معلش .. مضطر أوضح كام حاجة علشان الموضوع يبقى معروف أسبابه .
-
طبعنا كشعب مصري إننا بنفتخر بأي حاجة تخصنا سواء تاريخية قديمة أو معاصرة وبنفرح بأي حاجة عملناها وإجتهدنا فيها . والطبع ده موجود بزيادة عندنا "الشعور بالقومية والوطنية" . إتخلقنا بيها علشان نستحمل ظروف أكتر من غيرنا (1
-
طبعنا كشعب مصري إننا بنفتخر بأي حاجة تخصنا سواء تاريخية قديمة أو معاصرة وبنفرح بأي حاجة عملناها وإجتهدنا فيها . والطبع ده موجود بزيادة عندنا "الشعور بالقومية والوطنية" . إتخلقنا بيها علشان نستحمل ظروف أكتر من غيرنا (1
ربنا خلقنا كده علشان أي وقت صعب نمر بيه . نفتكر عملنا إيه زمان ونفتكر إننا لازم نبقى كتلة واحدة . ربنا خلق فينا الصفة دي علشان مانشتكيش لحد أو أو نبقى عالة على حد. علشان الحد ده ممكن يكون عنده مشاكل ، أو ممكن في وقت ما عنصر منه يشمت أو يغدر . عزة نفسنا ميزة . الإحتلال مقدرش عليها
ودي حاجة المفروض أشقاءنا يفرحوا بيها . علشان محدش فيهم هيقدر يشيل هموم مصر وظروفها إلا ناسها .. علشان ربنا خلقهم لكده ، المنحة الخاصة لازم لها ناس بصفات معينة . إحنا جربنا الحروب والإنتصارات والهزائم والتقدم والتراجع والإحتلال والإستقلال . تاريخنا بنتعلم منه دروس لازم نعرفها للكل
هقول كام حاجة من وجهة نظري ، علشان تعرفوا إن مصر مش بتبخل لما بتاخد قرارات ممكن ماتكونش على المزاج الحماسي .. بس علشان تعرفوا إن من مصلحة القضية الفلسطينية فعلاً إن مصر ماتدخلش أي تدخلات عسكرية حاليًا . فيه نقاط كتير مهم ناخد بالنا منها كلنا .. علشان الموضوع يتفهم بشكله الصح
هحاول أبسطها عليكم وعلى نفسي .. علشان الموضوع مش معلومات .. ده منطق وتفكير وذاكرة مش بعيدة المدى أوي .... مبدئيًا فلسطين مشكلتها زي مشكلة أشقاء كتير .. فصائل بتحل محل مؤسسات الدولة اللي بتعبر عنها .. وبالتالي قضيتها بتتفرق سياسيًا وعسكريًا وجغرافيًا .. لازم تكون فيه وحدة واحدة
إسرائيل لو شفنا تاريخها التافه .. هنلاقيها إعتمدت سياسة الفيروس اللي دخل الجسم ومعتمد على دعم مصادر العدوى علشان تخليه ينمو لحد مايأثر على الخلايا اللي جوه الجسم ويقدر يشوه بعضها بحيث إنه يقدر يتوغل بدعم من مصدر العدوى الأساسي والخلايا المريضة برضه .. ده تشبيه بسيط للحالة مبدئيًا
بعد حرب أكتوبر .. إسرائيل كانت مخططة إنها تقسم أقوى 3 جيوش عربية إتسببت في هزيمتها (الجيش السوري - الجيش العراقي - الجيش المصري) . فإسرائيل عمرها مادخلت حرب بفروسية راجل لراجل .. لأ ، لازم تستخبى ورا أي أنظمة بقدرات عالية . "بريطانيا زمان - أمريكا دلوقتي" ..
بريطانيا زمان كانت القوة السياسية والعسكرية اللي منتشرة وإحتلت أماكن كتير .. سياساتها التمددية أثرت عليها .. ومصر تحديدًا أنهكتها بشكل جبار .. بس آخر محطة كانت يمكن العدوان الثلاثي علينا .. هو اللي قضى على فكرة بريطانيا العظمى وخلت أمريكا تظهر بشكل أقوى في ملفات الشرق الأوسط
كنا مضغوطين وبنواجه 3 جيوش . لو كانت مثلاً الحماسية شغالة ، كان ممكن قصاد ال 3 جيوش نخسر قوام جيشنا وقوام مقدرات بلدنا .بس علشان لعبنا سياسة وخلينا الموضوع مترتب بحيث إننا نقدر نخلي الضغط السياسي في مصلحتنا . مصر إنتصرت بكده . فكان الدرس الأول في حكايتي هنا (القوة – سياسة = تبديد
الشعب وقف وساند قيادة واحدة .. وهي وقتها كانت متمثلة في الزعيم عبد الناصر الله يرحمه . المقاومة الشعبية إتوظفت صح ، (ماإشتغلتش منفردة علشان تبان) .. كانت بمساعدة من الجيش المصري .. فظهر للعالم . جيش وشعب وقيادة مصممين على حاجة واحدة .. ولجأوا للسياسة مش للعنترة فإنتصروا
فيه سنين جت بعد الموضوع ده - زي ماكانت فيه سنين جت قبل الموضوع ده - يمكن كان فيه خروج لأجل أشقاءنا . نوعًا ما كان فيه إستنزاف لطاقتنا . ده بحكم إن الزعيم عبد الناصر كانت له فلسفة القومية العربية . وهو فضل مخلص لها . بس حتى الأسود لطاقتها حدود وخصوصًا إنها حاربت كتير وده أثر عليها
جربنا النكسة .. وفيه اللي شمت فينا واللي قال لك خلاص .. مصر مش هتقوم لها قومة تاني .. "بالمناسبة .. يعتبروا عناصر فردية لاتمثل أشقاءنا" ، المهم في ظروف زي دي . الزعيم عبد الناصر تحمل المسئولية وأعلن قرار تنحيه .. والتنحي مش مجرد مغادرة ، ده في ظروف زي دي تعتبر تقديم نفسه لمحاكمة
الشعب المصري هنا قال لك لأ .. إحنا برضه معاك ياجمال ، وإبقى فأنت الأمل الباقي .. بيتهيألي في ظروف زي دي كان ممكن أي حد عنده مصالح يستغل بقى ويتصدر المشهد .. لأ ، المصريين عرفوا أهمية الكتلة الواحدة . فقرروا يستمروا مع بعض يد واحدة مع نفس القيادة (ودي أول خطوة للنصر)
شوفوا دلوقتي .. لسه البعض مخليين صورة الزعيم جمال عبد الناصر كوميكس للهزيمة .. مع إن الراجل يعتبر برضه مؤسس لخطة النصر اللي السادات طبق أساسياتها وضاف لها من حكمته ورؤيته اللي ناسبت الظروف اللي مصر بتمر بيها .. وده يعرفكوا درس جديد (إن نكران الجميل وحش وبيضر اللي عمل كده)
ماعلينا .. الرئيس السادات (اللي مكنش باين عليه ملامح الحنكة والذكاء في البداية) وإسرائيل إتخدعت فيه .. الراجل طلع دمااااااغ . حرفيًا دماغ .. وهو رائد فن إستخدام المتاح لتحقيق المطلوب .. الراجل مادخلش بزعامته ولابمناصبه ولابفلوسه .. الراجل دخل بتوفيق ربنا ، وبدماغه ، وبشعب واحد
الراجل جه وإتعامل مع برود الإتحاد السوفييتي اللي كان مغرم بعبد الناصر ومش شايف السادات يملى مكانه ، الراجل جه وأمريكا بتدعم إسرائيل عسكريًا وسياسيًا بغباء ..(كلمة غباء هنا تقصد مصطلح دارج تعبير عن الإفراط) ومع ذلك السادات ماراحش يطلب حد يحارب معاه في أرضه .. درس جديد
السادات لعب سياسة وصبر على اللي بيجهزه .. ماإستعجلش في قراراته وماسمعش صوت الحماسية .. مع إنه كان مضغوط عليه شعبيًا إنه يحارب .. الأصوات دي مش سوشيال ميديا ، دي مظاهرات في كل مكان .. الراجل من كتر ماعمل سياسات إسترخائية إتشتم وإتلام عليه هو وباقي قيادات الجيش .. شعور صعب برضه
وأهو .. مرت السنين والراجل حارب ولبس إسرائيل هزيمة مذلة محدش يقدر ينكرها .. يدوبك بس فيه أصوات شاذة بتطلع تقول لك إن حرب 73 مش إنتصار .. (ودي أصوات مابتمثلش أشقاءنا اللي فرحوا بالنصر ده وتأكدوا منه) .. السادات مكملش عنترية .. حافظ على إنتصاره بالسياسة . مسمعش الأصوات الحماسية
شوفوا الموضوع عامل إزاي؟ الأصوات اللي قالت إن عبد الناصر اللي سبب الهزيمة واللي قالت السادات متخاذل . هي اللي قالت ليه السادات مكملش تحرير باقي الأراضي العربية؟ . الأصوات اللي زي دي بيبقى من العبث الواحد يرضيها على حساب الضروري فعلاً . لأنهم مش هيرضوا ، فالأولى نرضي الضرورة . صح؟
السادات وإتفاقية كامب ديفيد .. أشقاءنا العرب وقتها خونوه وقاطعوا مصر .. ماهي الحماسية برضه طلعت هنا .. والنتيجة ، إن السادات إستشهد .. لكن قضيته ماإنهارتش لأنها بقت في يد شعب ودولة وقيادة .. مش فصائل وأحزاب ، وسيناء رجعت .. عيد تحريرها كان بعد وفاة بطلها الشهيد بكام شهر
دخلنا مفاوضات وتحكيم على طابا سنين . برغم صعوبة الأجواء ، لكن مصر فضلت مراهنة على السياسة هنا . مش القوة العسكرية ، ورهانها كان في محله . الدرس الجديد (النفس الطويل) بعد 16 سنة من الحرب . خدنا الجزء الصغير اللي كان ناقص . ورجعت سيناء كاملة ، بشعب واحد بقيادة واحدة وبقدرات محلية
مصر دفعت أموال مهولة في سبيل مساعدة أشقاءها عبر العصور . دفعت عشرات الآلاف من أنفس أبناءها علشان أشقاءها في عصر من العصور ودفعت أضعاف أضعاف الأعداد دي في سبيل قضاياها القومية . البعض -لايمثلوا أشقاءنا- عايرنا "مش هقول بفقرنا". بس بقدراتنا الإقتصادية اللي كانت مجهدة من اللي دفعناه
ياجماعة أنا بحكي لكم تاريخ أنا مكنتش أتولدت أنا فيه .. أنا مواليد 93 .. بس علشان أهلي هما اللي ضحوا ، فسلموني تاريخ أقدر أحكيه للأجيال المعاصرة اللي بتسأل مصر ليه مابتخرجش عسكريًا .. أهي قصة على سبيل المثال فيها دروس .. إزاي أهل البلد هما اللي بيحرروا أرضهم
إسرائيل إشتغلت إزاي تفرق أقوى الجيوش عن بعضها .. إستغلت مع أمريكا "التفرقة الطائفية في العراق .. والقرارات تجاه الكويت" واللي مصر إضطرت تخرج كقوة إقليمية عاقلة "مساعدة" .. الأساس كانت السعودية والتحالف الدولي كانت أمريكا داخلة بعدد مقاتلين أكبر بطبيعة الحال
واحد ممكن يسأل . ليه مصر هنا شاركت بعدد مقاتلين؟ علشان وقتها الأمر كان واضح بخصوص الكويت .. قيادة واحدة ، شعب واحد ، سياسة حماية وكان الدخول بقوات دولية متعددة .. عربية وأجنبية ، مساندة دولة مش فصائل بعينها .. والموضوع أساسًا إتشكل سياسيًا مش دخلة حماسية وأوعى القطر يعني
الجيش السوري برضه كان ضحية مخطط تقسيم ، بس على أساس سياسات .. بقى فيه وقتها مايسمى "جيش حر - وديمقراطي وتقسيمات تانية مش فاكر أساميها" .. وييجي وقتها كذا واحد يقول لك ليه مصر مادخلتش تدعم سوريا .. مصر لو كانت دخلت عسكريًا كانت القضية هتتعقد وخصوصًا إن الموقف كان عليه خلاف عربي
مرسي الجاسوس كان عايز يورط الجيش المصري إنه يدعم (الجزء المنشق عن الجيش السوري) وقال لك لبيك ياسوريا .. الخطوة دي كانت هتسبب ضياع للجيوش كلها . التناحر هيمسك في بعضه ومرسي وقيادات جماعته ياكلوا بط .. وسيناء تضعف وتقع في إيد خونة هيسلموها لإسرائيل .. حتى إسألوا محمود عباس
فلذلك يعني هنا الموقف المصري الحقيقي بخصوص سوريا كان واضح .. الحفاظ على الدولة السورية والجيش السوري .. لأن دول اللي بيفضلوا ودول لو ضاعوا مابيرجعوش ولو رجعوا .. مش هيرجعوا زي الأول إلا بمعجزات ورغبة حقيقية من السوريين نفسهم
ليبيا .. جارتنا اللي شافت كتير .. جيشها إتدمر بعد سقوط القذافي .. ودخول الناتو وسيطرة الإرهابيين على الأراضي + نظام الحكم المؤقت (اللي سمح بدخول الإحتلال التركي) .. مصر فضلت تتكلم بالسياسة لحد ما الوضع ماوصل لقناعة إن فيه خطورة حقيقية وكان لابد من قرار مساعدة (الجيش الليبي)
نظام الحكم المؤقت واللي إنتهت صلاحيته عمل إتفاقية مجرمة مع تركيا .. ده حرفيًا كان لازم يتم التواصل مع السلطة المنتخبة هناك (البرلمان الليبي) علشان يوافقوا على تواجد مصر .. وسبحان الله ، رسم الخط الأحمر نفع سياسيًا وخلى فيه خطوات جادة إن الليبيين يختاروا مصيرهم ومصر أول الداعمين
اليمن بالمختصر المفيد .. وقعت ضحية للمؤامرات .. والأوضاع هناك مستحيل دولة واحدة تتكفل إنها تدعمها .. بس بعض الفصائل بتدعم الحوثيين اللي مدعومين من إيران اللي بتدعم حماس .. فداخلة ضمن المواضيع المتشابكة .. بس الموقف السياسي لمصر إنها داعمة للقوات العربية اللي بتدعم الجيش اليمني
فلسطين بقى فصائل كتير .. فصيلة متدعمة بالسلاح وبتتحرك بشكل فردي .. فيه عناصر منها كتير إستهدفت مصر وسوريا والعراق علشان إنتماءها لجماعة إرهابية كلكم عارفينها .. ومش عايزة تبقى جيش نظامي تحت مسمى الجيش الفلسطيني تابعة لإدارة سياسية واحدة . ومصر مابتدعمش فصائل على حساب التانية أكيد
طيب مصر تعمل إيه؟ . الأول نعمل مصالحة فلسطينية فلسطينية .. تبقى فلسطين متفقة على قيادة واحدة تقدر تكمل مشوار حل الدولتين ونفضى بقى لموضوع القدس . بحيث لو إحتجنا تصعيد .. نقدر نقول فلسطين بتصعد . لأن مصر بتقول أنا بدعم القضية الفلسطينية . ودي قضية لازم لها شعب وقيادة وجيش فلسطيني
طيب لو مصر قررت تدخل عسكريًا حاليًا .. إيه اللي هيحصل؟ القضية الفلسطينية هتتضر أكتر لأن إسرائيل هتاخد الموضوع بشكل حرب حقيقية .. وهتاخد الفلسطينيين كرهائن ودروع بشرية .. أصل مصر هتضرب إيه هناك؟ +حماس وهي بتضرب أي صواريخ وخلاص هتضرب عمياني وممكن تضرب جبهتنا إحنا
طبعًا إسرائيل ممكن تاخدها حجة وتبدأ تفتح جبهة تانية في سيناء .. كده حضراتنا هنحارب في جبهتين .. ومافاضلش غيرنا جيش نظامي عربي قوي ومصنف .. تركيا هتعمل نفسها مش واخدة بالها . إيران هتتعمق أكتر في شبه الجزيرة العربية لأن خط دفاعها الإقليمي مشغول في إرضاء فصائل فلسطينية بالحرب معاها
كده الجيش المصري إتفتحت ضده جبهات كتير .. وكل ده وماإتكلمتش عن مساعدات أمريكا لإسرائيل اللي ماهتصدق تستغل فرصة توغلنا .. يبقى القضية الفلسطينية إستفادت إيه؟ والإسلام إستفاد إيه؟ .. والأصوات اللي بتقول لك مصر ليه مادخلتش .. هتتريق وتقول دخول مصر ضر القضية .. هيقولوا كده فعلاً
يبقى الأولى نشغل دماغنا .. قضية فلسطين لازم اللي تكون فلسطينية .. قيادة واحدة تاخد كل الدعم .. جيش واحد نظامي حتى ولو بإمكانيات بسيطة في الأول . بس وقتها ياخد الشرعية والأسلحة هتجيله .. فيه ناس هتحب تعاند أمريكا لما تلاقي فرصة زي دي .. والحكام العرب هيلاقوا جدوى وقتها من الدعم
فلسطين عندها فرصة توحد صفوفها وتكسب دعم عالمي أكتر ... وخصوصًا إن الفلسطينيين في الأراضي المحتلة بدأ يظهر لهم صوت ولازم يتم الإهتمام بيه + بقى فيه دلائل ناس كتير في العالم لاحظتها بتأكد إن إسرائيل طلعت عنصرية في تعاملها مع العرب اللي قاعدين فيها .. السياسة هنا هتجيب نتيجة .
أنا ليه أصلاً قاعد ساعتين أكتب في حاجة ممكن محدش يكلف نفسه ويقراها وأنا الأكاونت بتاعي بقالي فترة مابكتبش فيه كتير فمش هيلاقي تفاعل .. وأساسًا لو مكتبتش موقفي معروف؟ علشان ده جزء من الدعم اللي مش منتظر منه شكر ولاتقدير ولاإهتمام .. بكتبه علشان أحس بالراحة إني كتبت
في الختام أنا هكتب الكلمتين دول وهكمل حياتي الطبيعية عادي .. أنا في الآخر مواطن طبيعي .. مش مناضل سياسي أو عسكري ، لكن في تقاليد وأعراف تقديم الدعم .. المواطن يقدم رسالة دعمه عن طريق قيادات بلاده ، فلو قيادات بلادي عملت خطوة كأني أنا اللي عملتها (خصوصًا إني مختار رئيسها مرتين)
وقبل ماأقفل 🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬🇪🇬 و 🇵🇸 وشكرًا
إستنوا .. أنا برضه بسجل تجديدي لموقفي إني مش راضي عن اللي بتعمله أثيوبيا واللي وراها .. وحصتنا في النيل ماتقبلش تمنيع أو تقليل أو تغريق .. والسد الأثيوبي ده مخالف .. ويارب أنصرنا على الإجرام ده .. الملئ الثاني ده خط أحمر بالنسبة لنا
جاري تحميل الاقتراحات...