هاري كين في اليورو مكانش target man صريح، كان اقرب لمهاجم وهمي بينزل كتير يستلم ويسحب مدافع معاه عشان يخلي مساحة للمنطلقين من خلف على رأسهم رحيم ستيرلينج، اللاعب اللي كان بيستهدفه ساوثجيت لاستلام الكرة داخل البوكس كان الجناح او الرقم ١٠ مش المهاجم 1️⃣

شكل تاني من اشكال الهجمة ان هاري كين ينزل يسحب المدافع ثم تروح الكرة لجنب من الاجناب عشان لما تتلعب العرضية يكون كين والمدافع واخدين سبرنت والاتتين وشهم للمرمى بشكل يصعب على المدافع التعامل مع العرضية 2️⃣

كين سواء بثنائيته مع سون او بتوظيفه في اليورو اثبت قدر من التنوع والفهم التكتيكي يضاف لامكانياته الضخمة كمهاجم هداف، نادرًا ما شفت لاعب بالتنوع ده وبيأدي كل الأدوار دي بالكفاءة دي، يعني الحركة خارج المنطقة نقطة اختصاص بنزيما، هو عرابها الاول، لكن بنزيما على المرمى مش بدقة كين 3️⃣

من عجائب القدر ان لاعب بالتنوع ده والاستمرارية دي ميكونش اخد بطولة واحدة لا مع النادي ولا المنتخب، هاري كين هو نموذج صارخ لعدم جدوى تقييم اي لاعب بالبطولات الجماعية اللي بتخضع لمستوى الزملاء والمنافسين ومستوى المدربين ومعايير كتير هو ملوش تأثير عليها