رتبها

"السادات والقضيه الفلسطينيه" ..
- الحقيقة إن الرئيس #السادات لا باع القضية, و لا تخلى و خان, و لا قال #مصر مالهاش دعوة, زي ما هو شائع للأسف, الرئيس السادات غير شكل الصراع و أدواته الى من نموذج فوق قدرات مصر و امكانياتها, إلى نموذج يلائم إمكانيات مصر و قدراتها ..
يتبع👇👇

و التاريخ بيقول إن العملية دي لم تحدث بشكل عشوائي, بل بشكل مخطط و مدروس استوعب كل الأخطاء الاستراتيجية العربية اللي حصلت منذ بداية الصراع في بدايات القرن الماضي,
لو قريت التاريخ هتلاقي أخطاء استراتيجية قاتلة ارتكبها العرب في فلسطين👇

من أول القبول بالهجرات في عهد الدولة العثمانية (سبب كوارث المنطقة كلها), مروراً بوضع الثقة في المحتل البريطاني, و قبول انتدابه على فلسطين, ثم استخدام الحرب التقليدية في مواجهة عصابات ولاد العم في حرب 48👇

و ده سبب تحقيق المقاومة الشعبية العربية لنتائج عسكرية أفضل بكتير من اللي حققتها الجيوش في الحرب دي,
ده طبعاً غير الخطأ الاستراتيجي الأكبر, و المتمثل في رفض قرار التقسيم الدولي, كان الصح إنك تقبل القرار و تعلن قيام الدولة بكامل مؤسساتها, و بعد كده تحارب👇

محدش هيبقى ليه عندك حاجة, تخيلوا مثلا إن أمر زي اعلان الدولة الفلسطينية كان ممكن جداً يحصل بزيرو تكاليف, لكن ده محصلش لأن العرب كانوا بيدوروا على الخلافة و تملك فلسطين, مش استقلالها أو قيامها كدولة مستقلة👇

حتى بعد الحرب لم تقوم سلطة فلسطينية مستقلة, أدارت مصر قطاع غزة, و أدار الأردن الضفة الغربية, و النهاردة الكلام ده بيتاخد ذريعة من ولاد العم لتطبيق الترانسفير, تخيلوا؟!!
قبل حرب 48 كانت المشكلة اللي بيناقشها العرب مين اللي هيحكم فلسطين بعد طرد ولاد العم منها👇

مصر و لا الأردن و لا سوريا و لا السعودية, و على فكرة مفيش أي حرب دخلها العرب و هم متوقعين إنهم ممكن يخسروها, الحرب الوحيدة اللي خافوا من الهزيمة فيها كانت حرب 1973, اللي انتصروا فيها بقيادة مين؟؟
بقيادة السادات برضو👇

طب ايه المختلف في السادات عن غيره؟
الطابع السياسي, و دايماً الناس تخلط بين السياسي و بين الاستراتيجي و العسكري, السياسة شئ متغير, عجينة تشكلها زي ما انت عايز, بعكس العلوم الاستراتيجية و العسكرية, هي أدوات صناعة سياسة و ليست سياسة في حد ذاتها👇

السادات كان ضعيف عسكرياً من واقع كونه ضابط اشارة, لكنه كان عملاق سياسة, من واقع اهتماماته قبل الثورة, و على فكرة كان هو أشهر أعضاء مجلس قيادة الثورة, و كل المصريين يعرفوه من نشاطه السياسي, و ده سبب القائه البيان الأول رغم انه مكانش المفضل أو القريب من ناصر👇

ده غير إنه لف المؤسسات السياسية كعب داير, من رئاسة تحرير جريدة لمجلس شعب لاتحاد اشتراكي, يعني اتدعك سياسياً قبل ما يوصل للرئاسة,
السادات كان قارئ شره, و بيعرف يربط كويس جداً بين الأحداث, من النوع اللي بيعرف يحلل الخبر مش يقراه و بس, ده غير احتكاكه بالانجليز عن طريق اسرة زوجته👇

كل ده كان سبب في خلق رؤية خاصة ليه في كل حاجة حصلت, كان أبرزها الخلل الاستراتيجي في الصراع, و اللي كلف العرب كتير جداً, برغم إن كان ممكن نتجنب كل ده بصفر تكاليف👇

عايز تعرف رؤية السادات صح؟,
شوف آخر خطاب ليه في مجلس الشعب قبل اعتقالات سبتمبر, خطاب طويل شوية آه, بس هيكشف لك دماغ هذا الرجل, يا جماعة ده السادات بيتكلم في الخطاب ده عن مصر و عن المنطقة و العالم كأنه عايش معانا النهاردة, انتوا متخيلين؟!!!👇

كانت رؤية السادات للحل انك تنغمس وسط العدو و حلفائه, تخترق مؤسساتهم, توصل صوتك, تخوض المعركة الاعلامية و السياسية صح, قبل ما تدخل مواجهات عسكرية من غيرهم فتلاقي الامور كلها اتصعبت عليك!!👇

في واحدة من بنات السادات قالت إنه قالها الرأي ده, و الحقيقة إنه طرح منطقي و نتيجة طبيعية لكل ما جاء في كامب ديفيد, لما تقرأ بنود المعاهدة التفصيلية يستحيل يوصلك شعور الانهزام أو التسليم أو التراجع أو الخيانة أو بيع القضية!👇

محدش بيستسلم و بيشترط معونات عسكرية, مفيش حد بيستسلم بيشترط عدم مشاركة كل طرف في أي عمل عدائي ضد الطرف الآخر, مفيش حد بيستسلم و بياخد اتاوة, بالعكس, ده حرفياً خد كل حاجة عايزها مقابل ورقة!
المعاهدة دي كانت بداية لحرب من نوع آخر👇

انتقل الصراع من ليفيل "الممر" إلى ليفيل "هجمة مرتدة", و هو صراع حققت مصر فيه مكاسب عديدة, سواء على مستوى البنية التحتية للدولة, أو القوة الشاملة ليها, أو ارتفاع نمط الحياة للمصريين, و أمور كتير يمكن مش حاسين بيها لأن جيلنا مشافش حرب و مكانش عايش حياة الحروب و أزماتها👇

اللي عايز أقوله إن الرئيس السادات هو سبب وصف أمريكا لمصر النهاردة بالدولة الحليفة, فأي مشكلة بتحصل بقت بتتعامل كخلاف بين دولتين حليفتين, و ده يفرق في تفاصيل كتير جدا داخل الصراع, هو سبب قدرة مصر على إدارة الصراع الاستراتيجي بشكل قوي و مؤثر!👇

واحد هيقولي هو كله حلو؟, مفيش سلبيات يعني؟!!
لاء طبعاً في سلبيات كتير, لكن السادات عامل زي واحد مكانش في جيبه جنيه و دخل سوق, و بعاركة صغيرة بقى معلم و ماسك السوق كله من غير ما يدفع حاجة!👇

الرئيس السادات أول رئيس عربي يتعامل بشكل استراتيجي مع الصراع العربي الاسرائيلي, شكل تعامل فيه بمنطقية و واقعية و عقلانية, فكان طبيعي يكون أول قائد منتصر في الصراع ده, و كان طبيعي برضو إنه يموت مقتول, لأن هذا النوع من الرؤساء ممنوع تواجده في الشرق الأوسط!👇

عايز تعرف هو منتصر و لا لاء؟
هقولك, النهاردة كله عايز يعمل زيه, و يدفع من جيبه كتير كمان, و للأسف مش عارفين!
مش عارفين ليه بقى, ده موضوع تاني نتكلم فيه بعدين,
رحمة الله على الرئيس البطل, الشهيد محمد أنور السادات ..
#تحيا_مصر ✌️🇪🇬
#mohamed_salah✍️✍️✍️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد