عمركوا وأنتوا بتتفرجوا علي سبونج بوب سألتوا نفسكوا ليه ممكن يبقى بيت سبونج بوب أناناساية كبيرة كده؟ ازاي مستر سلطع مخلف حوت؟ سبونج بوب من أكتر الكارتونز اللي اتعمل عليها نظريات بتثبت إنه مش مجرد كارتون لطيف للأطفال بل فيه رسايل مخفية كتير، خليني اخدكوا لفة في بعض النظريات ديه
أول نظرية بتتكلم علي إن الشخصيات الرئيسية في الكارتون بتمثل الخطايا السبعة، خلينا نبدأ ب مستر سلطع هو شخصية بخيلة وطماعة ممكن تعمل أي حاجة عشان متصرفش جنيه وفي نفس الوقت تكسب أكبر كم من الفلوس مهما كان إيه المقابل لده
عندك بسيط علي طول نايم ومبيشتغلش ومبيعملش حاجة في حياته ف هو بيمثل الكسل، شمشون بيمثل الشر، مش بيعمل حاجة غير إنه عايز يسرق الوصفة السرية بتاعة سلطع برجر، شفيق بيمثل الغضب والغيظ علي طول مش طايق نفسه ولا طايق حياته ولا اي حد حواليه
ساندي مش بتمشي خطوتين من غير ما تقول إنها من سكان تكساس ف هي بتمثل الفخر والغرور (سكان تكساس كده في الحقيقة في أي مكان بيروحوه بيبدأوا ب إحنا عندنا في تكساس ويكمل كلامه عادي)، سريع حلزون سبونج بوب بيمثل الشراهة، بياكل ويشرب عند سبونج بوب ويوم ما نسي يحطله أكل سابله البيت ومشي
ده يودينا لآخر خطيئة وهي الشهوة اللي بتتمثل في سبونج بوب، سبونج بوب بيحب كل الناس وكل حاجة بدون شروط، دايمًا بيحاول يكسب محبة الناس حتى شفيق اللي مش طايقه، دايما بيحس إنه لازم ينول إعجاب كل اللي حواليه وعايزهم دايما يقولوا إنه اجمد واحد في الدنيا
في نظرية تانية بتتكلم علي الوصفة السرية لسلطع برجر اللي مستر سلطع خباها عننا دايمًا وهي إن البرجر ده عبارة عن سلطعونات من نفس جنس مستر سلطع وهو بيقتلهم ويعمل منهم البرجر، لو لاحظ مظهرش ولا سلطع تاني غير مستر سلطع وحتى لما ظهر في حلقة كام طفل كده كانوا معاه واختفوا ومظهروش تاني
من الحاجات اللي بتدعم النظرية ديه إن في حلقة لما شمشون لقى اخيرا الوصفة وعرف يقراها جابوا الكاميرا عليه وهو مصدوم وراح رما الوصفة وطلع يجري وهو بيصرخ وعمرنا ما عرفنا هو شاف ايه
في برضو نظرية بتتكلم عن شخصيات الكارتون ماهم إلا مدمنين مخدرات ف مثلًا سبونج بوب مدمن الأمفيتامين، هتلاقيه علي طول مبسوط ونشيط وساعات عنده جنون عظمة، أو هتلاقيه غضبان وبيتخانق مع أي حد مفيش وسط بين الحالتين
بسيط مدمن حشيش، علي طول بيضحك علي أي حاجة غبية وعلي طول بياكل ومش بيعمل أي نشاط تاني، شفيق مدمن هيروين، هتلاقي دايما مكتئب ومزاجه وحش وبيصرخ في وش سبونجبوب عشان مبسوط ونشيط، مستر سلطع مدمن كوكايين، علي طول غضبان وعلي طول خايف علي فلوسه عشان الكوكايين غالي وساندي عادي مدمنة كحول
في نظرية تانية وهي اللي بدأت بيها الثريد إزاي يكون في اناناسة بالحجم ده وازاي سلطعون يخلف حوت؟ في مكان في أمريكا اسمه Bikini Atoll كان بيتعمل فيه تجارب قنابل نووية وزي ما احنا عارفين المكان اللي عايش فيه سبونجبوب اسمه قاع الهامور Bikini bottom
ف النظرية بتقول إن من تأثير القنابل النووية ديه الكائنات البحرية اتأثرت وحصلهم طفرة جينية ده اللي خلى يبقى في نجمة بحر وسفنجة بتتكلم واناناسة بحجم بيت كبير ومستر سلطع تكون بنته حوت
عشان اللي بيقولوا إن مستر سلطع هو الشوجر داددي ل لؤلؤة يعني ده كوت من حلقة كان استخدم فيها "بنتي" وهي بيتكلم عنها، وديه صور من البوم صورهم وهي صغيرة ف لا هو أبوها مش الشوجر داددي بتاعتها
جاري تحميل الاقتراحات...