رتبها

ثريد عن القهوة النمبر ون
هحاول اقولكم فيه اللي معظم اللي اعرفه
اعتذر لو الكلام مش مترتب كويس. انا كاتبة اللي افتكره وخلاص وباديكم كلمات مفتاحية وانتم تكملوا طريقكم مع نفسكم واتمنى انه يكون مفيد لكم ويكون مدخلكم لعالم القهوة الاحترافية الواسع اللي اتطور جدا السنين اللي فاتت

واهو ترحموا نفسكم من القهوة الانفريور اللي متعودين عليها بتاعة الكبسولات والموكابوت والامريكان كوفي ماشين والكنكة المحروقة. طبعا اللي بيعتبر النسكافيه جولد والتلاتة في واحد قهوة ده ربنا معاه.
مبدأيا قبل ما نقول بسم الله لازم تجهز 4 حاجات عزيزي الفولور

1- تكون قاطع سكر تماما لأنك لو حطيت سكر مش هاتحس بفرق بين الجديد والقرف بتاع زمان. وماتخافش من المرارة. لو القهوة اتعملت صح وببن نضيف مش هاتمرر بالعكس ممكن تطلع معاك مسكرة لوحدها

2- اي قهوة هاتتعمل هاتكون بماء صلابتها سوفت يعني ملحها قليل بس مش منزوع -مش ماء مقطر يعني- وده تحصل عليها من فلتر 7 مراحل متنضف باستمرار وشمعه بيتغير. او الحل الاسهل والاضمن ازايز مياه معبأة -مش معدنية زي بركة- مكتوب عليها لوو صوديوم زي نستله وداساني

3- ميزان ديجيتال
الرشيو بين البن والماء ده اهم حاجة وعمرك ما هاتعرف تعمله بعينك بس. لازم ميزان وعندك اختيارين
واحد ب100 جنيه بطيء وبيعلق ومالوش تايمر وحساسيته بالجرام وصعب يتحط تحت ماكينة الاسبريسو بس ممكن تسنده بايدك
noon.com

noon.com/egypt-ar/14-6/…

وواحد تاني ب400 جنيه سريع وبتايمر وحساسيته بالجزء من 10 من جرام وسهل يتحط تحت ماكينة الاسبريسو
coffeetalkseg.com
لو الميزانية ماتسحمش ممكن ابو 100 جنيه بس لا احبذه عشان هاتضطر تستخدم ستوب ووتش الموبيل وايدك وعينك هاتبقى مشغولة في كذه حاجة فهاتتلخفن

coffeetalkseg.com/collections/sp…

Coffee scale with timer 0.1g-5kg

Are you coffee lover and like to brew your own coffee every morning? Brewing pour over, espresso, Fr...

هتلاقي حاجات معدية الالفين وال3 زي تايم مور وهاريو .. دول عشان ماركات بس انما فلوس على الفاضي وانت مش ناقص مصاريف فيه بلاوي مستنياك بعدين
4- وقت
تحضير كوب قهوة معتبر عايز بضع دقائق وصبر وطولة بال لو ماعندكش فالثريد ده مش ليك وارجع للقهوة الانفريور بتاعتك

في الاول خالص لازم نعرف انواع محصول حبوب القهوة
هما 2 بس ارابيكا وروبوستا
الفرق بينهم هنا
youtube.com
طبعا بعد ما شوفنا الفيديو عرفنا اننا هانستخدم الارابيكا بس.
فيه ناس بتحب الروبوستا في البليندات عشان تديهم كريما اكتر على وش الاسبريسو بس ده سبب عبيط لا افهمه بصراحة

درجة طحن حبة البن هي اللي بتحدد يتعمل بأنهي طريقة فلتر-اسبريسو -تركي- فرينش بريس الخ
اي نوع بن ممكن يتطحن اي حاجة ويتحضر بأي طريقة وان كان طبعا كل طحنة-طريقة ليها افضلية عن التانية حسب نوتس وتحميص البن

بس في الاخر الموضوع ذوق شخصي بس بنمشي حسب التقاليد في الاول وبعد ما نغوط بنستكشف مع نفسنا
درجات الطحن وطرق التحضير هنا
youtube.com

زي ما اي بن ينفع يتطحن اي درجة فبرضه اي بن ممكن يتحمص اي درجة تحميص
ال3 درجات الاساسية لايت وميديام ودارك وبين كل درجة والتانية درجات تدريجية برضه
وبرضه فيه افضلية لكل طريقة انها تكون محمصة بدرجة معينة مثلا الاسبريسو افضله من الميديام للدارك والفلتر افضله من الميديام للايت

شخصيا مابحبش الدارك ولا اللايت
اللايت حمضية اكتر مرارة اقل
والدارك حمضية اقل مرارة اكتر
وانت وذوقك
وفيه افضلية تحميص برضه لكل سلالة قهوة يعني السوماترا من ميديام دارك لدارك والبنما جيشا مثلا من لايت لميديام وهكذا

وفي الاخر برضه الموضوع ذوق شخصي ممكن بعدين تلعب مع نفسك وتعمل اللي محدش بيعمله
وهنا معلومات اكتر عن درجات التحميص والفرق بينهم
youtube.com

التحميصة لازم ترتاح
اسطورة شائعة ان التحميصة الفريش اوي دي افضل من المركونة. في الواقع الاتنين غلط التحميصة لازملها ترتاح فترة -كحبوب مش محطونة- وبعدين تتطحن وتستخدم في وقت محدد وبعد الوقت المحدد ده البن بيبدأ يفقد طعمه

البن اللي معالجته مغسولة بيرتاح من 4 ل7 ايام بعد تاريخ التحميص اللي غالبا بيكون مكتوب على الكيس
واللي معالجته طبيعية او جافة بيرتاح من اسبوعين ل3 اسابيع من تاريخ تحميصه
نعرف معالجة البن منين؟مكتوب على الكيس
يعني ايه معالجة؟وتفرق ايه في الطعم؟ الاجابة هنا
youtube.com

بعد ما ريحت التحميصة لازم تحافظ على قهوتك وتستهلكها قبل ما تفقد طعمها
ده فيديو ممكن يساعدك
youtube.com
ومعروف ان التحميصة الدارك بتفقد طعمها بعد 6 اسابيع من تاريخ التحميص- مش من انتهاء فترة الراحة ركز- والتحميصة الميديام او اللايت بتفقد طعمها بعد 8 اسابيع

يعني يفضل ان الاستهلاك يكون في الفترة دي فتجيب اكياس قليلة ربع كيلو مثلا ماتجيبش بالنص والكيلو عشان توفر ثمن الديليفري او المشوار

هاتسمع "سنجل اوريجن" كتير
يعني ايه سنجل اوريجن؟ يعني مش بليند
يعني ايه بليند؟ يعني توليفة
البليند ده بتعمله المحامص "عبد المعبود" والبراندات التجارية " لافازا" او الكافيهات "ستاربكس" بخلط سلالات وتحميصات مختلفة من القهوة بنسب معينة للوصول لاطعمة متوازنة وجديدة وكل بن يغطي على..

نقط ضعف البن التاني وكل جهة انتاج تعلي على التانية في الحوار ده ودائما فخر كل جهة بتكون حاجة اسمها "الهاوس بليند" دي التوليفة اللي هما عملوها بعد تجارب مع نفسهم ومحدش يعرفها غيرهم وفيه توليفات او بليندات تانية متداولة بتكون معروفة للكل زي السوبر-ميجا كريما او الكلاسيك اسبريسو

وفيه بليندات موسمية واصدار محدود زي اللي ساعات ستاربكس بتنزلهم وقت الكريسماس. يفضل تجيب بليند من المحمصة عشان بيكون فريش عن البراندات. عشاق القهوة بيعتبروا البليند حاجة انفريور والجيمر الحقيقي يشرب سنجل اوريجن. ماتسمعش كلامهم وماتخضعش للارهاب الفكري واشرب اللي طعمه يعجبك

بس ده اخرك في التمرد. ماينفعش يا حمادة تقول طب ما احط سكر بقى .. مش سايبة هي

السنجل اوريجن لما ياخد تقييم من جمعية القهوة اعلى من 80% بيتصف كقهوة مختصة او سبيشلتي كوفي
اذن كل سبيشلتي كوفي سنجل اورجن ( وارابيكا طبعا )
وليس كل سنجل اورجن سبيشلتي كوفي
وبيع السبيشلتي كوفي لازمله رخصة ورقم عضوية في الجمعية. اطلب من البائع يوريهوملك ولو رفض اعرف انه نصاب

المفروض اللوجو ده لو على الكيس يبقى هو واخد الرخصة.. وغالبا مش هايعمل كده الا لو كان واخدها فعلا عشان دي فيها حبس

كل سنجل اوريجن بيكون مكتوب عليه النوتس بتاعته ودي الاطعمة والروائح والايحاءات اللي القهوة بتديهالك في الرائحة والطعم والافترتست. وطبعا دي حاجة طبيعية مش مكسبات طعم صناعية زي الشاي ابو نكهات كده لأ البن طبيعي تماما بس كارف على كراميل او مكسرات او شيكولاتة او فواكه الخ
صورة توضيحية

كل تحميصة وكل طريقة تحضير وكل فترة استخلاص بتظهر نوتة على حساب التانية يعني ممكن تجيب بن يمني موكا تعمله فلتر تلاقيه عنب تعمله اسبريسو تلاقيه بسكويت ويفر تحمصه دارك تلاقيه شيكولاتة تحمصه لايت تلاقيه قصب سكر و تنزله اسبريسو في 20 ثانية تلاقي مكسرات تنزله في 30 ثانية تلاقي شكولاتة

كل سنجل اوريجن ليه قوام او بودي. فول بودي يعني تقيل ميديام يعني ميديام الخ. تعرف البودي منين؟ مكتوب على الكيس
وبرضه البودي ده ليه افضلية درجة تحميص وطريقة تحضير. مثلا الميديام بودي ممكن يعوز تحميص ميديام مش دارك ويكون افضل للفلتر من الاسبريسو وهكذا

اسم البن السنجل اوريجن بيكون مكون من شطرين
"اسم الاقليم المزروع فيه "يمني" مثلا واسم السلالة "موكا" مثلا
"يمني موكا"
وفيه يمني خولاني ويمني حرازي. يعني مفيش حاجة اسمها بن يمني كده بس عشان اليمن فيها 5 سلالات او اكتر. نفس الموضوع مع البرازيلي والاثيوبي وكله

خلصنا الجزء النظري نروح للعملي بقى
اول طريقة تحضير
القهوة التركي
بدأنا بيها كونها الارخص والاسهل والاكثر شعبية في مصر
جربت طرق كتير ودي افضل حاجة قابلتني
youtube.com
عشان تضبط النار كده = عين البوتجاز الصغيرة تعليها على الاخر وغالبا هاتفور في دقيقتين

لسبب هاتعرفه قدام صعب او شبه مستحيل تطحن قهوة تركي في بيتك فالافضل انك تجيب تموين الاسبوع باسبوعه عشان الريحة ماتطيرش
وارجع لفيديو ازاي تحافظ على قهوتك فريش
وطبعا مفيش حاجة اسمها القهوة ترتاح بعد ما اتطحنت
طالما اتطحنت يبقى تتشرب في اقرب وقت اسبوع اسبوع ونص بالكتير وتكون خلصانة

البليندات والتحويجات اكتر حاجة بتليق عليها هي التركي.. اذواق بس انا بحبها من عير تحويجة وسنجل اوريجن

ثاني طريقة
الفرينش بريس
اسهل حاجة في الدنيا وطحنته ممكن تتجاب باحقر مطحنة .. هو بن متكسر اكتر ماهو مطحون اصلا وموجود في كل حتة زي ايكيا وسوق والرخيص زي الغالي في الاداء يعني ماتجيبش بألف جنيه وتفتكر ان ده استثمار او هايخلي طعم القهوة افضل
الطريقة هنا
youtube.com

فيه ناس بتقول ان قهوته مزيتة -عشان لم تمر بفلتر - ومش نقية كفاية.. وفيه ناس بتقول هذا هو ذوقي
انت وذوقك
انا شخصيا لسه ماجربتوش ومش متحمسة اوي

ثالث طريقة
الايروبريس
ناس كتير بتعتبر الايروبريس سوبريور عشان جامع بين 3 طرق للتحضير "النقع والضغط والترشيح" وحجمه صغير وسهل التنظيف والاستخدام، وله عدد لا نهائي من الوصفات ممكن تعمل بيه قهوة خفيفة زي الفلتر وممكن تعملها تقيلة اوي قريبة للاسبريسو -(مبالغة شوية.. شويتين)

وممكن تحط 2 فلتر بدل واحد عشان تقلل الزيوت ومايبقاش زي الفرينش بريس. يعني اداة سحرية في ايدك
شوف فيديوهات الايروبريس على التشانل دي ومبروك انت بروفيشنال دلوقتي
youtube.com
وبيتعمله مسابقات عالمية واقليمية في اوروبا والخليج ممكن تلاقيها على يوتيوب

youtube.com/channel/UCMb0O…

James Hoffmann

Hi! My name is James, and I make videos about anything and everything to do with coffee, occasionall...

فيه ايروبريس وفيه ايروبريس جو.. الاتنين حاجة واحدة بس جو ده اصغر عشان تبقى تخرج بيه
سعرهم في مصر من 800 ل1200 على حسب هاتجيبه منين وفيه عروض ولا لأ
ارخص ايروبريس لقيته في مصر كان هنا
sevenfortunes.com
لو فيه ارخص ياريت حد يفيدنا

sevenfortunes.com/product/aeropr…

رابع طريقة
cold brew
مابحبهاش فمش مهتمة. بس هتلاقوا طريقة عمايلها على يوتيوب . وبرضه طحنتها كبيرة اوي ممكن تتجاب بارخص واحقر مطحنة زي الفرينش بريس بل اكبر واسهل

خامس طريقة
قهوة سريعة الذوبان
ايوه زي نسكافيه ودافيدوف
بس سبيشلتي كوفي wow
هتلاقيها هنا
sevenfortunes.com
ماعرفش حد جربها ومفيش ريفيوز بس قولت اقولكم على الاكتشاف الغريب ده. وغالية جدا زي ما انتم شايفين الكوباية كده ب30 جنيه.. تقريبا عاملينها لرجال الاعمال اللي خلقهم ضيق

www.sevenfortunes.com

سادس طريقة واكثرهم فرهدة
pour over
اعرف التكنيك الاول
من الفيديو ده
youtube.com

وقبل ما تشتري حاجات غالية
اعمل لنفسك تست شوف الطريقة دي ليها عيش معاك ولا فاكس
اعمل زي ماعمو الشيخ هنا ما عمل
youtube.com

وافتكر ان التحميص اللايت ممكن معاه مايه مغلية او لحد 95 والتحميص الميديام ممكن معاه 95 ل90 والدارك 90 لحد 85 وطبعا لا ينصح بالدارك في الطريقة دي
وده فيديو لتدمير اسطورة انك لو دلقت مايه مغلية على اي قهوة هاتتحرق وطعمها هايبوظ
youtube.com

فالمغلية في الكاتل مش هاتبقى مغلية في القمع وعموما استنى 10 ثواني كده بعد الغليان قبل ما تصب لو التحميص لايت واستنى 20 ثانية لو التحميص ميديام

او ممكن تشتري ترمومتر اللحمة ده حتى لو مش هاتستخدمه في القهوة هاينفعك فى الطبخ او حتى في معرفة درجة حرارة الغرفة.. ركبه في البراد او الكاتل
كان موجود هنا بارخص سعر بس خلص.. مسيرهم يجيبوه تاني
وممكن تلاقيه في سوق او نون او جوميا بعدين
coffeetalkseg.com

coffeetalkseg.com/collections/ho…

وطبعا البراد لو كان بيتعمل فيه اي حاجة بريحة او مايه من الحنفية لازم الاول يتغلي فيه ملح ليمون ويتشطف كويس قبل ما تحط مايه القهوة المعبأة
عجبتك الطريقة وحبيت تعيش عليها طور من نفسك بقى فيه سمارت كاتل بيثبت درجة الحرارة ب3 الاف جنيه وفيه كاتل بوزه جوز نك ب500 جنيه يخليك تصب افضل

وبدل القمع هات حاجة محترمة
اعمل انت سيرش على الفرق بين الاتي
v60
chemex
kalita
Clever Dripper ده الاسهل خالص والنتيجة ممتازة حسب الشهادات
وده فيديو له
youtube.com

بس مش موجود في مصر معلش هههههه بس ان شاء الله يجيبوه قريب

وفيه خازوق كده اسمه "السايفون" ماعرفش حد جابه الا الخلايجة وفرهدة وكبير وصعب يتنضف وماعرفش ايه ده اصلا وبس قولت اقولكم عليه برضه

الفلاتر ساعات بتشح في السوق بس المفروض تكون موجودة فى الهايبرز وسوق ونون وجوميا.. والفلاتر احجام يعني لو هاتعمل ليك لوحدك هات حجم 1-2 ولو كوبايتين يبقى حجم 4 وكده.مالوش لازمه الانواع الغالية زي هاريو وكده فلاتر مليتا ممتازة والفلتر عامل من جنيه لجنيه ونص
noon.com

noon.com/egypt-en/coffe…

او من هنا زي ما قال عمو الشيخ في الفيديو
facebook.com

facebook.com/alex4supply

سابع طريقة
نجم النجوم
الاسبريسو
ده محتاج كلام قد اللي فات كله فليه ثريد لوحده بعدين بقى
وفيه هاقولك برضه على المطاحن المنزلية وتجيب البن منين

ارحب بالاستفسارات بس ياريت تكون ريبلاي على الحتة اللي بتسألوا فيها عشان ماعيدش كلام كتير لكذه حد
بلاش دي ام او كيورياس كات
وياريت الاستفسار يكون بعد ما تكون عملت بحثك مع نفسك عشان مفيش ارخم من الاسئلة اللي اجابتها في اول نتائج جوجل

وطبعا انتم عارفين اني شخصية مستهدفة من قوى اقليمية وممكن اموت سوشيال في اي وقت فكوبي باستا للثريد وخليه عندكم بلينكاته. عشان لما اموت واصحى تاني محدش يقولي اكتبيه تاني

هتلاحظوا ان كل فيديو من قناة شكل
ده لسبب
انكم تتعرفوا على القناة وتقلبوا فيها وثقافتكم تزيد اكا تتجننوا

نكمل كلامنا
النهاردة هانتكلم عن الاسبريسو والماكينات والمطاحن وشراء البن

نبدأ بالاسبريسو
الاسبريسو هو القهوة اللي نازلة من بن مطحون طحنة معينة اتعرض لضغط 9 بار او اكتر بماء حرارتها 94
اي حاجة غير كده هي اسبريسو-لايك .. او اسبريسو الغلابة ومش اسبريسو بجد
اسبريسو الغلابة ممكن يتعمل بالايروبريس زي ما قولنا قبل كده فوق
youtube.com

وطبعا ممكن يتعمل بالموكا بوت اللي مش بتجيب 3 بار حتى
بشكل عام لو الاسبريسو بالنسبة لك هو الحاجة اللي بنحطها على مشروبات اللبن فالافضل انك تكتفي بدول من غير تكلف الماكينة والمطحنة الكويسة

مؤخرا نزل موكابوت بتجيب 9 بار وبتعمل اسبريسو بكريما معتبرة بس سوقها مامشيش لانها اغلى من ماكينات زي الديديكا مثلا
youtube.com

نيجي بقى للاسبريسو 9 بار فما فوق
ليه طريقتين
المكن اللي احنا عارفينه
والطريقة اليدوية
النسخة السهلة والاقتصادية والمتنقلة من اليدوية هنلاقيها في النانوبريسو
youtube.com

والمكلفة والثابتة في اختراعين
الفلير
youtube.com
والروك
youtube.com
وطبعا لا ينصح بيهم خالص لأنهم مش رخاص من ناحية واسبريسو المكن افضل طعما واسهل في الاستخدام من ناحية تانية
عملوها ليه طب؟ والله ماعرف يابني

المكن بقى
بيتقسم نوعين
تجاري ومنزلي
التجاري طبعا كبير وكذه جروب (الجروب اللي هو الحنفية اللي بينزل منها اسبريسو ) بس فيه تجاري جروب واحد وحجمه صغير شوية
ليه مينفعش تجيبه؟

عشان غالي جدا وبيسحب كهربا كتير وبيقوم في 10 دقايق او اكتر ومحتاج وصلة مايه وفلتر شديد ومعمول عشان يستحمل الانهاك اليومي والعمل المتواصل لساعات

لو ميزانيتك مفتوحة وحابب تجيب تجربة المكن التجاري لمنزلك ابقى هات مكن منزلي فيه حاجتين
1- Rotary Pump
2- Dual Boiler
هاتعرف في السلسلة التعليمية للاسبريسو ان الضغط الثابت مش المتذبذب بيحسن جودة الاسبريسو بشكل ملحوظ وده اللي بتعمله الروتاري بمب

وان الحرارة الثابتة للماء من اول نقطة اسبريسو بتنزل لاخر نقطة دي مهمة برضه وده اللي بيعمله الدويل بويلر. ده غير نقطة ان تبخير اللبن واعمايل الاسبريسو ممكن يتعملوا في نفس الوقت وده مش بيحصل في المكن اللي مفيهوش دويل بويلر
youtube.com

وفيه كمان
PID controller
ده ايه وبيعمل ايه؟ وفي الماكينة ولا بتركبه؟ مهم قد ايه؟
youtube.com

لو ماكينتك سمعتها كويسة في ثبات الحرارة فغالبا مش هاتحتاجه
فيه ناس عدت كل المستويات بتحب تلعب مع نفسها مع كل بن جديد تجيبه تعلي وتوطي درجة الحرارة اثناء استخلاص الاسبريسو عشان تجيب نوتس مابتتجابش قبل كده وحاجة كده اكن واحد قاعد بيعزف
شغل معاشات يعني ملناش دعوة بيه

المكن الغلبان اللي هو من الفين ل 15 الف جنيه مثلا طبعا مفيهوش روتاري بمب وفيه بدالها فايبريشن بمب ومفيش دويل بويلر - بس فيه مكن معروف عنه ثبات درجة الحرارة - بس ده مش معناه ان فرصتك ف صنع اسبريسو 100/10 انتهت

لأ فيه حاجات كتير تخلي اسبريسو جي من ماكينة بالفين جنيه شبه اسبريسو جي من ماكينة ب50 الف جنيه لدرجة ان ممكن خبراء تذوق في الكار بقالهم سنين يسقطوا في blind taste test بين المكنتين

طريقك نحو الاسبريسو المثالي حاجتين
1-الباسكت غير المضغوط ببورتافلتر مكشوف
2- مطحنة ممتازة (كلمة "كويسة" بس مش كفاية)

الماكينة بيجي معاها بورتافلتر مقفول بباسكت مضغوط عشان ده مستوى المبتدئين اللي بيجيبوا بن مطحون جاهز او بيطحنوه بمطحنة اي كلام . فالضغط ده عشان يضبط ديفوهات الطحن وينزل الشوت "معقول ويتشرب" بس طبعا مش ممتاز

عشان تعمل ابجريد للباسكيت غير المضغوط واللي بينقل الاسبريسو بتاعك من 5/10 ل10/10 محتاج
1- بورتافلتر مكشوف بباسكت غير مضغوط - ضاااه- بس اتأكد انه مناسب لماكينتك لأنهم احجام
2- موزع وضاغط
بيتباعوا كل واحد لوحدهم بس الافضل تجيب اللي وشه موزع وظهره ضاغط اسهل وارخص

ارخص سعر في مصر هنا
coffeetalkseg.com
بس لو جالك من بره الخليج او الغرب هايكون ارخص وماعتقدش هايتجمرك ده حتة حديدة
المهم تتأكد ان حجمهم مناسب للباسكت.. معظم المكن باسكته 51مم بس فيه مقاسات تانية

coffeetalkseg.com/collections/ho…

نيجي للمطاحن بقى
نوعين اساسيين
المطحنة الشفرات
ودي بتكسر البن مش بتطحنه وعاملة زي مطحنة التوابل بالضبط مجرد شفرتين ويلفوا يكسروا البن

دي قمامة طبعا لا ينصح باستخدامها خالص.. ممكن مقبولة في حالة الكولد برو او الفرينش بريس عشان طحنتهم بتكون كبيرة اوي وبرضه الافضل ان الاتنين دول يكونوا بمطحنة تروس.
والمطحنة التروس بقى دي نوعين
كهربائي ويدوي
والتروس نفسها بقى نوعين
تروس فلات وتروس مخروطية

نظريا الفلات افضل بس لو المخروطي كانت ممتازة مش هاتحس بفرق خالص
وكده كده هانخلينا فى المخروطي عشان غالبا هانجيب يدوي لو عايزين باسكت غير مضغوط
مفيش الا المطاحن الهاي اند اللي هاتريحك في حوار غير المضغوط زي
1zpresso-k plus

او الاقل راحة في الاستخدام لكن نفس تناسق الطحنة
1zpresso-k pro
وممكن اصدارات ال
Comandante
المناسبة للباسكيت غير المضغوط
غاليين في مصر بس لو جولك من بره هايبقوا بنص الثمن.. شوف حد يجيبهوملك من الغرب او الخليج افضل كمان وارخص من السعر العالمي

اي حاجة تانية مش هاتديك النتيجة الممتازة ولو اديتك فالطحنة هتاخد منك وقت كبير وهاتحس بعبء عمايل الاسبريسو وممكن تلاقي حوارات زي ان الصمولة تفوت يعني طلعان دين وماتصدقش الريفيوز مدفوعة الاجر بتاعة اليوتيوبرز النص كم

المطاحن الكهربائية اللي تديك اقل من نتيجتهم سيكا ثمنهم لو جم مصر هايبقى فوق ال15 الف اشهرهم "نيش زيرو" و "يوريكا" وطبعا ماينفعش تطلبهم من بره عشان الجمارك. اليدوي مش هايتجمرك طبعا

ماتفكرش تجيب مطاحن تجارية اللي في الكافيهات دي عشان دي الفاقد جواها بيكون كتير. مش فارقة معاهم لانهم بيطحنوا نفس الطحنة لنفس البن طول اليوم فالي محشور في تروس الماكينة عادي ينزل الطحنة اللي بعديها انما في البيت انت بتطحن قليل اصلا ده غير انك هاتغير البن كل شوية ومش عايز حاجة تكرف

تجيب انهي مطحنة؟
لازم الاول تقرر هاتشرب انهي مشروب..لو باسكت غير مضغوط يبقى المطاحن السابق ذكرها... بتجيب بقيت الطحنات بشكل ممتاز برضه عشان كده غالية عشان الرينج بتاعها كبير وده نادر في عالم المطاحن

لو مش بتحب الاسبريسو ودماغك في الفلتر ففيه مطاحن ممتازة له... "تايم مور" مسيطرة على مطاحن الفلتر بس مش بتجيب درجة غير المضغوط. خلي بالك .. وطبعا ارخص.
لو هاتشرب فرينش بريس هات اي مطحنة بس بلاش يدوي رخيصة عشان مش بتضبط الفرينش بريس. يفضل كهربائي رخيصة زي ديلونجي التروس kg79

التركي بقى هو المشكلة لأن حتى المطاحن اللي بتجيب تركي زي زبريسو وكومنتادنتي والمطاحن الكهربائية لا ينصح انك تستخدمها فى التركي لأن التركي ناعم جدا فالتروس بتتاكل لأنهم قريبين جدا في الطحن من بعض وعمر المطحنة هيقصر

الطحن اليدوي للتركي هياخد 7 8 دقايق يعني حاجة غير منطقية تتعمل. فيا الا تجيب مطحنة تركي تجارية في بيتك ودي هاتبقى غالية وكبيرة وصعب تغير نوع البن الا لما تفضيها وتنضفها وصعب تطحن 7 جرام بتوع الكنكة لوحدهم
يا الا تجيب التركي مطحون ثمن كيلو وخلاص وتستخدمه في خلال اسبوع

فيه مكن bean to cup
بيكون مدمج فيه مطاحن غالبا مابتكونش كويسة لغير المضغوط بس تنفع للمضغوط .. وهي اختيار كويس للكسالى اللي لازم يشربوا اسبريسو
بيبدأ في مصر من 9 الاف جنيه

نيجي لمكن الغلابة اللي تحت ال9 الاف بقى
بما ان كله فايبريشن بمب ومفيش دويل بويلر ف وانت بتشتري الماكينة يكون عينك على اهم حاجة ثبات درجة حرارة الماء اثناء الاستخلاص.. سمعة الماكينة في الحوار ده اعرفه من المستخدمين المحترفين لها اللي دائما هتلاقيهم في قسم الاسبريسو على ريديت

ودائما كل ماكينة هايكون لها التركات بتاعتها للحوار ده زي انك تشغلها قبل الاستخلاص على طول تنزل على الفاضي وكده..
اعرف الماكينة بتاعتك المفروض تضبط حرارتها ازاي

الفيديو ده هايفهمك الموضوع اكتر وماتنساش تشوف بقيت حلقات السلسلة دي عشان تعرف بقيت الامور عن الاسبريسو
youtube.com

نيجي للبن بقى
البن التجاري
ده الماركات زي "لافازا" و"ايلي" و"بيليني" - ديث ويش ده قمامة محدش يجي ناحيته- ده بعضه بيكون بليند 100% ارابيكا والمعظم بيكون بليند ارابيكا وروبوستو .. وتقريبا مفيش سنجل اوريجن منه

صعب تجيب منه ايحاءات حمضية فغالبا هتلاقي معاك الدارك شوكليت والاطعمة الجلدية والخشبية والسموكي وممكن كراميل او مكسرات
متحمص من بدري طبعا وده بيقلل من جودته
فيه منه حبوب وفيه منه مطحون
دول غالبا بيكونوا للاسبريسو بس وكويسين لو هاتضيف عليهم لبن
ماينفعوش خالص للفلتر والفرنش بريس

حسب الريفيوز افضل تجاري في السوق دلوقتي هو "بيليني 82 "

البن بتاع الكافيهات زي ستاربكس وكوستا ودنكن دونتس وسلينترو ماعرفش اي معلومات عنه بصراحة... اللي يعرف يقولنا

السنجل اوريجن والسبيشلتي كوفي
دول لازم يتباعوا من مكان ما اتحمصوا
مش لاقية سبب يخلينا نجيبهم من مكان تاني غير "نبيل عبد المعبود" بسبب اسعاره الجامدة جدا بس برضه نقول على اماكن تانية زي "عمرو حسن" في 6 اكتوبر و "جافا سبيشلتي كوفي"

وماتتكسفوش تتكلموا مع الادمنز تسألوهم على كل حاجة وتقولولهم انتم عايزين تشربوا ايه وهما يرشحولكم

في السنجل اوريجن الغالي مش بالضرورة ثمنه فيه
القهوة اللي سعرها مجنون ده بسبب ندرتها مش لأنها افضل حاجة. يعني البنما جيشا كانت محبطة جدا لمعظم اللي جربوها بينما الكولومبي اللاميسيتا شعبيته رهيبة ومن احلى البن اللي دوقته وبينفع في كل طرق التحضير رغم انه رخيص جدا

وفيه شيء انفريور اسمه pods ده ممكن نعتبره كبسولات للمكن اللي مش بياخد كبسولات.. بلاش تعرفوا اللي بيستخدم البتاعة دي بنسميه ايه وسطينا

اعتقد كده خلصنا خلاص
اتمنى اني اكون ساعدتكم
ممكن تاخدوا الثريد اي مكان بدون ملكية فكرية
هاسيب لينكات كتير عشان تكملوا معاهم هما بقى
افضل يوتيوبر قهوة في العالم.. رغاي شوية بس استحملوه
youtube.com

youtube.com/channel/UCMb0O…