كلمتنى انسه محترمه و مهذبه في التليفون وواضح من اسلوبها والاكسنت بتاعتها إن أهلها صرفوا عليها كتير فى تعليمها ودخلوها جامعه من 3 حروف ، عرّفتنى بنفسها و بكل ذوق قالتلى :
-فيه صديق رشح حضرتك لمشروع Twin villas فى كومباوند مش عارف إيه كده الجديد.
قاطعتها وقولت أوفّر وقتها و مجهودها

وقولتلها بكل شياكه وذوق ونبره مليانه ثقه :
= أنا مش غني يا هايدى..
قالتلي يافندم الموضوع مش محتاج تكون غني الوحدة عندنا بتبدأ من ثري ميليونز بس !!
قولتله بكل شياكه وذوق تانى برضه :
= انا مش معايا ثرى ميليونز يا هايدى..ولا ميليونز واحد حتى..سامحينى
- يافندم فيه تسهيلات ف السداد..

إنت ممكن تدفع بس 200 الف بس دفعة تعاقد..
= ولا 200 ألف حتى يا هايدى..انا معايا عربية نيسان صنى يا هايدى..سمعانى ؟
- طب أنا ممكن أعملك عرض بطريقة مختلفة.. إيه رأيك؟
= صنى 2014 يا هايدى..
- طب يا فندم.. ايه رأيك لو..
= هايدى عارف أنا كنت بفكر ف إيه قبل ما تكلمني ؟
- إيه يا فندم ..

= إني عاوز أعمل صيانة و اغير زيت للعربيه و مزنقه معايا و بفكر هجيب فلوس الصيانه منين..
سكوت تاااااام ..
= والله يا هايدى مش معايا فلوس..صدقيني..انتى كلمتى الشخص الغلط..انا عامل عليكى والله..
- طيب ممكن ترشحلي حد صاحبك معاه فلوس ؟
قالتلى كده لقتني مقتول ضحك..لحظه ما افتكرت اصحابى

القريبين منى اللى هيدخلوا السجن قريب مالشيكات و القروض اللى عليهم
قولتلها اقفلى يا هايدى اقفلى الله يرضى عنك عاوز أكمّل شغل عشان انا دكتور وفي عيان عنده امساك بقاله 3 ايام مدخلش الحمام واحتمال اعمله حقنه شرجيه..فأقسم بالله ما ناقصك..
#محمد_الامام
#Dina_Amin
#Cpd