المختبئ بداخله!!
الغريب في الإنسان على مر العصور.. أنه يجد المتعة الحقيقية في المشاركة.. يعني تلاقيه دايما عنده حد لازم يرجع ويحكيله.. يحب يشارك فرحته ودهشته واحزانه! عشان كده لما بيمشي عكس اتجاه طبيعته ويقرر يحتفظ ببعض الأشياء لنفسه.. بيشعر أنه هايفرقع!
ساعات كنت باقول للناس.. لو عايش من غير دهشة.. تبقى عامل زي الروبوت اللي اخترعوه وقدروا يعملوا فيه كل حاجة إلا الروح والإحساس.. وفيه شق تاني في موضوع الدهشة... انك ساعات تلاقي دهشتك في رد فعل من حولك.. و ده من أقوى أنواع الدهشة..
فيه ناس بتحب تسيطر على عقول الآخرين وسلوكهم.. بيحبوا يتحكموا في كل شئ حواليهم.. بيفتكروا أن ده مفهوم القوة.. لكنهم مش داريانين أنهم بيقتلوا دهشتهم وبيبنوا لنفسهم سجن كبير في قلب الحياة! ما هي مشكلة السجن في حيطانه.. ومشكلة السيطرة انك بتبني حيطان لغيرك، وبتحبس دهشتك معاه!
الدهشة انك تشوف الغير معتاد في المعتاد... انك تستمتع بشئ قد يكون ممل لشخص آخر.. انك تشوف حاجة حلوة في شخص عادي.. انك تلاقي الجمال في شئ بسيط.. انك تستمتع بوجبة متواضعة مع شخص بتحبه! انك تكون شايف الناس بقلبك مش بعينيك.. تعاملهم مش تستخدمهم!
كل ما توقعات الإنسان زادت.. كلما قلت دهشته وزاد إحباطه! لكن الشخص البسيط اللي ماعندوش توقعات، تلاقيه يفرح بأبسط الأشياء.. الدهشة في نقاوة قلبك مش في جمال من حولك.. الدهشة في البراءة...
علاقتنا مع الخالق كلها دهشة.. لأن فيها أسرار كتير.. المعلوم فيها قليل، والمستخبي كتير.. وحتى المعلوم، مش متشاف.. دهشة بالطبيعة وقوتها، وجمالها.. اتفرج على أي شخص كبير قاعد مع طفل صغير.. سر سعادة الكبير، أنه يشارك الطفل دهشته.. لأن الكبير بقى عاجز عن إنتاج الدهشة
نعمة ربنا على ناس كتير حوالينا، انهم بينسوا حاجات كتير لما بيتقدموا في السن.. بيقولوا عليهم انهم رجعوا أطفال من تاني.. ولما بينسوا، ممكن تلاقي الحزن اللي كان في عينيهم بيختفي..الإنسان بيزعل من اللي بيفتكره..زعلان من الدنيا ومن اللي فيها! زعلان لأنه عايز حاجات كتير ومش قادر ياخدها
الدهشة عاملة زي الطائر اللي بيطير من على سطح الأرض... لكن الإحباط بيكون دايما نازل بصاحبه من مكان عالي... الحياة حلوة.. حتى لو واحد بس وسط ٧ مليار شايفها جميلة.. لا تتنازلوا عن قلوبكم للأحزان والأوهام.. قيمة الوقت أغلى بكثير من أن نضيع حياتنا في بيت الحُزن!
جاري تحميل الاقتراحات...