تخيلوا معايا كده.. واحد شايل شنطة وزنها ٥٠ كيلوجرام ومشي بيها مسافة نص ساعة وشالها من على ضهره ورماها على الأرض.. في المقابل، واحد تاني شايل كوب من المياه وزنه ٥٠ جرام وفضل فارد ذراعه وواقف مكانه وماسك الكوب لمدة يوم كامل! مين فيهم هايتعب اكتر من التاني؟
ده الفرق بين التعامل مع المشاكل وبين التفكير فيها بدون العمل على حلها... الفرق ما بين اللي بيعرف يتحرك ويلاقي مكان يرمي فيه الحِمل التقيل، وما بين اللي شايل حاجة خفيفة بس واقف مكانه، مع الوقت هايشعر أن ال ٥٠ جرام وزنها بدأ يزيد.. ممكن يوصل ل ٥٠ طن!
الفكرة هنا مش انت شايل وزن تقيل ولا خفيف.. الفكرة في المدة الزمنية.. اللي بيتحرك بالمشكلة وعارف انه هايرميها من على كتافه، عنده هدف بيخليه ينسى ثقل الوزن.. لكن اللي واقف مكانه ما بيعملش حاجة غير التفكير فيها والقلق منها، هايتعب حتى لو شايل في إيده ريشة!
لازم كل واحد فينا يتعلم يرمي الحِمل من على كتافه.. حتى لو المشكلة مالهاش حل فوري.. اتعلم تشيلها وترميها لبعض الوقت.. ما تفضلش شايل هموم الدنيا فوق كتافك وعمال بتصرخ.. الحقوني.. فضفض، طلع اللي جواك، اشتغل، العب رياضة.. اعمل اي حاجة فيها حركة.. الهي نفسك..
لغاية لما تلاقي حل المشكلة ، ساعتها شيلها وامشي بيها وارميها بعيد و دور ضهرك وانساها! ما تستسلمش للقلق والتوتر.. كل مشكلة ولها نهاية.. يا أخي ده حتى حياتك كلها لها نهاية.. طب نعمل ايه وإحنا بنواجه المشكلة.. إزاي نفكر فيها من غير ما نغرق في بحرها؟!
فيه حكاية ظريفة جدا عن الحكيم والفتى الصغير.. كانوا واقفين تحت جبل، وقصادهم شجرة كبيرة.. الحكيم سأل الفتى الصغير.. اوصفلي الشجرة.. الفتى قاله.. عملاقة! تسلقوا جزء من الجبل، والحكيم كرر نفس السؤال.. الفتى قاله.. شجرة صغيرة.. وفي الجزء اللي بعده، كان رد الفتى أنها نقطة خضراء صغيرة
لما وصلوا لقمة الجبل.. الحكيم كرر نفس السؤال.. اوصفلي الشجرة... الفتى بص من فوق الجبل، وقعد يبحث عن الشجرة العملاقة.. وقال للحكيم.. مش شايفها! لما يكون عندك مشكلة وشايفها عملاقة.. ده عشان موقعك منها مش عشان حجمها.. اتعلم تبص على المشكلة من أعلى نقطة... هاتشوف حجمها الحقيقي..
قابلت ناس كانت عندهم مشكلة هي مِحوَر حياتهم.. بيتكلموا عنها ٢٤ ساعة في اليوم.. وبعدت عنهم فترة ورجعت لقيتهم مش فاكرين المشكلة ومش بيجيبوا سيرتها.. تسألهم ايه الاخبار.. يقولك ، اه الحمد لله إتحلت والدنيا مشيت! كلمتين في ثانية.. بعد ما كانت المشكلة محتلة حياتهم كلها
القلق وكتر التفكير في المشاكل.. بيسرق منك حياتك.. ما تديهاش اكتر من حجمها.. لكن لا تستهين بها! فن الحياة انك تعرف تعطي كل حاجة حجمها الحقيقي.. وعشان تعرف تعمل ده، لازم تطلع فوق الجبل من حين لأخر وتبص على حياتك من فوق!
جاري تحميل الاقتراحات...