رتبها

ثريد جديد عن محافظة السويس
بلد كدة صغننة هادية تتلف في يوم مش زحمة نسبيا او مقارنة بمحافظات تانية ، الأسعار فيها طبيعية ومعقولة سواء مواصلات كافيهات الحياه عموما الا اللبس تعتبر من المحافظات اللي مش رخيصة في اللبس ف لو جاي السويس لأول مرة ومقرر تشتري لبس مش هايكون أحلى قرار يعني

مش هاتكلم عن منطقة العين السخنه اللي هي جزء منها وهي عبارة عن منطقة صناعية ، سياحية ، تجارية ، بحرية ، بس هاتكلم عالبلد نفسها من جوة
.

الأماكن الترفيهية تعتبر محدودة لان البلد اصلا صغننة البلد تعتبر يمين وشمال..
يمين يوديك جزء السويس "دي منطقة تانية جوة السويس اسمها السويس برضو ومعظمها محلات" والكورنيش وبورتوفيق واماكن تانية جوة البلد ليها اسامي عادي
.

وشمال يوديك جزء اسمه السلام دا اللي ممكن يطلعك على طريق القاهرة ودا عبارة عن بيوت ومكان ترفيهي واحد فقط اسمه منتزه بدر (زي نادي كدة) لطيف برضو

نمسك اليمين بقا اللي هو أساس الترفيه
بورتوفيق البحر كان زمان حاجة رائعة هي فسحة كانت لوحدها بس اتقفلت دلوقتي فاللي ممكن تاخده من بورتوفيق انك ممكن تتصور في البيوت اللي هناك عاملة زي الطراز الأوروبي وجنينة الفرنساوى جميلة اوي مكان تصوير برضو وتقعد فيها
.

الكورنيش بقا..قعدته حلوة اوي ودلوقتي بقى جزأين جزء من تحت أقرب للبحر وجزء من فوق بس لو هاتقعد عالكورنيش ماتركنش عربيتك هناك عشان بقى مخالف وموجود بارك تقدر تركن فيه
.

هناك برضو أغلب الكافيهات هتلاقيها وكلهم تحفة والمكان نفسه شامل كل حاجة في نفس المربع كدة..يعني هتركن عربيتك عاوز كافيه أكل ستور العاب صيدلية كله كله موجود

طبعا السويس لو انت جاي أول حاجة هتيجي ف دماغك أكلة السمك. ممكن ارشح فارس و عروس البحر والجاسر وأسماك خليفه والسويسي و المحروسة و عبده وارث للمأكولات البحرية أو أنزل على حلقة السمك بسوق الانصاري نقي واختار وفي ناس بتشوي السمك هناك معاهم رز وسلطات وخدهم وروح اقعد على الكورنيش
.