النهاردة كنت رايحة مشوار مستعجلة قبل مشوار شغل ولقيت القط ده هزيل وعينه ملتهبة ومقفولة من الالتهاب. هقولكم اتصرفت معاه ازاي لعل ده يفيد حد لما يتحط في موقف مشابه.. ثريد ⬇️
أول حاجة لاحظت انه هزيل جدا وأول شئ عملته اني لقيت سوبر ماركت جنبنا بخطوتين. جبت تونة مش فاكرة نوعها حقيقي بس كانت قطعة واحدة عشان اقدر اصفيها من الزيت كويس، وكانت ب١٠ جنيه ف مش مكلفة زي أنواع تانية. صفيتها من الزيت وحطيتها على كيس بلاستيك ورفض ياكل وده معناه إنه عيان جدا
وهو بيشمشم في الأكل ورافضه، رحت الصيدلية بسرعة جبت قطرة اسمها توبرين، وجبت منديل وبليته بشوية ماية ونضفت عينه الأول وبعدين حطيتله من القطرة وعينه فتحت! ده شكله بعد تنضيف العين
ده شكل القطرة. هي مضاد حيوي وسعرها ١٢ جنيه مش غالية. ملحوظة ماتجيبوش قطرات فيها كورتيزون زي قطرة توبرادكس او ديكساترول لأنها ممكن تكون مضرة في الالتهابات الشديدة. ولو امكن هاتوا محلول ملح من الصيدلية لتنضيف العين أحسن من استخدام الماية بس
كان عندي معاد شغل ضروري ماينفعش أفوته، ف وصيت صاحب المحل اللي القط قدامه انه يخلي باله منه كام ساعة لحد ما أقدر ارجع وآخده لدكتور. دايما لما تبقوا مضطرين تسيبوا حالة شوية وترجعوا، اسألوا الناس حواليكم هتلاقوا حد عنده استعداد يخلي القط معاه شوية لحد ما ترجعوا
هنا في نقطة مهمة، لما تكونوا مهتمين بالانقاذ او بتحبوا الحيوانات، اعرفوا دايما ايه العيادات المجاورة الكويسة ومتوسط أسعارهم كام عشان تقدروا تتحركوا بسرعة وماتروحوش عيادة اسعارها غالية جدا عليكم. أنصحكم بشدة تسألوا وتعرفوا دايما من صحابكم المنقذين ومربيين الحيوانات
المهم رجعت من شغلي، جبت كرتونة من سوبرماركت لأن مش معايا بوكس قطط، ورحت على أقرب عيادة كويسة أنا عارفاها ومجرباها على بعد ٥ دقايق.
في العيادة قيسنا درجة حرارته وكانت منخفضة عن الطبيعي وده دلالة على شدة المرض عنده. واتشخص ان عنده فيروس كاليسي وهو فيروس بيصيب الجهاز التنفسي وبيعمل قرح في الفم، عشان كدا القط مش راضي ياكل وهزيل جدا.
الدكتور طبعا قال لي انه لو المرض تمكن منه لدرجة ان حرارته بدأت تنخفض، فرص نجاة القط بقت قليلة. قررنا اننا هنعمل اللي علينا وسواء عاش أو مات دي حاجة مش في ايدينا. حطينا القط على heating pad عشان جسمه يدفى، ولما درجة حرارته رفعت شوية ركبنا كانيولا وعلقنا محاليل، وأخد مضاد حيوي.
بعد شوية محاليل القط بدأ يفوق ويحاول يطلع من الكرتونة 😃
دلوقتي درجة حرارته معقولة شوية، لكن فرص نجاته مش كبيرة. سبته يقعد اقامة في العيادة وهيفضل دايما فوق الheating pad عشان يفضل دفيان، وهياخد محاليل مرتين في اليوم.
عشان العيادة دي كويسة وبتعمل اسعار مخصوص للإنقاذ، الموضوع تكلفته اقل من لو حيوان أليف من البيت.
عشان العيادة دي كويسة وبتعمل اسعار مخصوص للإنقاذ، الموضوع تكلفته اقل من لو حيوان أليف من البيت.
انا سميته زئرد عشان واحنا بنكشف عليه وفي عز تعبه، مسكته عشان أكتفه وقت الكشف ولقيته بدأ يpurr 😃 هو قط جميل ولو عدى منها هيبقى اليف جدا وحلو، اتمنى انه ينجو. هتابع مع العيادة كل يوم وهوافيكم بالمستجدات
زئرد النهاردة درجة حرارته لسة مش ظابطة أوي وقاعد على الheating pad. الدكاترة قالولي انه لسة منتبه وبيتحرك وكان بيلعب معاهم شوية وهم بيدوله المحاليل الصبح بالرغم من انه نسبيا همدان. اتمنى من كل قلبي يكمل
من شوية الدكتور كلمني قال لي ان زئرد لسة رافض ياكل لكنه شرب من نفسة شوية لبن متخفف وده شئ كويس. لكن في نفس الوقت لسة درجة حرارته منخفضة وماوصلتش لبر الأمان. ادعوله كتير
جاري تحميل الاقتراحات...