حكاية تانية حصلت من زمان اوي.. كنا في ستة ابتدائي.. في يوم داخلين الفصل الصبح عشان نحضر اول حصة.. لقينا شكل الفصل متغير.. المشرف العام على إبتدائي واقف في نص الفصل.. وشه مضلم حرفيا.. واقف بجانبه أربعة من المدرسين.. إحنا قلنا فيه مصيبة سودا حصلت!
طلبوا مننا نقعد كل واحد في مكانه.. بعد فترة صمت مُرعبة.. المشرف العام بدأ يتكلم بصوت محشرج.. قال مقدمة غريبة عن الموت.. وحاول يفهمنا طبيعته.. وبعدين شاور على البنش اللي ورايا.. كان فيه واحد من زمايلنا غايب.. وحكالنا قصة طويلة عن حادثة ومستشفى ونهاية حزينة.. كلنا قعدنا نبص لبعض
ما كناش فاهمين هو بيقول ايه.. كنا راجعين من اجازة ٣ أيام.. قبلها كان زميلنا بيلعب معانا في الحوش.. راح فين؟ مات في حادثة عربية، والده ووالدته نجوا منها.. بعد ما خلص الكلام.. مدرس الحصة طلب مننا نقوم نصلي عشان زميلنا، المسلم والمسيحي.. كله! بعدها بشهر ونص تقريبا كان عيد الأم
كنا عاملين حفلة في المدرسة.. لكن أحد المدرسين دخل علينا قبلها بيوم وقالنا إننا هانطلع رحلة.. وطلب منا كل واحد يجيب هدية عيد الأم معاه.. لمين، ما نعرفش! اليوم ده وصلنا المدرسة وركبنا الباص، لقينا نفسنا نازلين عند بيت زميلنا اللي اتوفى.. ٣٥ طالب تقريبا داخلين شقة ١٥٠ متر
والدته كانت قاعدة ومنتظرانا، كانوا مبلغينها.. اول ما دخلنا ابتسمت وبكِت وكل واحد فينا قدملها الهدية.. دخلنا وصلينا كلنا في غرفته مسلم ومسيحي برضه! وقعدنا والمدرس كان جايب اكل و شرب وحاجات ساقعة.. والدة زميلنا كانت جايبالنا كل واحد لعبة صغيرة.. اليوم كان صعب بس جميل جدا
المدرس ده، فضل ينظم رحلات للفصل بتاعنا، نروح بيت زميلنا في كل مناسبة وكل عيد.. عملنا القصة دي لغاية تانية اعدادي... في اخر زيارة، والدة زميلنا بلغتنا أنها حامل، ربنا عوضها بطفل تاني.. و دي كانت اخر زيارة لينا.. جاتلنا الفصل بعدها بكام شهر ومعاها البيبي الجديد.. سلمت علينا ومشيت
ساعتها فهمنا أن مهمتنا انتهت، ربنا أعطانا فرصة نكون جنبها ، وبعدين أعطاها هدية من السما.. الخير اللي عمله المدرس، لما بافكر فيه باقول انه إنسان وقدوة.. ده المدرس اللي فعلا يتقال عليه مُربي أجيال! قلوب من دهب..
جاري تحميل الاقتراحات...