إمبارح جددت رخصة السيارة في مجمع تراخيص التجمع الخامس...
آخر مرة دفعت حوالي ٨٠٠ جنيه بالاكراميات.. إمبارح دفعت ٤٥٠٠ تقريبا.. الإكراميات زادت، خصوصا بعد ما بقى فيه فحص إضافي، فحص البيئة! نفس الموظفين ونفس الروتين مع إختلاف شكل المبنى!
آخر مرة دفعت حوالي ٨٠٠ جنيه بالاكراميات.. إمبارح دفعت ٤٥٠٠ تقريبا.. الإكراميات زادت، خصوصا بعد ما بقى فيه فحص إضافي، فحص البيئة! نفس الموظفين ونفس الروتين مع إختلاف شكل المبنى!
الملف الكرتون اللي كان ب١٠ جنيه وبعد كده بتلاتين.. بقيت زي حافظة فيها كام نموذج فاضي وعلبة فيها ماسك ومطهر للايدين وقفاز نايلون.. الملف ب ١٧٠ جنيه تقريبا.. الكيس اللي فيه معدات السلامة المثلث وباقي الحاجات ب ٧٠٠ جنيه!! مع اني قلتلهم اني معايا كل حاجة في الشنطة..
الموظف اللي ماسك الملف ورا الشباك، قالي كل سنة وانت طيب، رديت عليه.. اي خدمة، رديت عليه.. تؤمورنيش بحاجة تاني، رديت عليه.. حضرتك شرفتنا، رديت عليه.. بعدين اداني ورقة امضي عليها وباصيصلي في عينيا وبيقولي، كل سنة وانت طيب.. مضيت ولقيته مش عايز ياخد الورقة.. ده نموذج بسيط
طبعا ساحة الفحص الفني، دي تشوف فيها العجب.. مطلوب منك تشتري نموذج وتقف في طابور السيارات للفحص الفني وتدخل على فحص البيئة وتروح لكشك الطفاية وكشك التسجيل اللي بتدفع فيه قيمة معدات السلامة، وتروح تستلمها من كشك تاني.. كل ده ومافيش مكان تركن فيه، ناس عمالين يزعقوا فيك.. ممنوع ممنوع
وأمين يجيلك يقولك ممنوع، ويبتسم ويقولك براحتك وكل سنة وانت طيب.. وسايس يجيلك وياخد المعلوم، والأشخاص اللي بياخدوا بصمة الموتور والشاسيه، وبيتخانقوا مع بعض عشان الدور، وياخدوا المعلوم.. والريس بتاع الساحة عايز منك المعلوم وانت طالع.. وكشف البيئة فيه معلوم برضه..
اللذيذ بقى أن كل شخص أو كشك بتدفع فيه، بيقولك ماعيش فكة.. خمسة هنا، وعشرة هناك وعشرين هنا.. تلاقي نفسك سايب باقي اكتر من ٧٠ أو ٨٠ جنيه.. عايز تستنى وتبحث عن فكة، وهاتلاقي السايس بيصرخ ويقولك انك راكن في الممنوع.. هاتلاقي نفسك مستعد تسيبلهم البنطلون وتجري، بس تاخد الأختام وتهرب
طبعا لو حضرتك رايح وقاعد حاطط رجل على رجل مش هاتدفع كل ده، هاتقول ليه وازاي وعشان ايه.. لكن المنظومة بتحطك تحت ضغط ومجهود ودوخة عشان تدفع اي حاجة وتخلص من الكابوس ده... الحاجة الإيجابية الوحيدة، أن طابور المخالفات ما اخدش وقت كبير ... و دي كانت حاجة بنشيل همها
المهندس في الفحص الفني بيطلب إكرامية عيني عينك ، وهكذا في فحص البيئة...مش باحب اكون بانشر السلبيات لكن في الحالة دي، انا باوصف واقع شوفته وعيشته.. نفسي الدنيا تتغير ويعفونا من اللفة الرهيبة دي، ومن كابوس الاستغلال اللي بنتعرضله وإحنا بنخلص الإجراءات..
هاتقولي ماتدفعش اكراميات... هاقولك، ممكن ارفض ادفع.. بس المصلحة مش هاتمشي، لأن رقبتك في ايديهم.. يعني مثلا باقترح أن الترخيص يبقى عامل زي التوكيل.. تحجز قبل ما تروح.. يستلموا منك العربية بالمفتاح والرخصة.. تقعد تستريح في التكييف وترجع تستلم السيارة والرخصة وتسدد الرسوم! صعبة؟
جاري تحميل الاقتراحات...